🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 10 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അർഹതയുള്ളവർ നേതാക്കളാകട്ടെ
———————————————————–

കാട്ടിൽ മൃഗങ്ങളെല്ലാം ഒത്തുകൂടി. എല്ലാവർക്കും അവരവരുടെ കഴിവുകൾ പ്രദർശിപ്പിക്കാനുള്ള അവസരമായിരുന്നു. ഒരു കുരങ്ങൻ മതിമറന്നു നൃത്തം ചെയ്തു. നൃത്തം എല്ലാവർക്കും രസിച്ചതോടെ അവർ കുരങ്ങനെ രാജാവായി തെരഞ്ഞെടുത്തു. കുരങ്ങൻ്റെ നടപ്പും ഭാവവുമെല്ലാം രാജഗമയിലായി. കുറക്കന് ഇതൊട്ടും സഹിച്ചില്ല. അവൻ ഒരു കെണിയുണ്ടാക്കി, അതിൽ കുറെ പഴങ്ങൾ വച്ച് കുരങ്ങനെ വിരുന്നിനു ക്ഷണിച്ചു. ഒന്നും ചിന്തിക്കാതെ പഴങ്ങളിൽ ചാടി വീണ കുരങ്ങൻ കെണിയിൽ പെട്ടു. കെണിയിൽക്കിടന്നു നിലവിളിച്ച കുരങ്ങനോടു കുറുക്കൻ ചോദിച്ചു: “ഈ ബുദ്ധിയും വച്ചു കൊണ്ട്, നീ എങ്ങനെയാണു നാടു ഭരിക്കുക?”

ആയിത്തീരുക എളുപ്പമാണ്. എന്നാൽ ആയിരിക്കുക വിഷമകരവും. എന്ത് ആയി തീർന്നു എന്നതിനേക്കാർ, ആ സ്ഥാനത്ത് എങ്ങനെ നിലനിൽക്കുന്നു, പ്രവർത്തിക്കുന്നു എന്നതാണ് പ്രസക്തം. സ്ഥാനമാനങ്ങൾ സ്വപ്ന ഭൂമിയാണ്. അധികാര ദണ്ഡിൻ്റെ ആലങ്കാരികതയും അജ്ഞാശക്തിയും ആരേയും ഭ്രമിപ്പിക്കും. അധികാരം അഹിക്കുന്നതു തെറ്റല്ല. പക്ഷെ, അതിനർഹത ഉണ്ടെന്നു കൂടി തെളിയിക്കണം. അധികാരത്തിലെത്തിയവർ തങ്ങളുടെ കസേരകൾ കൈയ്യേറ്റഭൂമിയല്ലെന്ന്, പ്രവൃത്തികളിലൂടെ സാക്ഷ്യപ്പെടുത്തുകയും വേണം.

ബലഹീനതകൾ ഉണ്ടാകുന്നത് ഒരു പോരായ്മയല്ല. പക്ഷെ, തിരുത്തലിനുള്ള
സാദ്ധ്യത പ്രയോജനപ്പെടുത്താനാകണം. പരമ്പരാഗതമല്ലാത്ത എല്ലാ നേതൃസ്ഥാനങ്ങളും, കഴിവിൻ്റെ അംഗീകാരമായി ലഭിക്കുന്നവയായിരിക്കണം. കോമാളികളുടെ രാജാവിനു പോലും, കോമാളിത്തം കാണിക്കുന്നതിനപ്പുറമുള്ള ചില ഗുണഗണങ്ങൾ ഉണ്ടായിരിക്കണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര