🌹 “ഇന്നത്തെ ചിന്താവിഷയം” 🌹 – 2024 | നവംബർ 07 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

അടിത്തറ ഇളകിയാലും
ആകാശം ലക്ഷ്യമാക്കി പറന്നുയരാൻ ആകണം
————————————————————————————

ഒരു കിളി, ഒരു മരച്ചില്ലയിൽ വന്നിരുന്നു. മരം കിളിയോടു പറഞ്ഞു: “നീ ഇവിടെ ഇരിക്കുന്നതപകടമാണ്. ചില്ലയൊടിഞ്ഞാൽ നീ താഴെ വീഴും”. കിളി പറഞ്ഞു: “സാരമില്ല, ഞാൻ പറന്നു പൊയ്ക്കൊള്ളാം”. മരം പിന്നേയും പറഞ്ഞു: ”അപ്രതീക്ഷിതമായി ചില്ലയൊടിഞ്ഞാൽ, നിനക്കു ബാലൻസ് തെറ്റും. താഴെ, വാ പിളർന്നു കാത്തിരിക്കുന്ന പെരുമ്പാമ്പിനു നീ ആഹാരമാകും”. കിളി
പിന്നേയും പറഞ്ഞു: “ഇല്ല, ഞാൻ ഉയർന്നു പറക്കും; എനിക്കൊന്നും സംഭവിക്കുകയില്ല”. ഒന്നു പരീക്ഷിക്കുവാൻ തീരുമാനിച്ച മരം, തൻ്റെ ചില്ലയൊടിച്ചു. കിളി പറന്നു പോയി. അതിന് ഒന്നും സംഭവിച്ചില്ല.

ആത്മവിശ്വാസമുള്ളവരൊക്കെ, തൻ്റേടികളും, കുറച്ചൊക്കെ നിഷേധികളും ആയിരിക്കാനാണു സാദ്ധ്യത. അവർക്കു സ്വന്തം കഴിവിൽ വിശ്വാസമുണ്ടായിരിക്കും. അവർ അപായ സാദ്ധ്യതകളെ ഭയപ്പെടാറില്ല. ഒരാളുടെ ആത്മവിശ്വാസം എത്രത്തോളമുണ്ട്, എന്നതിനെ ആശ്രയിച്ചാണ് അയാളുടെ നിലയും, നിലപാടുകളും നിശ്ചയിക്കപ്പെടുക. ആത്മവിശ്വാസമില്ലാത്തവർ, അന്യരുടെ ഉപദേശങ്ങൾക്കും, നാട്ടുനടപ്പിനും അനുസരിച്ചു മാത്രം ജീവിക്കേണ്ടി വരും. തനിമ അനുസരിച്ചു ജീവിക്കുന്നതിനു വിഘാതമാകുന്ന ഒരു പ്രേരണയും, ഉയരങ്ങളിലേക്കും, ദൂരങ്ങളിലേക്കുമുള്ള യാത്രയ്ക്ക് സഹായകമാകില്ല.

ഓരോ നിർദ്ദേശവും, അതു നൽകുന്നവരുടെ അറിവുകളുടെയും, അനുഭവങ്ങളുടെയും പരാധിയ്ക്കുള്ളിൽ നിന്നുമാകും രൂപപ്പെടുക. വിമാനം പറന്നുയരുന്നത് റൺവേയിൽ നിന്നുമാണ്, ഇടവഴികളിൽ നിന്നുമല്ല. സഹവാസം സഹാനുഭൂതിയുള്ളവരുടെ കൂടെയായാൽ, താങ്ങും തണലും ലഭിക്കും. പുതുവഴികൾ തേടുന്നവരുടെ കൂടെയായാൽ, എതിർപ്പിനെ അതിജീവിക്കാനുള്ള കരുത്തു ലഭിക്കും.

ചിറകിൻ്റെ ബലമറിയണമെങ്കിൽ, ചില്ലകൾ ഒടിയണം. സ്വന്തം ആശ്രയസങ്കേതങ്ങളുടെ അതിർ വരമ്പുകൾ ഭേദിക്കാൻ തൻ്റേടമുള്ളവർ, അപൂർവ്വമായിരിക്കും. ഒരു സാഹസത്തിനും പ്രേരണ നൽകാത്ത സങ്കേതങ്ങളാണ് അബലരേയും, അല്പ പ്രാണികളേയും സൃഷ്ടിക്കുക. മറ്റുള്ളവരെ ആശ്രയിച്ചു മാത്രം ശീലിച്ചവർക്ക്, അപ്രതീക്ഷിതമായതിനെ അഭിമുഖീകരിക്കുവാൻ ത്രാണിയുണ്ടാകില്ല. ആത്മവിശ്വാസമുള്ളവർ, അടിത്തറയിളകിയാലും ആകാശം ലക്ഷ്യമാക്കി പറന്നുയരും; ജീവിതയാത്ര തുടരും..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര