📱വാർത്തകൾ ഒറ്റനോട്ടത്തിൽ📱 – 2024 | ജൂലൈ 14 | ഞായർ ✍ കപിൽ ശങ്കർ

🔹രാജ്യത്തെ ഏഴ് സംസ്ഥാനങ്ങളിലായി നടന്ന ഉപതെരഞ്ഞെടുപ്പില്‍ ഇന്ത്യാമുന്നണിക്ക് വന്‍ ജയം. തിരഞ്ഞെടുപ്പ് നടന്ന 13 നിയമസഭാ സീറ്റുകളില്‍ പത്തിടത്തും ഇന്ത്യാ സഖ്യത്തിലെ പാര്‍ട്ടികള്‍ ജയിച്ചു. ഇതില്‍ പശ്ചിമ ബംഗാളിലെ നാല് സീറ്റില്‍ തൃണമൂല്‍ കോണ്‍ഗ്രസും ഉത്തരാഖണ്ഡിലേയും ഹിമാചല്‍ പ്രദേശിലേയും നാല് സീറ്റുകളില്‍ കോണ്‍ഗ്രസും തമിഴ്നാട്ടിലെ സീറ്റില്‍ ഡിഎംകെയും പഞ്ചാബിലെ സീറ്റില്‍ ആം ആദ്മി പാര്‍ട്ടിയും വിജയിച്ചു. ഈ സീറ്റുകളില്ലെല്ലാം ബിജെപി സ്ഥാനാര്‍ത്ഥികളാണ് തോറ്റത്. ഹിമാചല്‍ പ്രദേശിലും മധ്യപ്രദേശിലും ഓരോ സീറ്റില്‍ മാത്രമാണ് ബിജെപിക്ക് ജയിക്കാനായത്. ബിഹാറിലെ രുപോലിയില്‍ സ്വതന്ത്ര സ്ഥാനാര്‍ത്ഥി ശങ്കര്‍ സിങാണ് വിജയിച്ചത്.

🔹തിരുവനന്തപുരം നഗരത്തിലെ ആമയിഴഞ്ചാന്‍ തോട്ടില്‍ കാണാതായ തൊഴിലാളി ജോയിക്കായുള്ള തിരച്ചില്‍ താത്ക്കാലികമായി ഇന്നലെ അര്‍ദ്ധരാത്രി നിര്‍ത്തിവെച്ചു. റോബട്ടുകളെ എത്തിച്ചു രാത്രി നടത്തിയ തിരച്ചിലിലും കണ്ടെത്താന്‍ സാധിക്കാത്തതിനെ തുടര്‍ന്നാണ് 13 മണിക്കറിലെറെ നീണ്ട രക്ഷാപ്രവര്‍ത്തനം നിര്‍ത്തിവച്ചത്. തിരച്ചില്‍ ഇന്ന് രാവിലെ ആറരയോടെ പുനരാരംഭിക്കുമെന്ന് ജില്ലാ കലക്ടര്‍ അറിയിച്ചു. സ്‌കൂബ സംഘത്തിന് ടണലിനുള്ളിലേക്ക് കടക്കാന്‍ കഴിയാത്തതാണ് രക്ഷാ പ്രവര്‍ത്തനത്തിന് വെല്ലുവിളിയാവുന്നത്. ടണലിനുള്ളില്‍ മുട്ടുകുത്തി നില്‍ക്കാന്‍ പോലും കഴിയുന്നില്ലെന്നും സംഘം പറയുന്നു. റെയില്‍വേ സ്റ്റേഷന് സമീപത്തെ തോട് വൃത്തിയാക്കാനിറങ്ങിയ കോര്‍പ്പറേഷന്റെ താല്‍ക്കാലിക ജീവനക്കാരനായ മാരായിമുട്ടം സ്വദേശിയായ 42 കാരനായ ജോയിയെ ഇന്നലെ രാവിലെ 11.30 ഓടെയാണ് കാണാതായത്.

🔹ആമയിഴഞ്ചാന്‍ അപകടത്തിന്റെ ഉത്തരവാദിത്വത്തില്‍ നിന്ന് റെയില്‍വേയ്ക്ക് ഒഴിഞ്ഞുമാറാന്‍ ആകില്ലെന്നും മാലിന്യമടിഞ്ഞതിന്റെ പൂര്‍ണ്ണ ഉത്തരവാദിത്തം റെയില്‍വേക്കാണെന്നും മന്ത്രി വി ശിവന്‍കുട്ടി. അപകടമുണ്ടായ സ്ഥലം റെയില്‍വേയുടേതാണെന്നും ആമയിഴഞ്ചാന്‍ തോടിന്റെ റെയില്‍വേയുടെ അധീനതയിലുള്ള ഭാഗത്തെ മാലിന്യം നീക്കം ചെയ്യാന്‍ റെയില്‍വേ ഒരിക്കലും സംസ്ഥാന സര്‍ക്കാരിനെയോ തിരുവനന്തപുരം കോര്‍പ്പറേഷനെയോ അനുവദിക്കാറില്ലെന്നും മന്ത്രി വി ശിവന്‍കുട്ടി ചൂണ്ടിക്കാട്ടി. സംഭവത്തില്‍ അന്വേഷണം നടത്തി റിപ്പോര്‍ട്ട് നല്‍കാന്‍ മന്ത്രി വി ശിവന്‍കുട്ടി തിരുവനന്തപുരം ജില്ലാ കളക്ടറെ ചുമതലപ്പെടുത്തി.

🔹വിദ്യാർത്ഥികളെ ലക്ഷ്യമിട്ട് വിൽപനക്കെത്തിച്ച കഞ്ചാവുമായി പശ്ചിമ ബംഗാൾ സ്വദേശി ചാലക്കുടിയിൽ പിടിയിലായി. മൂർഷിദാബാദ് കാശി ഷാഹാ സ്വദേശി 26 വയസ്സുള്ള അജി ബുർഷെയ്ഖിനെയാണ് പതിനേഴ് കിലോ കഞ്ചാവുമായി പൊലീസ് പിടികൂടിയത്. ചാലക്കുടി പൊലീസും, ക്രൈം സ്ക്വാഡും, ഡൻസാഫ് ടീമും ചേർന്നാണ് റെയിൽവേ സ്റ്റേഷൻ പരിസരത്തു നിന്നും ഇയാളെ കസ്റ്റഡിയിലെടുത്തത്. വിശാഖപട്ടണത്തു നിന്നും ട്രെയിൻ മാർഗ്ഗമാണ് ഇയാൾ കഞ്ചാവ് കടത്തി കൊണ്ടുവന്നത്. രണ്ട് ബാഗുകളിലായി എട്ട് പ്ലാസ്റ്റിക് കവറുകളിൽ പൊതിഞ്ഞ് സൂക്ഷിച്ചിരുന്ന നിലയിലായിരുന്നു കഞ്ചാവ്. നേരത്തേ അങ്കമാലിയിൽ കറി മസാല നിർമ്മാണ കേന്ദ്രത്തിൽ ജോലി ചെയ്തിരുന്ന ഇയാൾ പിന്നീട് ആന്ധ്രയിൽ നിന്നും കഞ്ചാവ് വാങ്ങി ആവശ്യക്കാർക്ക് എത്തിക്കുന്ന കണ്ണിയായി മാറി. ആവശ്യക്കാരെ റെയിൽവേ സ്റ്റേഷൻ പരിസരത്തേക്ക് വരുത്തിയാണ് കഞ്ചാവ് വില്പന നടത്തിയിരുന്നത്.

🔹പ്രായപൂർത്തിയാവാത്ത കുട്ടിക്കെതിരെ അതിഗൗരവ ലൈംഗീകാതിക്രമം നടത്തിയ കേസിൽ രണ്ടുപേരെ മേപ്പാടി പൊലീസ് ഇൻസ്‌പെക്ടർ എസ്എച്ച്ഒ ബികെ സിജുവിന്റെ നേതൃത്വത്തിൽ അറസ്റ്റ് ചെയ്തു. വടുവൻച്ചാൽ കാടാശ്ശേരി അമ്പലശ്ശേരി വീട്ടിൽ അലവി (69), ഇയാളുടെ മകനായ നിജാസ് (26) എന്നിവരെയാണ് പൊലീസ് അറസ്റ്റ് ചെയ്തത്. പ്രായപൂർത്തിയാവാത്ത കുട്ടിയെ നിരന്തരം ലൈംഗീകാതിക്രമത്തിനിരയാക്കുകയും, പുറത്തു പറഞ്ഞാൽ കൊല്ലുമെന്ന് ഭീഷണിപ്പെടുത്തുകയും, കഠിന ദേഹോപദ്രവം ഏൽപ്പിക്കുകയുമായിരുന്നു. ഇരുവർക്കുമെതിരെ ഇന്ത്യൻ ശിക്ഷാ നിയമം, പോക്സോ ആക്ടുകളിലെ വിവിധ വകുപ്പുകൾ എന്നിവ ഉൾപ്പെടുത്തി രണ്ടു വ്യത്യസ്ത കേസുകൾ രജിസ്റ്റർ ചെയ്തു. കോടതിയിൽ ഹാജരാക്കിയ ഇവരെ റിമാൻഡ് ചെയ്തു. സീനിയർ സിവിൽ പോലീസ് ഓഫീസർമാരായ കെകെ വിപിൻ, ഹഫ്സ്, ഷമീർ, ഷബീർ എന്നിവരും പൊലീസ് സംഘത്തിലുണ്ടായിരുന്നു.

🔹കുറ്റ്യാടി ചുരത്തിൽ കാറിൽ യുവാക്കളുടെ അഭ്യാസപ്രകടനം. കാറിന്റെ രണ്ടു ഭാഗത്തെയും വിൻഡോയിലും, ബോണറ്റിലും ഇരുന്നായിരുന്നു അപകടകരമായ കാർ യാത്ര. മഴയാത്രയ്ക്ക് എത്തിയ കുട്ടികളും രക്ഷിതാക്കളും അധ്യാപകരും ചുരത്തിലുള്ളപ്പോൾ ആയിരുന്നു സംഭവം. ചുരം ഡിവിഷൻ ഹെൽപ്പ് ഡെസ്ക് പ്രവർത്തകർ വാഹനം തടയുകയും തുടർന്ന് തൊട്ടിൽപ്പാലം പൊലീസ് എത്തി തമിഴ്നാട് രജിസ്ട്രേഷൻ കാർ കസ്റ്റഡിയിലെടുക്കുകയുമായിരുന്നു.

🔹ക്രിമിനല്‍ പശ്ചാത്തലമുള്ളവരെ പാര്‍ട്ടിയിലേക്ക് സ്വീകരിച്ചതിനെ വീണ്ടും ന്യായീകരിച്ച് മന്ത്രി വീണ ജോര്‍ജ്ജ്. നിയമസഭാ അംഗങ്ങള്‍ക്കെതിരെ പോലും നിരവധി കേസുകളുണ്ടെന്നും ഇപ്പോള്‍ പാര്‍ട്ടിയില്‍ ചേര്‍ന്നവര്‍ ബിജെപിയില്‍ പ്രവര്‍ത്തിച്ച കാലത്ത് ആര്‍ക്കും ആക്ഷേപമില്ലായിരുന്നുവെന്നും മന്ത്രി പറഞ്ഞു.

🔹കാസറഗോഡ് നല്ലോംപുഴ മാരിപ്പുറത്ത് ജോസഫിന്റെ വീട്ടിലെ കേടായ മീറ്റര്‍ മാറ്റി തിരിച്ചു പോകുന്നതിനിടയില്‍ കെ.എസ്.ഇ.ബി ജീവനക്കാരെ വാഹനമിടിച്ച് കൊലപ്പെടുത്താന്‍ ശ്രമം. നല്ലോംപുഴ മാരിപ്പുറത്ത് ജോസഫിന്റെ വീട്ടിലെ കേടായ മീറ്റര്‍ മാറ്റി സ്ഥാപിക്കുന്നതിലെ തര്‍ക്കമാണ് ആക്രമണത്തിന് കാരണം. മീറ്റര്‍ മാറ്റാന്‍ കഴിയില്ലെന്ന് ജോസഫ് കെ.എസ്.ഇ.ബി ജീവനക്കാരെ അറിയിച്ചിരുന്നു.

🔹എറണാകുളം വേങ്ങൂരില്‍ മഞ്ഞപ്പിത്തം ബാധിച്ചു ചികിത്സയിലായിരുന്ന അഞ്ചന ചന്ദ്രന്‍ മരിച്ചു. 27 വയസ്സ് ആയിരുന്നു. എറണാകുളം ലിസി ആശുപത്രിയില്‍ ചികിത്സയിലിരിക്കെയാണ് മരണം സംഭവിച്ചത്.

🔹സ്‌കൂട്ടറില്‍ സഞ്ചരിക്കുമ്പോള്‍ നിറഞ്ഞൊഴുകുന്ന തോട്ടിലേക്ക് മറിഞ്ഞ് വീണ് ബാലുശേരി കരിയാത്തന്‍ കാവ് തോട്ടില്‍ മുഹമ്മദ് മരിച്ചു. മഴ നനയാതിരിക്കാന്‍ കോട്ടും തലയില്‍ ഹെല്‍മറ്റും ധരിച്ച നിലയിലാണ് മൃതദേഹം കണ്ടെത്തിയത്.

🔹ഇടുക്കി അടിമാലിക്ക് അടുത്ത് പീച്ചാടില്‍ മരം കടപുഴകി വീണു തോട്ടം തൊഴിലാളി മരിച്ചു. മാമലക്കണ്ടം സ്വദേശി ശാന്തയാണ് മരിച്ചത്.

🔹അജ്ഞാതസംഘത്തിന്റെ ആക്രമണത്തില്‍ ഗുരുതര പരിക്കേറ്റ് ചികിത്സയിലായിരുന്ന ത്രിപുരയിലെ സി.പി.എം നേതാവ് ബാദല്‍ ഷില്‍ മരിച്ചു. ഷില്ലിനെ ബി.ജെ.പി. പിന്തുണയുള്ള ഗുണ്ടകള്‍ കൊലപ്പെടുത്തിയതാണെന്ന് ആരോപിച്ച് സംസ്ഥാനത്ത് ഇന്ന് 12 മണിക്കൂര്‍ ബന്ദിനും ആഹ്വാനംചെയ്തിട്ടുണ്ട്.

🔹ആസിഫ് അലി – സുരാജ് വെഞ്ഞാറമൂട് കോംമ്പോ ഒന്നിക്കുന്ന ‘അഡിയോസ് അമിഗോ’ ചിത്രത്തിന്റെ പുതിയ റിലീസ് തിയതി പ്രഖ്യാപിച്ചു. നേരത്തെ പുറത്തു വിട്ട ഡേറ്റ് ഓഗസ്റ്റ് 15 ആയിരുന്നു. വര്‍ക്ക് ഫുള്‍ കഴിഞ്ഞതു കൊണ്ടാണ് ഇനി കാത്തിരിക്കേണ്ട എന്ന് തീരുമാനിച്ചത് എന്നാണ് പ്രൊഡ്യൂസര്‍ പറയുന്നത്. ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാന്‍ നിര്‍മ്മിക്കുന്ന ചിത്രം സംവിധാനം ചെയ്യുന്നത് നവാഗതനായ നഹാസ് നാസര്‍ ആണ്. ചിത്രം ഓഗസ്റ്റ് 2 ന് ആണ് തിയറ്ററുകളില്‍ എത്തുന്നത്. ടൊവിനോ ചിത്രം തല്ലുമാലയുടെ അസോസിയേറ്റ് ഡയറക്ടര്‍ ആയിരുന്നു നഹാസ് നാസര്‍. ആഷിക് ഉസ്മാന്‍ പ്രൊഡക്ഷസിന്റെ പതിനഞ്ചാമത് ചിത്രമായ ‘അഡിയോസ് അമിഗോ’യുടെ ഫസ്റ്റ് ലുക്ക് പോസ്റ്ററും, ചിത്രത്തിന്റെ മറ്റ് വാര്‍ത്തയുമെല്ലാം നേരത്തെ സമൂഹമാധ്യമങ്ങളില്‍ ശ്രദ്ധ നേടിയിരുന്നു. വ്യത്യസ്തമായി എത്തിയ അന്നൗണ്‍സ്‌മെന്റ് പോസ്റ്റര്‍ ഇതിനോടകം തന്നെ സോഷ്യല്‍ മീഡിയയില്‍ ശ്രദ്ധ നേടി കഴിഞ്ഞു. തങ്കം തിരക്കഥ ഒരുക്കുന്ന ചിത്രത്തിന്റ ക്യാമറ ജിംഷി ഖാലിദും സംഗീതം ഗോപി സുന്ദറും നിര്‍വ്വഹിക്കുന്നു.

തയ്യാറാക്കിയത്:
കപിൽ ശങ്കർ