🌹 “ഇന്നത്തെ ചിന്താവിഷയം” 🌹 – 2024 | ജൂലൈ 20 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ഒന്നും ആർത്തിക്കല്ല, ആവശ്യത്തിനു മാത്രം
—————————————————————-

അയാൾ പതിവായി ഒരു ഹോട്ടലിൽ നിന്നു തന്നെയാണു ഭക്ഷണം കഴിച്ചിരുന്നത്. ഓർഡർ സ്വീകരിക്കുന്നയാളുടെ കയ്യിൽ മുൻകൂറായി പണം നൽകുന്നതായിരുന്നു, അവിടത്തെ രീതി. എല്ലാത്തവണയും അയാൾ കൃത്യം തുക തന്നെ നൽകുന്നതു കണ്ട വിളമ്പുകാരൻ അയാളോടു ചോദിച്ചു: “താങ്കളുടെ കയ്യിൽ എങ്ങനെയാണ്എ ന്നും കൃത്യം തുക തന്നെ കാണുന്നത് ?” അയാൾ പറഞ്ഞു: “എനിക്കൊരിക്കൽ ഒരു അത്ഭുത വിളക്കു കിട്ടി. അതിൽ നിന്നു പ്രത്യക്ഷപ്പെട്ട ഭൂതം എനിക്കൊരു വരം നൽകി. എൻ്റെ ആവശ്യത്തിന് ഞാനെന്തു വാങ്ങിയാലും അതിനുളള കൃത്യം തുക എൻ്റെ പോക്കറ്റിൽ കാണും!”

വിളമ്പുകാരൻ പറഞ്ഞു: “നിങ്ങളൊരു മoയനാണ് . ഞാനായിരുന്നുവെങ്കിൽ കോടികൾ ചോദിക്കുമായിരുന്നു. എന്നാൽ നിങ്ങൾ ചില്ലറയേ ചോദിച്ചുള്ളു”. അയാൾ ചോദിച്ചു: “ഏതാണു മെച്ചം: കോടികൾ ഒരു മിച്ചു കിട്ടിയിട്ട് , എന്തു ചെയ്യണമെന്നറിയാതെ നിൽക്കുന്നതോ, അതോ. വേണ്ടത് അപ്പപ്പോൾ ലഭിക്കുന്നതോ?”

പണത്തിൻ്റെ ആധിക്യമാണ് ആഡംബരങ്ങളുടെയും ധൂർത്തിൻ്റെയും അടിസ്ഥാന കാരണം. അളവിൽക്കവിഞ്ഞു ലഭിക്കുന്നതൊന്നും, ആർക്കും അളന്ന് ഉപയോഗിക്കാനാകില്ല. അപ്രതീക്ഷിതമായി കൈവരുന്നതെല്ലാം, അതിവേഗം അപ്രത്യക്ഷമാകുന്നതിൻ്റെ കാരണമെന്താണ്? അദ്ധ്വാനിച്ചു സമ്പാദിക്കാൻ അറിയാത്തവന് എങ്ങനെ ചെലവഴിക്കണമെന്നും അറിയണമെന്നില്ല. അവശ്യങ്ങളിലൂടെയും അതിൻ്റെ വിഷമതകളിലൂടെയും കടന്ന്, അനാവശ്യങ്ങളിൽ നിന്നും കൃത്യമായ അകലം പാലിച്ച്, ജീവിതത്തെ ക്രമപ്പെടുത്തുന്നവർ, ‘അന്നന്നത്തേക്കു വേണ്ടിയുള്ള ആഹാര’ത്തിനു വേണ്ടതേ ആഗ്രഹിക്കൂ ; അത്രയേ ചിലവിടൂ.

ആർത്തിക്കനുസരിച്ചല്ല, ആവശ്യങ്ങൾക്കനുസരിച്ചാകണം, സമ്പാദ്യവും ചെലവുമെല്ലാം. കരുതലും നിക്ഷേപവും അനാവശ്യമാണെന്നല്ല; പക്ഷെ, അവയുടെ വലുപ്പം കൊണ്ട് ‘കാഴ്ച’ മങ്ങിപ്പോകരുത്. ഒരാൾ കാണിക്കുന്ന ആഡംബരത്തിൻ്റെ അളവല്ല അയാളുടെ ജീവിതവിജയത്തിൻ്റെയും സൗഭാഗ്യത്തിൻ്റെയും തെളിവ്. മറിച്ച്, ഒരാൾ ഫലപ്രദമായും ഗുണനിലവാരത്തോടും കൂടി നയിച്ച ജീവിതവും, നേടിയ സംതിപ്തിയുമായിരിക്കുമതു്ത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര