ബൈജു തെക്കുംപുറത്ത് എഴുതുന്ന..” സ്നേഹ സന്ദേശം “

💚💚💚💚💚💚

“പൊന്നൊളിതൂകി കതിരവനെത്തി
പുഞ്ചിരിതൂകി ഉണർന്നീടാം..
ഓരോദിനവും ഒരുവരദാനം
ഓർത്തുവണങ്ങാം ഈശ്വരനെ..”

ശുഭദിനം..
🍀🍀🍀

” എന്നോടു പ്രവര്‍ത്തിച്ചതുപോലെ ഞാന്‍ അവനോടും പ്രവര്‍ത്തിക്കും,അവന്‍ ചെയ്‌തതിനു ഞാന്‍ പകരംചെയ്യും എന്നു നീ പറയരുത്‌.”

– സുഭാഷിതങ്ങള്‍ 24 : 29

🌿 “അനീതി പ്രവർത്തിച്ചവരോട് തിരികെ അതു തന്നെ പ്രവർത്തിക്കുമ്പോൾ
ഇരുവരും ഒരു പോലെയുള്ളവർ തന്നെയാകുന്നു.”

വൈരാഗ്യത്തോടെയുള്ള ചിന്തകളിൽ നിന്നും ഉരുത്തിരിയുന്ന വാക്കുകൾപോലും അരുത് എന്ന് സുഭാഷിതങ്ങളിലെ ഈ വചനങ്ങൾ ഓർമ്മിപ്പിക്കുന്നു.

തെറ്റുചെയ്തവനുള്ള ശിക്ഷ അതേനാണയത്തിൽ തിരികെനൽകുക എന്നത് ചരിത്രത്തിലെ ആദ്യത്തെ എഴുതപ്പെട്ട നിയമസംഹിത എന്നറിയപ്പെടുന്ന, വൈവിദ്ധ്യമായ നിയമങ്ങളുള്ള അതോടൊപ്പം ഏറെ വൈരുദ്ധ്യങ്ങൾ നിറഞ്ഞ, ഹമ്മുറാബിയുടെ നിയമസംഹിതയിലുണ്ട്.(Code of Hammurabi – 1755-1750 BC)

ക്രിസ്തുവിനു മുൻപ് പതിനെട്ടാംനൂറ്റാണ്ടിൽ പുരാതന ബാബിലോണിലെ ആറാമത്തെ രാജാവായിരുന്ന ഹമ്മുറാബിയാണ് ഈ നിയമസംഹിത രൂപപ്പെടുത്തിയത്.

ഏഴടി നാലിഞ്ച് ഉയരമുള്ള ശിലയിൽ അക്കേദിയൻ ഭാഷയുടെ ക്യൂണിഫോം ലിപിയിലാണ് നിയമാവലിയുടെ രചന. 282 നിയമങ്ങൾ ഉള്ള നിയമസംഹിതയിലെ ചില വ്യവസ്ഥകൾ ഇങ്ങനെ

✍️ ” മുലയൂട്ടി വളർത്താനായി മാതാപിതാക്കളിൽ നിന്ന് ഏറ്റെടുത്ത കുഞ്ഞ് തന്റെ കൈവശം മരിച്ചെന്നിരിക്കെ, മറ്റൊരു കുഞ്ഞിനെ കണ്ടെത്തി മരിച്ചുപോയ കുട്ടിയാണെന്ന നാട്യത്തിൽ വളർത്തിയവളുടെ മുലകൾ അരിഞ്ഞുകളയണം.”

✍️ “ഒരാളുടെ ആൺകുട്ടിയെ അപഹരിക്കുന്നവന് വധശിക്ഷ നൽകണം.”

✍️ ” ഗർഭിണിയെ ആരെങ്കിലും തല്ലിയതിന്റെ ഫലമായി ഗർഭം അലസിയാൽ, തല്ലിയവന്‍റെ മകളെ കൊല്ലണം.”

✍️ ” ഒരാള്‍ മറ്റൊരാളുടെ പശുവിനെ കൊന്നാല്‍, കുറ്റവാളിയുടെ പശുവിനെ തിരിച്ചും കൊല്ലണം.”

✍️ ” ഒരാളുടെ മകളെ മറ്റൊരാള്‍ കൊന്നാല്‍ കൊന്നയാളുടെ മകളെ കൊല്ലുക.”

✍️ “കളവു നടത്തിയാല്‍ അതിനു മരണ ശിക്ഷ.”

✍️ “കണ്ണിനു കണ്ണ്, മൂക്കിന് മൂക്ക് ”

വായനയിൽ ചില നിയമങ്ങൾ അപ്രകാരം വേണമെന്നും ചിലതെല്ലാം പ്രായോഗികമല്ലെന്നും തോന്നാമെങ്കിലും ബാബിലോണിൽ നടപ്പിലാക്കിയിരുന്ന നിയമങ്ങൾ തന്നെയായിരുന്നു ഇതെല്ലാം..!

യേശുക്രിസ്തുവിൻ്റെ കാലത്ത് ഇസ്രായേൽ ജനത അനുവർത്തിച്ചു പോന്ന ഇപ്രകാരമുള്ള നിയമങ്ങളെക്കുറിച്ച് ക്രിസ്തു പറഞ്ഞ വാക്കുകൾ ഇപ്രകാരമാണ്..

☘️ “‘കണ്ണിനു പകരം കണ്ണ്‌, പല്ലിനു പകരം പല്ല്‌’ എന്നു പറഞ്ഞി​ട്ടു​ള്ളതു നിങ്ങൾ കേട്ടിട്ടുണ്ടല്ലോ. എന്നാൽ ഞാൻ നിങ്ങ​ളോ​ടു പറയുന്നു: ദുഷ്ട​നോട്‌ എതിർത്തു​നിൽക്ക​രുത്‌; നിന്റെ വലത്തെ കവിളിൽ അടിക്കു​ന്ന​വനു മറ്റേ കവിളും കാണി​ച്ചു​കൊടുക്കുക.”

സ്നേഹത്തിൻ്റേയും ക്ഷമയുടേയും പുതിയ പാഠങ്ങൾ നൽകിയ ക്രിസ്തു, സ്വന്തം ജീവിതത്തിൽ അത് പ്രാവർത്തികമാക്കി. മഹാത്മാ ഗാന്ധി അത് പകർത്തുകയും നമുക്കു കാണിച്ചു തരികയും ചെയ്തു.

പ്രായോഗികതയ്ക്കപ്പുറം മനുഷ്യഹൃദയങ്ങളിലെ പ്രതികാര ദാഹത്തിന് അല്പമെങ്കിലും മാറ്റമുണ്ടാക്കാൻ ക്രിസ്തുവിൻ്റെ ഈ വചനങ്ങൾ മുഖാന്തരമായി..

☘️”തെറ്റിനെതിരെ പ്രതികരിക്കരുത് എന്നല്ല, പ്രതികാരം ചെയ്യുന്നതിൽ നിന്ന് അകന്നിരിക്കുക എന്ന ചിന്തയാണ് വേണ്ടത്..”

പ്രസക്തമായ ഈ ഉദ്ധരണി എത്രയോ പ്രസക്തവും പ്രായോഗികവുമാണ്.

🌺 ” എന്നോടു പ്രവര്‍ത്തിച്ചതുപോലെ ഞാന്‍ അവനോടും പ്രവര്‍ത്തിക്കും,അവന്‍ ചെയ്‌തതിനു ഞാന്‍ പകരം ചെയ്യും എന്നു നീ പറയരുത്‌.”

എന്ന ബൈബിൾ വചനം ഈ പൊൻപുലരിയിൽ ഹൃദിസ്ഥമാക്കാം.. പ്രാവർത്തികമാക്കാൻ പരിശ്രമിക്കാം…

എല്ലാ സൗഹൃദങ്ങൾക്കും സ്നേഹപൂർവ്വം ശുഭദിനം ആശംസിക്കുന്നു.. 💚🙏

ബൈജു തെക്കുംപുറത്ത്✍