👬👫കുട്ടീസ് കോർണർ 👬👫 (അമ്പത്തിയാറാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!!

ഈ ആഴ്ച നമുക്ക് പുതിയ ചില വിഷയങ്ങൾ കൂടി അറിയാംട്ടോ… വിശദമായി താഴെ വായിക്കുക

😍A) തീപ്പെട്ടി ചിത്രം കണ്ടൊരു വിശദീകരണം, B പദ ലളിതം (വാക്കുകളെ കുറിച്ചൊരു വിശദീകരണം), C) സ്ഥലനാമ കഥകൾ പിന്നെ പതിവ് പോലെ D) കടംകഥകളും, കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ…😍

എന്ന് സ്വന്തം
ശങ്കരിയാന്റി.

👫A) തീപ്പെട്ടി ചിത്രം (1)

മുതല
മുതലയുടെ ചിത്രമുള്ള തീപ്പെട്ടി താഴെ ചേർക്കുന്നു.

ഉരഗ വർഗ്ഗത്തിൽ പെടുന്ന ശീത രക്തമുള്ള ഒരു ജീവി ആണ് മുതല. ശൽക്കങ്ങളാൽ പൊതിയപ്പെട്ടിരിക്കുന്ന ഇവയുടെ ശരീരത്തിന്റെ താപനില അന്തരീക്ഷ താപ നിലയ്ക്കനുസരിച്ച് മാറിക്കൊണ്ടേയിരിക്കും. മുതലയുടെ ശൽക്കങ്ങൾ വളരെ കടുപ്പമുള്ളവയാണ്. വെള്ളത്തിൽ വെച്ച് അവയുടെ പിടിയിൽ പെട്ടാൽ രക്ഷപ്പെടാൻ കഴിയുന്ന ജീവികൾ അപൂർവം. പാമ്പും പല്ലിയുമെല്ലാം ഉൾപ്പെട്ട ഉരഗവർഗക്കാരാണ് മുതലകൾ.അവയിൽ ഏറ്റവും വലിയ ഉരഗവും മുതല തന്നെ. വെള്ളത്തിലാണ് വാസമെങ്കിലും കരയിലെ ജീവികളെപ്പോലെ അന്തരീക്ഷവായു ശ്വസിച്ചാണ് അവ കഴിയുന്നത്.എന്നാൽ വെള്ളത്തിനടിയിൽ അഞ്ചു മണിക്കൂർ വരെ ശ്വാസം പിടിച്ചിരിക്കാൻ മുതലയ്ക്ക് വിഷമമില്ല എന്നു മാത്രം.

ലോകം കണ്ടിട്ടുള്ളതിൽ വെച്ച് ഏറ്റവും പഴക്കവും തഴക്കവും ചെന്ന വേട്ടക്കാരനാണ് മുതല.കടലിലെ സ്രാവിനെ പോലെ വേട്ടയിൽ അതീവ സമർത്ഥനും.കടൽ ഒഴികെ വെള്ളമുള്ള ഏതു സ്ഥലത്തും ചതുപ്പിലും കഴിയാൻ യോജിച്ച ദേഹമാണ് മുതലയുടേത്. ഒരു വമ്പൻ പല്ലിയെപ്പോലെയാണ് സാധാരണ മുതലയുടെ ആകൃതി ചിറകുകൾ ഇല്ലെങ്കിലും വെള്ളത്തിലൂടെ അതിവേഗം നീന്താൻ ഇവയ്ക്ക് കഴിയും .വെള്ളത്തിൽ ഒരനക്കം പോലുമില്ലാതെ പൊന്തിക്കിടക്കാനും സാധിക്കും.

കണ്ണുനീർ ഗ്രന്ഥികൾ ഉണ്ടെങ്കിലും മുതലയ്ക്ക് കണ്ണ് നീർ ഒഴുക്കി കരയാൻ അറിയില്ല എന്നാൽ അവയ്ക്ക് ഒരുപാട് നേരം കരയിൽ കഴിയുമ്പോൾ കണ്ണിന്റെ സംരക്ഷണത്തിനായി ഈ ഗ്രന്ഥി സ്രവങ്ങൾ പുറപ്പെടുവിയ്ക്കുന്നു. ചിലപ്പോൾ ഇരയെ രുചിയോടെ ഭക്ഷിക്കുമ്പോളാകാം ഇത് സംഭവിയ്ക്കുന്നത്. ഇര യോടുള്ള അനുകമ്പ മൂലം കരയുന്നതായി തോന്നുകയും ചെയ്യാം. ഈ ഒരു കരച്ചിലിനെ അവലംബമായി എടുത്താണ് മുതലക്കണ്ണീർ എന്ന പ്രയോഗം നിലവിൽ വന്നത് എന്ന് അനുമാനിക്കാം . ഈ പദപ്രയോഗം ഇന്നും നിലനിൽക്കുന്നു.

📗📗

👫B) പദ ലളിതം

കുട്ടീസ്…

അടുത്തൂൺ എന്ന പദത്തെ കുറിച്ച് ചിന്തിക്കാം. ദ്രാവിഡ പദം ചേർന്ന രൂപമാണ് ഇത്. പെൻഷൻ പറ്റുകയെന്നർത്ഥത്തിൽ ഇത് ഉപയോഗിക്കുന്നു. അടുയെന്ന ദ്രാവിഡ പദത്തിന് ദാനമെന്നർത്ഥമുണ്ട്. ദാനം കിട്ടിയ ഊണ് ആണ് പെൻഷൻ എന്നർത്ഥം. ശരിക്കും പെൻഷൻ ധാനമല്ലല്ലോ. അടുത്തു കിട്ടുന്ന ഊൺ എന്നർത്ഥം ശരിക്കും യോജിക്കും.

📗📗

👫C) സ്ഥലനാമ കഥകൾ

കുട്ടീസ് ഈ ആഴ്ച മുതൽ ചില സ്ഥലങ്ങൾ ക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ 😍

വാളകം

കൊട്ടാരക്കര തിരുവനന്തപുരം റൂഡിൽ സ്ഥതിചെയ്യുന്ന ഒരു സ്ഥലമാണ് വാളകം .ഖരൻ വാൾ ഉറയിലിട്ട സ്ഥലമെന്നു പറയുന്നുണ്ടെങ്കിലും ഭൂമിശാസ്ത്രപരമായി നോക്കുമ്പോൾ അതല്ല ശരി. വാല് അകം വാളകമാവാം.വാല് പോലെ നീണ്ട പ്രദേശം വാലകവും പിന്നീട് വാളകവും ആയി മാറിയതാകാം .ഒരു കാലത്ത് ല_ള വിനിമയം ഭാഷയിൽ ഉണ്ടായിരുന്നിരിക്കാം.

📗📗

👫D) കടങ്കഥകൾ (12)

1)ആകാശത്തൂടെ തേരോടുന്നു, തേരാളി ഭൂമിയില്‍ നില്ക്കുന്നു-
പട്ടം.

2)ആഞ്ഞിലിക്കാട് ആശാനെ മുളങ്കാട് ആശാന്‍ ഓടിക്കുന്നു-
വഞ്ചി കുത്തുക

3)ആദ്യം പൊന്തിപ്പൊന്തി, പിന്നെ തൂങ്ങിത്തൂങ്ങി-
വാഴ.

4)ആടിയാടി അഴകനെ പെറ്റു, അഴകനകത്തും, അമ്മ പുറത്തും- നെല്ലും വൈക്കോലും.

5)ആനക്കൊമ്പില്‍ നെടിയരി- തെങ്ങിന്‍പൂക്കുല.

6)ഇത്തിരിയുള്ളൊരു കരിമുട്ട, ഉരുണ്ടുരുണ്ടൊരു കരിമുട്ട, കുട്ട്യോളെ കരയിക്കും കരിമുട്ട— കുരുമുളക്.

7)ഇത്തിരിയുള്ളൊരു ചൂടന്‍ പഴം തിന്നാന്‍ ആയിരം പൊന്‍പണം സമ്മാനം-
തീക്കട്ട.

8)ഇപ്പോള്‍ കുത്തിയ പുത്തന്‍ കിണറ്റില്‍ പത്തഞ്ഞൂറ് വെളളപ്പരല്‍-
അരി തിളയ്ക്കുന്നത്.

9)ഇപ്പോള്‍ പണിത പുത്തന്‍പുരയ്ക്ക് പത്തഞ്ഞൂറ് കിളിവാതില്‍-
തേനീച്ചക്കൂട്.

10)ഇറയ്ക്കാത്ത കിണറ്, മേയാത്ത പന്തല്‍, തൂക്കാത്ത മുറ്റം-
കടല്‍, ആകാശം, കടല്‍തീരം.

📗📗

👫E) എളുപ്പത്തിൽ ഒരു ചിത്രം വരയ്ക്കാം (40)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖

👬👭👫👭👬👭👫👭👬👭