🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 30 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

യാത്രകൾ എപ്പോഴും മുന്നൊരുക്കത്തോടെ ആയിരിക്കട്ടെ
——————————————————————————————-

രാത്രി യാത്രയിലായിരുന്നു രണ്ടു പേർ. ഒരാളുടെ കയ്യിൽ വിളക്കുണ്ടായിരുന്നു. മറ്റേയാളും ആ വെളിച്ചത്തിലായിരുന്നു സഞ്ചരിച്ചിരുന്നത്. ഒരു കവലയിലെത്തിയപ്പോൾ, വിളക്കുള്ളയാൾ വഴിപിരിഞ്ഞു. അതോടെ, അവിടം മുഴുവൻ അന്ധകാരാവൃതമായി. വിളക്കില്ലാതിരുന്നയാൾ, എന്തു ചെയ്യണമെന്നറിയാതെ, അലങ്കാപ്പിലായി.
“ഞാനെന്തു കൊണ്ടാണു വിളക്കെടുക്കാൻ മറന്നത്; വെളിച്ചമില്ലാതെ, രാത്രിയാത്ര ദുഷ്ക്കരമായിരിക്കുമെന്നു ചിന്തിക്കാഞ്ഞതെന്താണ് “, അയാൾ സ്വയം ശപിച്ചു.

ഉദയസൂര്യനേക്കണ്ടുണരുമ്പോൾ, അസ്തമയ സൂര്യൻ അകലെയല്ല എന്നുകൂടി ഓർക്കണം. ക്ഷണിക സന്തോഷത്തിലും, സൗന്ദര്യത്തിലും മതിമറന്നു ജീവിക്കുന്നവർ, മുന്നൊരുക്കങ്ങൾ ചെയ്യുവാൻ മറന്നു പോയേക്കാം? സഞ്ചരിക്കേണ്ട വഴിയേക്കുറിച്ചോ, സമയത്തേക്കുറിച്ചോ ധാരണയില്ലാത്തവർ, പാതി വഴിയിൽ യാത്ര അവസാനിപ്പിക്കേണ്ടിയും വന്നേക്കാം?

ഓരോ യാത്രയിലും രൂപപ്പെടാവുന്ന, ആകസ്മികതയും അപകട സാദ്ധ്യതകളും മുമ്പിൽക്കണ്ടു വേണം, യാത്ര ആരംഭിക്കുവാൻ. എന്തിനേയും ഏതിനേയും നേരിടാൻ, മനസ്സും ശരീരവും സജ്ജീകരിക്കുന്നവർക്കുള്ളതാണു, പുതിയ വഴികളും, വേറിട്ട യാത്രകളും. സന്നദ്ധത മാത്രമല്ല, സന്നാഹം കുടിയുണ്ടെങ്കിലേ, സഞ്ചാരം സുഗമമാകുകയുള്ളു.

ഒരു കാര്യം അത്യന്താപേക്ഷിതമാണെന്നറിഞ്ഞിട്ടും, അതു കരുതാതെയിരിക്കുന്നവർ, വിഡ്ഢികളാണ്. എത്ര കാലം, അപരൻ്റ വെളിച്ച
ത്തിൻ ഒരാൾക്കു യാത്ര ചെയ്യനാകും? സഹചാരി അപ്രത്യക്ഷനാകുമ്പോൾ, അവസാനിപ്പിക്കേണ്ടതല്ല, ആരുടെയും ജീവിത യാത്രകൾ. അമിത ആശ്രയത്വം ശീലിക്കുന്നവരെല്ലാം, അവസാനം അന്ധകാരത്തിൽ തപ്പിത്തടയേണ്ടി വരും? തനതു വീര്യവും മുന്നൊരുക്കവും ള്ളവർക്കു മാത്രമേ, സ്വന്തം യാത്രകൾ വിജയകരമായി പൂർത്തീകരിക്കാനാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര