👬👫കുട്ടീസ് കോർണർ 👬👫 (നാല്പത്തിയൊമ്പതാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക് (A)കടം കഥകൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടല്ലൊ … ല്ലേ…?😍

എന്ന് സ്വന്തം
ശങ്കരിയാന്റി.

👫A) കടംകഥകൾ (12)

1)ആയിരം ഓമനകള്‍ക്ക് ഒരരഞ്ഞാണ്‍-

ചൂല്

2)ആയിരം പൊടിയരിക്ക് അരമുറി തേങ്ങ –

നക്ഷത്രങ്ങളും പൂര്‍ണചന്ദ്രനും.

3)ആദ്യം കുന്തം, പിന്നെ കുഴല്, പിന്നെയോ പായ-

വാഴയില.

4)ആകാശത്തൂടെ തേരോടുന്നു, തേരാളി ഭൂമിയില്‍ നില്ക്കുന്നു-

പട്ടം.

5)ആഞ്ഞിലിക്കാട് ആശാനെ മുളങ്കാട് ആശാന്‍ ഓടിക്കുന്നു-

വഞ്ചി കുത്തുക.

6)ആദ്യം പൊന്തിപ്പൊന്തി, പിന്നെ തൂങ്ങിത്തൂങ്ങി-

വാഴ.

7)ആടിയാടി അഴകനെ പെറ്റു, അഴകനകത്തും, അമ്മ പുറത്തും-

നെല്ലും വൈക്കോലും.

8)ആനക്കൊമ്പില്‍ നെടിയരി-

തെങ്ങിന്‍പൂക്കുല.

9)ഇത്തിരിയുള്ളൊരു കരിമുട്ട, ഉരുണ്ടുരുണ്ടൊരു കരിമുട്ട, കുട്ട്യോളെ കരയിക്കും കരിമുട്ട—

കുരുമുളക്.

10)ഇത്തിരിയുള്ളൊരു ചൂടന്‍ പഴം തിന്നാന്‍ ആയിരം പൊന്‍പണം സമ്മാനം_

തീക്കട്ട.

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

കോമരം – വേഷം, അലങ്കാരം, നിറം, ബൊമ്മ

ക്രിയ – പ്രവൃത്തി, ആരംഭം, ശിക്ഷ.

ക്ഷണം – വിളിക്കൽ, വിരുന്ന്, മുഹൂർത്തം, നിമിഷം

ഗണം – കൂട്ടം, വർഗ്ഗം, സംഖ്യ

ഗോത്രം – വംശം, വനം, തൊഴുത്ത്

ഘടം – കുടം, അതിര്, തൂണിന്റെ ഒരു ഭാഗം

ചട്ടം – നിയമം, ക്രമം, വ്യവസ്ഥ

ചിത്രം – പടം, മനോഹരം, പലനിറം

ചുവട് – കാൽപ്പാട്, അടിസ്ഥാനം, ഒരടി

ജ്ഞാനം – അറിവ്, വൈദുഷ്യം, വേദം

📗📗

👫C) പണ്ടേ പ്രചാരത്തിലുള്ള പദ്യങ്ങൾ(18)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ മഴയെ ക്കുറിച്ചൊരു കവിതയാണ്‌ കുട്ടീസ്. 😍

മഴ

തുള്ളി ക്കൊണ്ട് വരുന്നുണ്ടേ…..
തുള്ളിക്കൊരു കുടം എന്ന മഴ….
കൊള്ളാമീ മഴ, കൊള്ളരുതീ മഴ…
കൊള്ളാം കൊള്ളാം പെയ്യട്ടെ…!

👫D) സ്റ്റാമ്പിന്റെ കഥ (27)

സിംഹവാലൻ കുരങ്ങ്

1983-ൽ ദേശീയ വന്യജീവി ദിനത്തോടനുബന്ധിച്ച് ഭാരതീയ തപാൽ വകുപ്പ് പുറത്തിറക്കിയ രണ്ട് സ്റ്റാമ്പുകളിൽ ഒന്ന് 2 രൂപ മുഖവിലയുള്ളതിൽ സിംഹവാലൻ കുരങ്ങിനെ ചിത്രീകരിച്ചിരിക്കുന്നു.

മൃഗരാജാവായ സിംഹം ലോകത്തിലാകെ ഇന്ത്യയിലും ആഫ്രിക്കയിലും മാത്രമേയുള്ളൂ. പേരിലും കാഴ്ചയിലും സിംഹത്തിന്റ ഗെറ്റപ്പുള്ള മറ്റൊരു അപൂർവജീവിയാകട്ടെ, ഇന്ത്യയിൽ മാത്രവും. കൃത്യമായി പറഞ്ഞാൽ നമ്മുടെ സ്വന്തം പശ്ചിമഘട്ടത്തിൽ. ജീവിയുടെ പേര് സിംഹവാലൻ കുരങ്ങ്. ഇംഗ്ലീഷിൽ പറഞ്ഞാൽ Lion-tailed Macaque…

1970കളിൽ സൈലന്റ് വാലിയിലെ കുന്തിപ്പുഴയിൽ വൈദ്യുതിയുൽപാദനത്തിനായി അണക്കെട്ട് നിർമിക്കാൻ സർക്കാർ തീരുമാനിച്ചു.പദ്ധതി നടപ്പിലായാൽ ഒട്ടേറെ വനവും ഒപ്പം സിംഹവാലനെപ്പോലുള്ള അപൂർവ ജീവികളും നശിക്കുമെന്ന് തിരിച്ചറിഞ്ഞ പ്രകൃതിസ്നേഹികൾ ശക്തമായ പ്രക്ഷോഭം നടത്തി. ഇന്ത്യയെങ്ങും ആളിപ്പടർന്ന ഈ പ്രക്ഷോഭങ്ങളുടെ പ്രതീകമായി മാറിയത് സിംഹവാലൻ കുരങ്ങുകളാണ്. ഉയരമുള്ള മരങ്ങളിൽ ചെറുകൂട്ടങ്ങളായി കഴിഞ്ഞുപോന്ന സിംഹവാലൻ കുരങ്ങുകൾ അതോടെ പ്രശസ്തിയിലേക്കുയർന്നു .

സിംഹത്തിന്റെ സട പോലെ മുഖത്തിനു ചുറ്റും നീണ്ട രോമങ്ങൾ, വണ്ണം കുറഞ്ഞൊരു വാലും വാലിനറ്റത്ത് രോമക്കെട്ടും. ശരിക്കും സിംഹവാലു പോലെ. കറുകറുത്തൊരു ചെറുകുരങ്ങിന് ‘ സിംഹവാലൻ’ എന്ന പേരു കിട്ടുന്നത് അങ്ങനെയാണ്. ലോകത്തിലെ അത്യപൂർവമായതും വംശ നാശഭീഷണി നേരിടുന്നതുമായ പ്രൈമേറ്റ് വിഭാഗക്കാരാണ് സിംഹവാലൻ.

നല്ല മരംകയറ്റക്കാരായ ഇവ മഴക്കാടുകളിലെ മുകൾത്തട്ടിലാണ്‌ മിക്കവാറും സമയം ചെലവഴിക്കുന്നത്‌. മറ്റു കുരങ്ങുകളുടെ സ്വഭാവത്തെ അപേക്ഷിച്ച്‌ നോക്കുമ്പോൾ ഇവ മനുഷ്യരുമായുള്ള ഇടപെടൽ ഇഷ്ടപ്പെടാത്ത കൂട്ടത്തിലാണ്‌. കൂട്ടമായി കഴിയുന്ന ജീവികളാണിവ, ഓരോ കൂട്ടത്തിലും പത്തു മുതൽ ഇരുപതു വരെ അംഗങ്ങൾ കാണാം. കുറച്ചു ആൺകുരങ്ങുകളും കുറെ പെൺകുരങ്ങകളെയും ഒരോ കൂട്ടത്തിലും കാണാം .ജനവാസ പ്രദേശങ്ങളുമായി ഇവ ബന്ധപ്പെടാറില്ല. ഏറിയാല്‍ നീളം രണ്ടടി മാത്രം. വളര്‍ച്ചയെത്തിയ സിംഹവാലന് എട്ടു കിലോഗ്രാം വരെ തൂക്കമുണ്ടാകും . ഏറ്റവും അധികം വംശനാശ ഭീഷണി നേരിടുന്ന വിഭാഗമാണിത്. ഇന്ന് നാലായിരത്തിൽ താഴെ സിംഹവാലൻ കുരങ്ങുകളേ അവശേഷിക്കുന്നുള്ളൂ

📗📗

👫E) എളുപ്പത്തിൽ ഒരു ചിത്രം വരയ്ക്കാം (33)

👬👭👫👭👬👭👫👭👬👭

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬