📱വാർത്തകൾ ഒറ്റനോട്ടത്തിൽ📱 – 2024 | സെപ്റ്റംബർ 08 | ഞായർ ✍ കപിൽ ശങ്കർ

🔹കെഎസ്ആര്‍ടിസി ബസിടിച്ച് തകര്‍ന്നുവീണ തൃശൂര്‍ ശക്തന്‍ ബസ് സ്റ്റാന്‍ഡിനടുത്തുള്ള ശക്തന്‍ തമ്പുരാന്റെ പ്രതിമ 2 മാസം കൊണ്ട് പുനര്‍നിര്‍മ്മിക്കുമെന്ന സര്‍ക്കാര്‍ ഉറപ്പ് പാലിക്കാത്തതില്‍ പ്രതിഷേധവുമായി സുരേഷ് ഗോപി. പ്രതിമ 14 ദിവസത്തിനകം സ്ഥാപിച്ചില്ലെങ്കില്‍ ശക്തന്റെ വെങ്കല പ്രതിമ താന്‍ പണിതു നല്‍കുമെന്ന് സ്ഥലം സന്ദര്‍ശിച്ച സുരേഷ് ഗോപി പറഞ്ഞു. അതേസമയം പ്രതിമയുടെ പണികള്‍ ഉടനെ തീര്‍ത്ത് പുനസ്ഥാപിക്കും എന്ന് തന്നെയാണ് സര്‍ക്കാര്‍ വൃത്തങ്ങള്‍ പറയുന്നത്.

🔹തിരുവനന്തപുരം വിമാനത്താവളത്തിലെ ഗ്രൗണ്ട് ഹാന്‍ഡലിംഗ് ഏജന്‍സിയിലെ ഒരു വിഭാഗം ജീവനക്കാര്‍ പണിമുടക്കില്‍. എയര്‍ ഇന്ത്യ സാറ്റ്സിലെ കരാര്‍ തൊളിലാളികളാണ് ഇന്നലെ രാത്രി മുതല്‍ പണിമുടക്കുന്നത്. ശമ്പള പരിഷ്‌കാരവും ബോണസും ആവശ്യപ്പെട്ടാണ് സമരം. സമരം വിമാനത്താവളത്തിലെ പ്രവര്‍ത്തനത്തെ താറുമാറാക്കിയിരിക്കുകയാണെന്നാണ് റിപ്പോര്‍ട്ടുകള്‍. രാത്രി തുടങ്ങിയ പ്രതിഷേധം തിരുവനന്തപുരം വിമാനത്താവളത്തിലെ സര്‍വീസുകളെയും യാത്രക്കാരെയും ബാധിച്ചുവെന്നും റിപ്പോര്‍ട്ടുകളുണ്ട്.

🔹കോഴിക്കോട്ടെ റിയല്‍ എസ്റ്റേറ്റ് വ്യാപാരി മാമി എന്നറിയപ്പെടുന്ന മുഹമ്മദ് ആട്ടൂരിനെ കാണാതായ സംഭവം അന്വേഷിക്കുന്നതിന് ക്രൈം ബ്രാഞ്ചിന്റെ പ്രത്യേക അന്വേഷണ സംഘത്തിന് രൂപം നല്‍കി. ക്രൈംബ്രാഞ്ച് കോഴിക്കോട് റേഞ്ച് ഐ.ജി. പി. പ്രകാശിന്റെ മേല്‍നോട്ടത്തിലാണ് അന്വേഷണം.

🔹തിരുവോണം ബംപര്‍ ഭാഗ്യക്കുറി ഇതുവരെ 23 ലക്ഷത്തിലധികം ടിക്കറ്റുകള്‍ വിറ്റുതീര്‍ന്നെന്ന് റിപ്പോര്‍ട്ടുകള്‍. 500 രൂപ വിലയുള്ള ടിക്കറ്റില്‍ 25 കോടി രൂപയുടെ ഒന്നാം സമ്മാനവും 1 കോടി രൂപ വീതം 20 പേര്‍ക്ക് രണ്ടാം സമ്മാനവും അടക്കം ആകര്‍ഷകമായ സമ്മാനങ്ങളാണ് ഭാഗ്യശാലികളെ കാത്തിരിക്കുന്നത്.

🔹മാനന്തവാടിയില്‍ കാണാതായ വയോധികയുടെ മൃതദേഹം ഉപയോഗ ശൂന്യമായ കിണറ്റില്‍ കണ്ടെത്തിയ സംഭവത്തില്‍ ഒരാള്‍ അറസ്റ്റില്‍. മാനന്തവാടി തേറ്റമല വിലങ്ങില്‍ മുഹമ്മദിന്റെ ഭാര്യ കുഞ്ഞാമിയുടെ (72) മൃതദേഹമാണ് കഴിഞ്ഞ ദിവസം കിണറ്റില്‍ കണ്ടെത്തിയത്. സംഭവവുമായി ബന്ധപ്പെട്ട് അയല്‍വാസി ചോലയില്‍ വീട്ടില്‍ ഹക്കീമിനെ (42) തൊണ്ടര്‍നാട് പോലീസ് അറസ്റ്റ് ചെയ്തു. സ്വര്‍ണാഭരണങ്ങള്‍ കവരാന്‍ കുഞ്ഞാമിയെ കഴുത്ത് ഞെരിച്ച് കൊലപ്പെടുത്തിയതാണെന്നാണ് പൊലീസ് നല്‍കുന്ന വിവരം.

🔹സാമ്പത്തിക പ്രതിസന്ധിയിലായ എജ്യുടെക് കമ്പനിയായ ബൈജൂസിന് കനത്ത പ്രഹരമായി 848 കോടി രൂപ നികുതി ഇനത്തില്‍ അടയ്ക്കണമെന്ന് ആവശ്യപ്പെട്ട് കേന്ദ്ര – കര്‍ണാടക നികുതി വകുപ്പുകള്‍. ബൈജൂസിന് കേന്ദ്ര സര്‍ക്കാരിന്റെ നികുതി വകുപ്പ് 157 കോടി രൂപ കുടിശ്ശിക ആവശ്യപ്പെട്ടാണ് നോട്ടീസ് നല്‍കിയിരിക്കുന്നത്. അതേസമയം ഇന്‍സോള്‍വന്‍സി ആന്‍ഡ് ബാങ്ക്റപ്സി ബോര്‍ഡ് ഓഫ് ഇന്ത്യ വെബ്സൈറ്റിലെ രേഖകള്‍ പ്രകാരം ബൈജൂസ് ആസ്ഥാനം സ്ഥിതി ചെയ്യുന്ന കര്‍ണാടക സംസ്ഥാനത്തിന്റെ നികുതി വകുപ്പ് കമ്പനിയോട് 691 കോടി രൂപയുടെ കുടിശ്ശിക അടയ്ക്കാന്‍ ആവശ്യപ്പെട്ടിട്ടുണ്ട് .

🔹കോയമ്പത്തൂരിലെ സര്‍ക്കാര്‍ സ്‌കൂളിലെ സൗജന്യ മെഡിക്കല്‍ ക്യാംപില്‍ ലൈംഗികാതിക്രമം നടത്തിയ ഡോക്ടര്‍ അറസ്റ്റില്‍.12 പെണ്‍കുട്ടികളുടെ പരാതിയിലാണ് 28കാരനായ ഡോക്ടറെ അറസ്റ്റ് ചെയ്തത്.

🔹ഉത്തര്‍ പ്രദേശില്‍ മൂന്നുനില കെട്ടിടം തകര്‍ന്നുവീണ് നാലുപേര്‍ക്ക് ദാരുണാന്ത്യം. 28 പേരെ രക്ഷപ്പെടുത്തി. ലഖ്‌നൗവിലെ ട്രാന്‍സ്‌പോര്‍ട്ട് നഗറില്‍ ഇന്നലെ വൈകുന്നേരമായിരുന്നു സംഭവം.

🔹കന്നഡ നടൻ ദർശൻ പ്രതിയായ രേണുകസ്വാമി കൊലപാതകക്കേസിലെ കൂടുതൽ വിവരങ്ങൾ പുറത്ത്. നടി പവിത്ര ഗൗഡയ്ക്ക് അശ്ലീല സന്ദേശം അയച്ചതിനെ തുടർന്ന് ഓട്ടോ ഡ്രൈവറായ രേണുകസ്വാമിയുടെ ജനനേന്ദ്രിയം അക്രമ സംഘം തകർത്തുവെന്നാണ് വിവരം. കൊലപാതകക്കേസിൽ പൊലീസ് കുറ്റപത്രം സമർപ്പിച്ചിരുന്നു. ഇതിലാണ് ഇക്കാര്യം പരാമർശിച്ചിരിക്കുന്നത്.
ഇൻസ്റ്റഗ്രാമിലൂടെ അടക്കമാണ് നടി പവിത്ര ഗൗഡയ്ക്ക് രേണുകസ്വാമി അശ്ലീല ചിത്രങ്ങൾ ഉൾപ്പടെയുള്ള സന്ദേശങ്ങൾ അയച്ചുകൊണ്ടിരുന്നത്. ഇക്കാര്യം പവിത്ര തന്റെ പവൻ എന്ന സുഹൃത്തിനെ അറിയിച്ചു. ശേഷം പവിത്രയുടെ അക്കൗണ്ടിൽ നിന്ന് പവനാണ് രേണുകസ്വാമിയുമായി ചാറ്റ് ചെയ്തത്. ഇതിനിടെ രേണുകയുടെ മേൽവിലാസം അടക്കം കൈക്കലാക്കി. ഈ വിവരം പിന്നീട് ദർശൻ ഫാൻസ്‌ അസോസിയേഷനിലെ അംഗംങ്ങളോട് പറഞ്ഞ് പിന്നീട് ചർച്ച ചെയ്താണ് കൊലപാതകം നടത്തിയത്.

🔹ഭക്ഷണം ഓര്‍ഡര്‍ ചെയ്യുന്ന ഉപയോക്താവിന്റെ സ്വകാര്യത സംരക്ഷിക്കുന്നതിനായി പുതിയ ഫീച്ചറുമായി ഫുഡ് ഡെലിവറി പ്ലാറ്റ്‌ഫോമായ സ്വിഗ്ഗി. മറ്റുള്ളവര്‍ കാണാതെ സ്വകാര്യമായി ഭക്ഷണം ഓര്‍ഡര്‍ ചെയ്യാന്‍ സഹായിക്കുന്ന ഇന്‍കോഗ്‌നിറ്റോ മോഡ് ഫീച്ചറാണ് സ്വിഗ്ഗി ഇന്‍സ്റ്റാമാര്‍ട്ടില്‍ അവതരിപ്പിച്ചത്. അക്കൗണ്ട് ഉപയോഗിക്കുന്നത് ഒന്നിലധികം പേരുണ്ടെങ്കിലാണ് ഇത് ഏറ്റവുമധികം പ്രയോജനം ചെയ്യുക.സ്വകാര്യത ഉറപ്പാക്കുന്നതിനാണ് പുതിയ ഫീച്ചര്‍. എല്ലാ ഓര്‍ഡറുകളും കുടുംബാംഗങ്ങളോ സുഹൃത്തുക്കളോ പങ്കാളികളോ കാണുന്നില്ലെന്ന് ഉറപ്പാക്കി സ്വകാര്യത സംരക്ഷിക്കുന്നതാണ് ഫീച്ചറിന്റെ പ്രത്യേകത. ഈ ഫീച്ചര്‍ നിലവില്‍ 10 ശതമാനം സ്വിഗ്ഗി ഉപയോക്താക്കള്‍ക്ക് ലഭ്യമാണ്. ഉടന്‍ തന്നെ എല്ലാ ഉപയോക്താക്കള്‍ക്കും ഇത് ലഭ്യമാക്കും.

🔹വാശിയേറിയ പോരാട്ടത്തില്‍ യുഎസ് ഓപ്പണ്‍ ടെന്നിസ് വനിതാ സിംഗിള്‍സ് കിരീടം സ്വന്തമാക്കി അരീന സബലേങ്ക. യുഎസിന്റെ ജെസിക്ക പെഗുലയായിരുന്നു എതിരാളി. ആര്‍തര്‍ ആഷ് സ്റ്റേഡിയത്തില്‍ നടന്ന കലാശപോരാട്ടത്തില്‍ രണ്ടു സെറ്റിലും പിന്നില്‍ നിന്ന ശേഷമാണ് സബലേങ്ക ശക്തമായ തിരിച്ചുവരവ് നടത്തിയത്. രണ്ടാം സെറ്റില്‍ 0-3 ന് മുന്നില്‍ നിന്ന ശേഷം 5-3എന്ന നിലയിലേക്ക് സെറ്റ് നഷ്ടപ്പെട്ട സെബലേങ്ക വന്‍ തിരിച്ചുവരവിലൂടെയാണ് ടൈ ബ്രേക്കറില്‍ കന്നി യുഎസ് ഓപ്പണ്‍ ടെന്നിസ് വനിതാ കിരീടത്തില്‍ മുത്തമിട്ടത്.കഴിഞ്ഞ വര്‍ഷം കയ്യകലെ നഷ്ടപ്പെട്ട കിരീടമാണ് ലോക രണ്ടാം നമ്പര്‍ താരമായ സബലേങ്ക ഇത്തവണ സ്വന്തമാക്കിയത്. ഓസ്‌ട്രേലിയന്‍ ഓപ്പണില്‍ തുടര്‍ച്ചയായ രണ്ടുവര്‍ഷം കിരീടം സ്വന്തമാക്കിയ ശേഷം സബലേങ്ക നേടുന്ന മൂന്നാം ഗ്രാന്‍സ്ലാം കിരീടമാണിത്.

🔹മമ്മൂട്ടിയെ നായകനാക്കി ഗൌതം വസുദേവ് മേനോന്‍ സംവിധാനം ചെയ്യുന്ന സിനിമയുടെ പേര് പ്രഖ്യാപിച്ചു. ‘ഡൊമിനിക് ആന്‍ഡ് ദി ലേഡീസ് പഴ്സ്’ എന്നാണ് ചിത്രത്തിന്റെ പേര്. ഫസ്റ്റ് ലുക്ക് പോസ്റ്ററിനൊപ്പമാണ് ടൈറ്റിലും പ്രഖ്യാപിച്ചിരിക്കുന്നത്. മമ്മൂട്ടിയുടെ പിറന്നാള്‍ ദിനത്തിലാണ് പേരും പോസ്റ്ററും എത്തിയിരിക്കുന്നത്. മമ്മൂട്ടി കമ്പനി നിര്‍മ്മിക്കുന്ന ആറാമത്തെ ചിത്രമാണ് ഇത്. നിഗൂഢത ഒളിപ്പിച്ചിരിക്കുന്നതാണ് പുറത്തെത്തിയ ഫസ്റ്റ് ലുക്ക് പോസ്റ്റര്‍. ഒരു പ്രൈവറ്റ് ഡിറ്റക്റ്റീവിനെ, ഷെര്‍ലക് ഹോംസുമായി സമാനതകളുള്ള എന്നാല്‍ രസകരമായ ഒരു കഥാപാത്രത്തെയാണ് മമ്മൂട്ടി അവതരിപ്പിക്കുന്നതെന്ന് ചിത്രത്തിന്റെ തിരക്കഥാകൃത്തുക്കളില്‍ ഒരാളായ നീരജ് പറഞ്ഞിരുന്നു. പുറത്തെത്തിയിരിക്കുന്ന പോസ്റ്ററില്‍ ഒരു കുറ്റാന്വേഷകന്റെ മുറി പോലെ തോന്നുന്ന ഇടത്താണ് മമ്മൂട്ടിയുടെ നായക കഥാപാത്രത്തെ പ്ലേസ് ചെയ്തിരിക്കുന്നത്. ഒപ്പം ഒരു പൂച്ചയുമുണ്ട്. വിനീത്, ഗോകുല്‍ സുരേഷ്, ലെന, സിദ്ദിഖ്, വിജി വെങ്കിടേഷ്, വിജയ് ബാബു തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്.

🔹ജീത്തു ജോസഫിന്റെ സംവിധാനത്തില്‍ ബേസില്‍ ജോസഫ് നായകനായി എത്തിയ ‘നുണക്കുഴി’യുടെ ഒടിടി റിലീസ് പ്രഖ്യാപിച്ചു. ഓഗസ്റ്റ് 15 ന് തിയറ്ററുകളില്‍ എത്തിയ ചിത്രമാണിത്. ത്രില്ലര്‍ ചിത്രങ്ങളിലൂടെ മലയാളി സിനിമാപ്രേമികളുടെ മനസില്‍ ഇടം നേടിയ ജീത്തു ജോസഫ് സംവിധാനം ചെയ്ത കോമഡി ഡ്രാമയാണ് നുണക്കുഴി. നിഖില വിമലും ഗ്രേസ് ആന്റണിയുമാണ് മറ്റ് രണ്ട് ശ്രദ്ധേയ കഥാപാത്രങ്ങളെ അവതരിപ്പിച്ചിരിക്കുന്നത്. പ്രമുഖ പ്ലാറ്റ്ഫോം ആയ സീ 5 ലൂടെയാണ് ചിത്രം ഒടിടി സ്ട്രീമിംഗ് ആരംഭിക്കുന്നത്. ഓണം റിലീസ് ആയി സെപ്റ്റംബര്‍ 13 ന് ചിത്രം എത്തും. കെ ആര്‍ കൃഷ്ണകുമാറാണ് നുണക്കുഴിയുടെ തിരക്കഥ രചിച്ചിരിക്കുന്നത്. സിദ്ദിഖ്, മനോജ് കെ ജയന്‍, ബൈജു സന്തോഷ്, അജു വര്‍ഗീസ്, സൈജു കുറുപ്പ്, അല്‍ത്താഫ് സലിം, ലെന, സ്വാസിക, ബിനു പപ്പു, അസീസ് നെടുമങ്ങാട്, സെല്‍വരാജ്, ശ്യാം മോഹന്‍, ദിനേശ് പ്രഭാകര്‍, കലാഭവന്‍ യുസഫ്, രാജേഷ് പറവൂര്‍, റിയാസ് നര്‍മ്മകല, അരുണ്‍ പുനലൂര്‍, ശ്യാം തൃക്കുന്നപുഴ, സന്തോഷ് ലക്ഷ്മണന്‍, കലാഭവന്‍ ജിന്റോ, സുന്ദര്‍ നായക് തുടങ്ങിയവരാണ് ചിത്രത്തിലെ വിവിധ കഥാപാത്രങ്ങളെ അവതരിപ്പിച്ചിരിക്കുന്നത്.

തയ്യാറാക്കിയത്:
കപിൽ ശങ്കർ