🌺 ശുഭദിനം 🌺 – 2024 | ജൂൺ 21 | വെള്ളി ✍ അർച്ചന കൃഷ്ണൻ

” ഞാൻ ദൈവത്തെ തേടി കണ്ടില്ല,
ആത്മാവിനെ തേടി കണ്ടില്ല,
മനുഷ്യനെ തേടി അപ്പോൾ ഇതെല്ലാം എനിക്ക് ലഭിച്ചു”

മുരളീധർ ദേവീദാസ് ആംതെ

ഈ ലോകത്തു ഒരു ജീവജാലങ്ങളും പൂർണ്ണരല്ല. എന്നാൽ ക്ഷമിക്കുവാനും, സഹിക്കുവാനും ശ്രമിക്കുമ്പോളാണ് പൂർണ്ണതയുണ്ടാകുന്നത്. മറ്റുള്ളവരുടെ ഒരേ ഒരു തെറ്റ് കാരണം അവരുടെ ശരികളെയെല്ലാം ഒരു നിമിഷം കൊണ്ട് മറന്നുപോകുന്നവരാണ് മനുഷ്യൻ. പല പ്രിയപ്പെട്ടവരെയും നിസ്സാരമായ എന്തെങ്കിലുമൊരു കാരണം കൊണ്ട് നാം തള്ളിപ്പറഞ്ഞിട്ടുണ്ടാകാം. വന്നുപോയൊരു അബദ്ധത്തിന്റെ പേരിൽ എത്രയോ പ്രിയപ്പെട്ടവരെ മനസ്സിൽനിന്ന് പറിച്ചു കളഞ്ഞിട്ടുണ്ടാവാം. പൂർണമായ ശരിയും പൂർണമായ തെറ്റും ഒരാളിലുമുണ്ടാവില്ല. ശരിയും തെറ്റും മാറി മാറി വരുന്ന ഒരു മനസ്സാണ് എല്ലാവർക്കുമുള്ളത്. അതിൽ ഏതിനാണ് കൂടുതൽ സ്ഥാനം കൊടുക്കുന്നത് എന്നതിനനുസരിച്ച് ജീവിതം മാറുന്നു എന്നേയുള്ളൂ.

വൻമരങ്ങളുള്ളയൊരു കാട്ടിൽ വള്ളിപ്പടർപ്പുകളും കുറ്റിച്ചെടികളും പുൽക്കൊടികളും, തൊട്ടാൽ ചൊറിയുന്ന മരങ്ങളുമെല്ലാം കാണും, അവയെല്ലാം കൂടിയതാണ് കാട്. എല്ലാം സ്വീകരിക്കാതെ നമ്മുക്ക് കാടിനെ സ്നേഹിക്കാനാകില്ല. മറ്റുള്ളവരെ സ്നേഹിക്കാൻ ശീലിക്കുമ്പോൾ അവരുടെ കൊച്ചു കൊച്ചു പോരായ്മകളെ ക്ഷമിക്കാനും നാം തയ്യാറാകണം.

ഏവർക്കും ഹൃദയം നിറഞ്ഞ ശുഭദിനാശംസകൾ

അർച്ചന കൃഷ്ണൻ