🌹 “ഇന്നത്തെ ചിന്താവിഷയം” 🌹 – 2024 | നവംബർ 05 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

പഠിക്കേണ്ടതു മാത്രം പഠിക്കാം
————————————————-

പക്ഷികളും, മൃഗങ്ങളും ചേർന്ന് ഒരു സ്കൂൾ തുടങ്ങാൻ തീരുമാനിച്ചു. പ്രാവ്, അണ്ണാൻ, മീൻ, നായ, മുയൽ, തവള എന്നിവരായിരുന്നു, ആദ്യ പഠിതാക്കൾ. വിദ്യാഭ്യാസ സമതി കൂടി, പറക്കൽ, മരം കയറ്റം, നീന്തൽ, മാളമുണ്ടാക്കൽ എന്നീ പാഠ്യവിഷയങ്ങൾ തീരുമാനിച്ചു. എല്ലാവരും, എല്ലാ വിഷയങ്ങളും പഠിക്കണമെന്ന നിബന്ധനയും അവർ പാസ്സാക്കി.

പറക്കലിൽ പ്രാവിന് , എ പ്ലസ് കിട്ടി. പക്ഷെ, മാളമുണ്ടാക്കാൻ ശ്രമിച്ച് ചുണ്ടിനു പരുക്കു പറ്റി, പിൻമാറി. മരം കയറ്റത്തിലും, നീന്തലിലും പ്രാവ് തോൽക്കുകയും ചെയ്തു.
അണ്ണാൻ മരം കയറ്റത്തിൽ എ പ്ലസ് നേടിയപ്പോൾ, നീന്തലിൽ പരാജയപ്പെട്ടു. മീനായിരുന്നു മികച്ച നീന്തൽക്കാരൻ പക്ഷെ, വെള്ളത്തിനു പുറത്തേക്കു വരാൻ അതിനു കഴിഞ്ഞില്ല. മുയൽ വളരെ വേഗം മാളമുണ്ടാക്കിയെങ്കിലും, മരം കയറ്റത്തിൽ പരാജയപ്പെട്ടു. പാഠ്യപദ്ധതിയിൽ കുരയ്ക്കാനുള്ള പരിശീലനവും വേണമെന്ന് നായ ആവശ്യപ്പെട്ടെങ്കിലും, നടക്കാതെ വന്നപ്പോൾ പഠനം നിർത്തി പിൻമാറി. വാർഷീക പരീക്ഷയിൽ തവള മാത്രം, എല്ലാം ശരാശരി ചെയ്ത് സ്വർണമെഡൽ കരസ്ഥമാക്കി.

അറിയാത്തതെല്ലാം പഠിക്കാൻ വേണ്ടിയല്ല, അറിയേണ്ടതെല്ലാം പഠിക്കാൻ വേണ്ടിയാകണം, വിദ്യാഭ്യാസം. എല്ലാവരും, സർവ്വവിജ്ഞാന കോശങ്ങളായിത്തീരാൻ, പoനത്തിൽ ഉദ്ദേശിക്കപ്പെട്ടിട്ടില്ല. ഒരാൾ ആയിത്തീരേണ്ടത് എന്താണാവോ, അതി നാവശ്യമായ അറിവുകളും, പരാശീലനവുമാണു്ണ് നേടേണ്ടത്. അഭിരുചികളെ അവഗണിച്ചുള്ള പoനങ്ങളും പരിശീലനവും, അനന്ദരഹിതവും, മറ്റാർക്കോ വേണ്ടിയുള്ളതുമായിരിക്കും.

എല്ലാ വിഷയങ്ങളിലും ഒരുപോലെ മികവു പുലർത്തുന്നവരെ കണ്ടെത്തുക ദുഷ്ക്കരമാകും. എന്നാൽ, എല്ലാവർക്കും, ഒരു കഴിവെങ്കിലും ഉണ്ടായിരിക്കും, സ്വന്തമെന്നഭിമാനിക്കാൻ. അതു പരിപോഷിപ്പിക്കാനുള്ള ഇടമില്ലെങ്കിൽ, അവർ എവിടെയെങ്കിലും ചെന്നെത്തി, മണ്ടന്മാരെന്നു മുദ്ര കുത്തപ്പെടും. സ്വന്തം കഴിവു തെളിയിക്കാൻ ഒരു സാദ്ധ്യതയുമില്ലാത്ത ഇടങ്ങളിൽ വളരുന്നവരുടെ നിലവിളി, സമ്മാനം നേടിയവർക്കുള്ള കരഘോഷങ്ങൾക്കിടയിൽശ്രദ്ധിക്കപ്പെടാതെ പോകരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര