🎬📽🎥സിനിമ ലോകം🎬📽🎥 ✍സജു വർഗീസ് (ലെൻസ്മാൻ)

മോഹന്‍ലാല്‍ ആരാധകര്‍ ഏറെ പ്രതീക്ഷയോടെ കാത്തിരിക്കുന്ന ‘ബറോസി’ന്റെ ട്രെയ്‌ലര്‍

മോഹന്‍ലാല്‍ ആരാധകര്‍ ഇപ്പോള്‍ ഏറെ പ്രതീക്ഷയോടെ കാത്തിരിക്കുന്ന ‘ബറോസി’ന്റെ ട്രെയ്‌ലര്‍ പുറത്തുവിട്ടു അണിയറപ്രവര്‍ത്തകര്‍. തന്റെ 40 വര്‍ഷത്തെ സിനിമാജീവിതത്തില്‍ മോഹന്‍ലാല്‍ ആദ്യമായി സംവിധായകകുപ്പായമണിയുന്നു എന്നതാണ് ബറോസിന്റെ ഏറ്റവും വലിയ പ്രത്യേകത. ത്രി ഡിയില്‍ റിലീസ് ചെയ്യുന്ന ചിത്രം ഡിസംബര്‍ 25 ന് തിയേറ്ററിലെത്തും. കുട്ടികള്‍ക്കും മുതിര്‍ന്നവര്‍ക്കും ഒരുപോലെ ഇഷ്ടപ്പെടാന്‍ പറ്റുന്ന ചിത്രമായിരിക്കും ബറോസ് എന്നാണ് മോഹന്‍ലാല്‍ പറഞ്ഞത്. വാസ്‌കോഡ ഗാമയുടെ നിധി സൂക്ഷിപ്പുകാരനായ ബറോസ് എന്ന ഭൂതത്തിന്റെ കഥയാണ് സിനിമയുടെ പ്രമേയം. മൈ ഡിയര്‍ കുട്ടിച്ചാത്തന്റെ സംവിധായകന്‍ ജിജോ പുന്നൂസാണ് തിരക്കഥ രചിച്ചിരിക്കുന്നത്. ഒരു ഹോളിവുഡ് ടച്ച് ഫീല്‍ ചെയ്യുന്ന ട്രെയ്‌ലര്‍ ഇപ്പോള്‍ തന്നെ ആരാധകര്‍ ഏറ്റെടുത്ത് കഴിഞ്ഞു. ക്രിസ്തുമസ് കാലവും അവധിയും എന്നതിനേക്കാള്‍ ഉപരി മോഹന്‍ലാലിനെ സംബന്ധിച്ച് മറ്റൊരു പ്രത്യേകതയും അന്നത്തെ ദിവസത്തിനുണ്ട്. മോഹന്‍ലാലിന്റെ ആദ്യ ചിത്രം മഞ്ഞില്‍ വിരിഞ്ഞ പൂക്കളും, കരിയറിലെ ഹിറ്റ് ചിത്രങ്ങളില്‍ ഒന്നായ മണിച്ചിത്രത്താഴ് റിലീസ് ആയതും ഇതുപോലെ ഒരു ഡിസംബര്‍ 25 നാണ്.

പി സേതു രാജന്‍ തിരക്കഥയെഴുതി സംവിധാനം ചെയ്യുന്ന
‘എന്റെ പ്രിയതമന്’

മിഥുന്‍ മദന്‍, ദാലി കരണ്‍, ഗൗരി കൃഷ്ണ, മൈഥിലി എന്നീ പുതുമുഖ താരങ്ങളെ പ്രധാന കഥാപാത്രങ്ങളാക്കി പി സേതു രാജന്‍ തിരക്കഥയെഴുതി സംവിധാനം ചെയ്യുന്ന ‘എന്റെ പ്രിയതമന്’ എന്ന ചിത്രം നവംബര്‍ 29 ന് പ്രദര്‍ശനത്തിനെത്തുന്നു. ചിത്രവര്‍ണ്ണ ഫിലിംസിന്റെ ബാനറില്‍ ആര്‍ രഞ്ജി നിര്‍മ്മിക്കുന്ന ഈ റൊമാന്റിക് മ്യൂസിക് ചിത്രത്തില്‍ ഇന്ദ്രന്‍സ്, സുധീഷ്, മധുപാല്‍, പി ശ്രീകുമാര്‍, പ്രേംകുമാര്‍, കൊച്ചുപ്രേമന്‍, ശിവജി ഗുരുവായൂര്‍, റിസബാവ, അനു, കെ പി എ സി ലളിത, അംബിക മോഹന്‍, ബേബി നയന തുടങ്ങിയ പ്രമുഖര്‍ അഭിനയിക്കുന്നു. രാജു വാര്യര്‍ ഛായാഗ്രഹണം നിര്‍വ്വഹിക്കുന്നു ഡോ. എം ജെ സദാശിവന്‍ എഴുതിയ വരികള്‍ക്ക് ആല്‍ബര്‍ട്ട് വിജയന്‍ സംഗീതം പകരുന്നു. കെ ജെ യേശുദാസ്, ജാനകി, കെ എസ് ചിത്ര എന്നിവരാണ് ഗായകര്‍.

ഉണ്ണിമായ സിസിലി എന്ന കഥാപാത്രമായെത്തുന്ന
‘റൈഫിള്‍ ക്ലബ്ബ് ‘

ഒട്ടേറെ സിനിമകളില്‍ ശ്രദ്ധേയ വേഷങ്ങളിലെത്തി ശ്രദ്ധ നേടിയ ഉണ്ണിമായ കരിയറില്‍ താന്‍ ഇതുവരെ ചെയ്യാത്ത രീതിയിലുള്ളൊരു കഥാപാത്രമായി എത്താനൊരുങ്ങുകയാണ്. ആഷിഖ് അബുവിന്റെ പുതിയ ചിത്രമായ ‘റൈഫിള്‍ ക്ലബ്ബാ’ണ് ആ ചിത്രം. സിസിലി എന്ന കഥാപാത്രമായെത്തുന്ന ഉണ്ണിമായയുടെ പുത്തന്‍ ക്യാരക്ടര്‍ പോസ്റ്റര്‍ പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. സിനിമയുടെ ഛായാഗ്രഹണവും ആഷിക്ക് അബു തന്നെയാണ് നിര്‍വഹിക്കുന്നത്. വിജയരാഘവന്‍, റാഫി, വിനീത് കുമാര്‍, സുരേഷ് കൃഷ്ണ, ഹനുമാന്‍കൈന്‍ഡ്, സെന്ന ഹെഗ്‌ഡെ, വിഷ്ണു അഗസ്ത്യ, ദര്‍ശന രാജേന്ദ്രന്‍, ഉണ്ണിമായ പ്രസാദ്, സുരഭി ലക്ഷ്മി, പ്രശാന്ത് മുരളി, നടേഷ് ഹെഗ്‌ഡെ, പൊന്നമ്മ ബാബു, രാമു, വൈശാഖ് ശങ്കര്‍, നിയാസ് മുസലിയാര്‍, റംസാന്‍ മുഹമ്മദ്, നവനി ദേവാനന്ദ്, പരിമള്‍ ഷായ്സ്, സജീവ് കുമാര്‍, കിരണ്‍ പീതാംബരന്‍, ഉണ്ണി മുട്ടത്ത്, ബിബിന്‍ പെരുമ്പിള്ളി, ചിലമ്പന്‍, ഇന്ത്യന്‍ എന്നിവരടക്കമുള്ള വന്‍ താരനിരയാണ് ഈ ചിത്രത്തില്‍ അണിനിരക്കുന്നത്. റൈഫിള്‍ ക്ലബ്ബിന്റെ തിരക്കഥയും സംഭാഷണവും ഒരുക്കിയിരിക്കുന്നത് ദിലീഷ് നായര്‍, ശ്യാം പുഷ്‌കരന്‍, ഷറഫു, സുഹാസ് എന്നിവര്‍ ചേര്‍ന്നാണ്.

ധ്യാന്‍ ശ്രീനിവാസനെ നായകനാകുന്ന
‘ഐഡി’ ചിത്രത്തിന്റെ ടീസര്‍

എസ്സാ എന്റര്‍ടെയ്ന്‍മെന്റ്‌സിന്റെ ബാനറില്‍ മുഹമ്മദ് കുട്ടി നിര്‍മ്മിച്ച്, ധ്യാന്‍ ശ്രീനിവാസനെ നായകനാക്കി നവാഗതനായ അരുണ്‍ ശിവവിലാസം തിരക്കഥയെഴുതി സംവിധാനം ചെയ്യുന്ന പുതിയ ചിത്രമാണ് ‘ഐഡി’. ചിത്രത്തിന്റെ ടീസര്‍ പുറത്തുവിട്ടു. ‘ദി ഫേക്ക്’ എന്ന ടാഗ് ലൈനില്‍ വരുന്ന ചിത്രത്തില്‍ ദിവ്യ പിള്ളയാണ് നായിക. ഇന്ദ്രന്‍സ്, ഷാലു റഹിം എന്നിവരും ചിത്രത്തില്‍ കേന്ദ്ര കഥാപാത്രങ്ങളാവുന്നു. കലാഭവന്‍ ഷാജോണ്‍, ജോണി ആന്റണി, ജയകൃഷ്ണന്‍, പ്രശാന്ത് അലക്‌സാണ്ടര്‍, പ്രമോദ് വെളിയനാട്, ഉല്ലാസ് പന്തളം, ഉണ്ണി നായര്‍, സ്മിനു സിജോ, മനോഹരിയമ്മ, ജസ്ന്യ ജഗദീഷ്, ബേബി, ഷൈനി സാറ തുടങ്ങിയ താരനിരയും ചിത്രത്തില്‍ അണിനിരക്കുന്നു. തന്ത്ര മീഡിയ റിലീസ് ആണ് ചിത്രം കേരളത്തില്‍ റിലീസ് ചെയ്യുന്നത്.

സൗബിന്‍ ഷാഹിര്‍, നവ്യ നായര്‍ എന്നിവര്‍
കേന്ദ്ര കഥാപാത്രങ്ങളായെത്തുന്ന ‘പാതിരാത്രി’

പ്രേക്ഷക – നിരൂപക പ്രശംസ നേടിയ മമ്മൂട്ടി ചിത്രം പുഴുവിന് ശേഷം രതീന പി ടി സംവിധാനം ചെയ്യുന്ന ‘പാതിരാത്രി’ എന്ന സിനിമയുടെ ചിത്രീകരണം എറണാകുളത്ത് പൂര്‍ത്തിയായി. സൗബിന്‍ ഷാഹിര്‍, നവ്യ നായര്‍ എന്നിവര്‍ കേന്ദ്ര കഥാപാത്രങ്ങളായെത്തുന്ന ചിത്രം രണ്ട് പോലീസുകാരുടെ ജീവിതം പറയുന്നു. ഭ്രമയുഗത്തിനു ശേഷം ഷഹനാദ് ജലാല്‍ ക്യാമറ ചലിപ്പിക്കുന്ന ചിത്രമെന്ന പ്രത്യേകതയും ഈ ചിത്രനുണ്ട്. ഇലവീഴാപൂഞ്ചിറക്ക് ശേഷം ഷാജി മാറാട് രചന നിര്‍വഹിക്കുന്നു. ബെന്‍സി പ്രൊഡക്ഷന്‍സിന്റെ ബാനറില്‍ കെ വി അബ്ദുള്‍ നാസറാണ് ചിത്രം നിര്‍മ്മിക്കുന്നത്. ആന്‍ അഗസ്റ്റിന്‍, ആത്മീയ, സണ്ണി വെയ്ന്‍, ശബരീഷ് വര്‍മ്മ, ഹരിശ്രീ അശോകന്‍, ഇന്ദ്രന്‍സ്, സോഹന്‍ സീനുലാല്‍ എന്നിവര്‍ക്കൊപ്പം കന്നഡ പ്രമുഖ കന്നഡ നടന്‍ അച്യുത് കുമാര്‍ ആദ്യമായി മലയാളത്തില്‍ എത്തുന്നു എന്ന പ്രത്യേകതയും ചിത്രത്തിനുണ്ട്.

ലിസ്റ്റിന്‍ സ്റ്റീഫന്റെ മാജിക് ഫ്രയ്മ്സും
സുരാജിന്റെ വിലാസിനി സിനിമാസും ചേര്‍ന്ന് നിര്‍മ്മിക്കുന്ന
‘ഇ.ഡി (എക്സ്ട്രാ ഡീസന്റ്)’

പ്രമുഖ നിര്‍മ്മാതാവായ ലിസ്റ്റിന്‍ സ്റ്റീഫന്റെ മാജിക് ഫ്രയ്മ്സും സുരാജിന്റെ വിലാസിനി സിനിമാസും ചേര്‍ന്ന് നിര്‍മ്മിക്കുന്ന ‘ഇ.ഡി(എക്സ്ട്രാ ഡീസന്റ്)’ ഡിസംബര്‍ 20ന് തിയേറ്ററുകളിലേക്കെത്തും. ഡാര്‍ക്ക് ഹ്യൂമര്‍ ജോണറിലൊരുങ്ങുന്ന ഇ ഡി സംവിധാനം ചെയ്തിരിക്കുന്നത് ആമിര്‍ പള്ളിക്കല്‍ ആണ്. ആഷിഫ് കക്കോടിയാണ് ചിത്രത്തിന്റെ രചന നിര്‍വഹിക്കുന്നത്. സുരാജ് വെഞ്ഞാറമൂട്, ഗ്രേയ്സ് ആന്റണി, വിനയപ്രസാദ്, റാഫി, സുധീര്‍ കരമന, ശ്യാം മോഹന്‍, ദില്‍ന പ്രശാന്ത് അലക്‌സാണ്ടര്‍, ഷാജു ശ്രീധര്‍,സജിന്‍ ചെറുകയില്‍,വിനീത് തട്ടില്‍ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മൂകാംബികാ,പാലക്കാട്, കൊച്ചി എന്നിവിടങ്ങളിലാണ് ഇ ഡിയുടെ ചിത്രീകരണം നടന്നത്.

കെജിഎഫ് സ്റ്റുഡിയോ ആദ്യമായി നിര്‍മിക്കുന്ന
‘കുട്ടപ്പന്റെ വോട്ട്’

ഒരു കൂട്ടം നല്ല സിനിമകളുടെ പിന്നണിയില്‍ പ്രവര്‍ത്തിച്ച കെജിഎഫ് സ്റ്റുഡിയോ ആദ്യമായി നിര്‍മിക്കുന്ന ചിത്രമാണ് ‘കുട്ടപ്പന്റെ വോട്ട്’. ചിത്രത്തിന്റെ ടൈറ്റില്‍ പോസ്റ്റര്‍ പ്രശസ്ത താരങ്ങളുടെ സോഷ്യല്‍ മീഡിയ പേജുകളിലൂടെ റിലീസ് ചെയ്തു. മലയാളത്തിലെ പ്രമുഖ താരങ്ങളെ പ്രധാന കഥാപാത്രങ്ങളാക്കി അരുണ്‍ നിശ്ചല്‍ ടി തിരക്കഥ എഴുതി സംവിധാനം ചെയ്യുന്ന ഈ ചിത്രത്തിന്റെ ഛായാഗ്രഹണം ഷാന്‍ ദേവു നിര്‍വ്വഹിക്കുന്നു. സമൂഹത്തില്‍ ഒറ്റപെട്ടു പോയ കുട്ടപ്പന്റെ പ്രതികാരത്തിന്റെ കഥപറയുന്ന കുട്ടപ്പന്റെ വോട്ട് സമൂഹത്തിനോടുള്ള വലിയൊരു ചോദ്യമാണ്. സുധാംശു എഴുതിയ വരികള്‍ക്ക് സുരേഷ് നന്ദന്‍ സംഗീതം പകരുന്നു. എറണാകുളം, കണ്ണൂര്‍ എന്നിവിടങ്ങളിലായി ഉടന്‍ ചിത്രീകരണം ആരംഭിക്കുന്ന കുട്ടപ്പന്റെ വോട്ട് 2025 ഏപ്രില്‍ ആദ്യം റിലീസിനെത്തും.

ശ്രീനാഥ് ഭാസി നായകനാകുന്ന ‘പൊങ്കാല

ശ്രീനാഥ് ഭാസി നായകനാകുന്ന ‘പൊങ്കാല’യുടെ പുതിയ പോസ്റ്റര്‍ പുറത്ത്. നായിക യാമി സോനയ്‌ക്കൊപ്പം കടപ്പുറത്ത് നടന്നു നീങ്ങുന്ന ശ്രീനാഥ് ഭാസിയുടെ പോസ്റ്ററാണ് എത്തിയിരിക്കുന്നത്. എ ബി ബിനില്‍ കഥയും തിരക്കഥയും രചിച്ച് സംവിധാനം ചെയ്യുന്ന ചിത്രമാണ് പൊങ്കാല. ആക്ഷന്‍ കോമഡി ത്രില്ലര്‍ ശ്രേണിയില്‍ പെടുന്ന ചിത്രത്തിന്റെ ഷൂട്ടിംഗ് വൈപ്പിന്‍, ചെറായി ഭാഗങ്ങളായി പുരോഗമിക്കുന്നു. ഗ്ലോബല്‍ പിക്‌ചേഴ്‌സ് എന്റര്‍ടൈന്മെന്റ്, ദിയാ ക്രിയേഷന്‍ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. രണ്ടായിരം കാലഘട്ടത്തില്‍ വൈപ്പിന്‍ മുനമ്പം തീരദേശത്ത് നടന്ന ഒരു സംഭവ കഥയെ ആസ്പദമാക്കി പറയുന്ന ചിത്രമാണിത്. ഷൈന്‍ ടോം ചാക്കോ, ബാബു രാജ്, ബിബിന്‍ ജോര്‍ജ്,സുധീര്‍ കരമന, അലന്‍സിയര്‍, കിച്ചു ടെല്ലസ്, സൂര്യകൃഷ്, സാദിഖ്, റോഷന്‍ ബഷീര്‍, മാര്‍ട്ടിന്‍ മുരുകന്‍, സ്മിനു സിജോ, ശാന്തകുമാരി, രേണു സുന്ദര്‍ എന്നിവരാണ് മറ്റ് പ്രധാന അഭിനേതാക്കള്‍.

ഷെയിന്‍ നിഗം നായകനായെത്തുന്ന,
‘ഹാല്‍’

ഷെയിന്‍ നിഗം നായകനായെത്തുന്ന, വീര സംവിധാനം ചെയ്യുന്ന ‘ഹാല്‍’ എന്ന ചിത്രത്തിന്റെ ഫസ്റ്റ് ലുക്കും മോഷന്‍ പോസ്റ്ററും പുറത്തിറങ്ങി. സാക്ഷി വൈദ്യയാണ് ചിത്രത്തില്‍ നായികയായി എത്തുന്നത്. പ്രണയാര്‍ദ്രരായി നില്‍ക്കുന്ന ഷെയ്‌നും സാക്ഷിയും ആണ് പോസ്റ്ററിലുള്ളത്. ജോണി ആന്റണി, നിഷാന്ത് സാഗര്‍, മധുപാല്‍, ജോയ് മാത്യു തുടങ്ങിയവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. ജെ വി ജെ പ്രൊഡക്ഷന്‍സിന്റെ ബാനറില്‍ ഒരുങ്ങുന്ന ഹാലിന്റെ രചന നിര്‍വഹിച്ചിരിക്കുന്നത് നിഷാദ് കോയയാണ്. പ്രമുഖ ബോളിവുഡ് ഗായകന്‍ ആത്തിഫ് അസ്ലം ആദ്യമായി ഒരു മലയാള ചിത്രത്തിനായി പാടുന്നു എന്ന പ്രത്യേകത കൂടി ഹാലിനുണ്ട്. തിങ്ക് മ്യസിക്കാണ് മ്യൂസിക് പാര്‍ട്‌നര്‍. മലയാളത്തിന് പുറമെ ഹിന്ദി, തെലുങ്ക്, തമിഴ്, കന്നഡ എന്നീ ഭാഷകളിലായി ഒരേ സമയം റിലീസ് ചെയ്യുന്ന ചിത്രം ഒരു കംപ്ലീറ്റ് കളര്‍ഫുള്‍ എന്റര്‍ടെയ്‌നര്‍ ആയിരിക്കുമെന്നാണ് സൂചന.

ദ ലയണ്‍ കിംഗിന്റെ 2019-ലെ റീമേക്കിന്റെ പ്രീക്വലായ
‘മുഫാസ’ റിലീസിന്

1994ലെ ആനിമേഷന്‍ ചിത്രമായ ദ ലയണ്‍ കിംഗിന്റെ 2019-ലെ റീമേക്കിന്റെ പ്രീക്വലായ ‘മുഫാസ’ റിലീസിന് ഒരുങ്ങുകയാണ്. ചിത്രത്തിന്റെ പുതിയ ട്രെയിലറുകള്‍ പുറത്തിറങ്ങി. ഇംഗ്ലീഷിന് പുറമേ ഇന്ത്യയില്‍ ഹിന്ദി, തെലുങ്ക്, തമിഴ് ഭാഷകളില്‍ ചിത്രം എത്തുന്നുണ്ട്. ഹിന്ദി പതിപ്പില്‍ ബോളിവുഡിന്റെ കിംഗ് ഖാന്‍ ഷാരൂഖ് വീണ്ടും എത്തുന്നു. ആനിമേറ്റഡ് മ്യൂസിക്കല്‍ ഡ്രാമയ്ക്ക് മുഫാസയ്ക്ക് ശബ്ദം നല്‍കുന്നത് ഷാരൂഖാണ്. ഷാരൂഖിനെ കൂടാതെ, ആര്യന്‍ ഖാന്‍, അബ്രാം ഖാന്‍ എന്നിവരും യഥാക്രമം സിംബ, യംഗ് മുഫാസ എന്നീ കഥാപാത്രങ്ങള്‍ക്ക് ഹിന്ദി ഡബ്ബ് പതിപ്പിനായി ശബ്ദം നല്‍കും. തെലുങ്ക് പതിപ്പില്‍ തെലുങ്ക് സൂപ്പര്‍താരം മഹേഷ് ബാബു ശബ്ദം നല്‍കുന്നുണ്ട്. തമിഴില്‍ അര്‍ജുന്‍ ദാസ്, അശോക് സെല്‍വന്‍, സിങ്കം പുലി, വിടിവി ഗണേഷ് എന്നിങ്ങനെ വലിയ താരങ്ങള്‍ തന്നെ ശബ്ദം നല്‍കുന്നുണ്ട്. ഇപ്പോള്‍ ഇറങ്ങിയ ട്രെയിലറില്‍ പഴയ മാന്‍ഡ്രില്‍ റഫിക്കി പുംബയും ടിമോണിനും മുന്നില്‍ വച്ച് സിംബയുടെയും നളയുടെയും മകളായ കിയാരയോട് മുഫാസയുടെ കഥ പറയുന്നതാണ് കാണിക്കുന്നത്. ശ്രേയസ് തല്‍പാഡെ, സഞ്ജയ് മിശ്ര എന്നിവരാണ് ഹിന്ദിയില്‍ ടിമോണിനും പംബയ്ക്കും ശബ്ദം നല്‍കുന്നത്.

സജു വർഗീസ് (ലെൻസ്മാൻ)