👬👫കുട്ടീസ് കോർണർ 👬👫 (അമ്പത്തിരണ്ടാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)മുല്ല തമാശ (B)പൊതു അറിവ്
(C)പദ്യം (D)പഴഞ്ചൊല്ലും കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ…😍

എന്ന് സ്വന്തം
ശങ്കരിയാന്റി.

👫A) ഹോജ മുല്ല തമാശ (10)

കള്ളന്മാർ

പാതിരാത്രിക്ക്‌ ആരോ വീട്ടിനുള്ളിൽ കയറിയതറിഞ്ഞു പേടിച്ചുപോയ മുല്ല ഒരു അലമാരക്കുള്ളിൽ കയറി ഒളിച്ചു. കള്ളന്മാർ തിരച്ചിലിനിടയിൽ അലമാര തുറന്നപ്പോൾ മുല്ലാ അതിനുള്ളിൽ പേടിച്ചരണ്ട്‌ കൂനിക്കൂടിയിരിക്കുന്നതു കണ്ടു.
‘താനെന്താ ഇതിനുള്ളിൽ ഒളിച്ചിരിക്കുന്നത്‌?’ കള്ളന്മാർ ചോദിച്ചു.
‘നിങ്ങൾക്കു പറ്റിയതൊന്നും ഈ വീട്ടിലില്ലാത്തതിന്റെ നാണക്കേടുകൊണ്ട്‌ ഒളിച്ചുപോയതാണ്‌.’

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

1)മണി – രത്നം, നാഴികമണി, കൃഷ്ണമണി

2)മതം – അഭിപ്രായം, വിശ്വാസം, സിദ്ധാന്തം

3)മാനം – അളവ്, ആകാശം, അഭിമാനം

4)മൃഗം – മാൻ, നാൽക്കാലികൾ

5)യുഗം – നുകം, ജോഡി, തലമുറ

6)യോഗം – പ്രയോഗം, അവസരം, കഴിവ്

7)രസം – ചാറ്, അഭിരുചി, നാവ്

8)രാഗം – നിറം, ചുവപ്പ്, സ്നേഹം

9)വക്ത്രം – വായ്, മുഖം, ഒരുവൃത്തം

10)വക്രം – ചുരുണ്ട്, വളഞ്ഞ, കപടമായ

📗📗

👫C) പണ്ടേ പ്രചാരത്തിലുള്ള പദ്യങ്ങൾ (21)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ നല്ല ശീലത്തെകുറിച്ചൊരു കവിതയാണ്‌ കുട്ടീസ്. 😍

നല്ല ശീലങ്ങൾ

കാലത്തു നേരത്തെണീക്കേണം
വേഗത്തിലൊന്നു നടക്കേണം
ചേലൊത്ത പല്ലുകൾ തേയ്ക്കേണം
തങ്കമുഖം കഴുകീടേണം
കാൽ കൈ നഖങ്ങൾ മുറിക്കേണം
കാര്യങ്ങൾ എല്ലാം പഠിക്കേണം
നീണ്ടു നിവർന്നു നടക്കേണം
നാണിച്ചു നിൽക്കാതിരിക്കേണം
വസ്ത്രങ്ങൾ നന്നായലക്കേണം
നിത്യമെന്നോണം കുളിക്കേണം
സത്യം നീതി ധർമ്മം കാക്കേണം
ഉത്തമരായി കഴിയേണം
തെറ്റുകുറ്റങ്ങൾ തിരുത്തേണം
മാറ്റത്തിൽ ജീവിതമാകേണം
ഭക്ഷണം നന്നായി ചവക്കേണം
സാവധാനത്തിൽ കഴിക്കേണം
വൃദ്ധരിൽ നാം തണലേകേണം
കുട്ടികളിൽ സ്നേഹം കാട്ടേണം
എല്ലാരിലും ഗുണമേകേണം
നല്ലവരായി വളരേണം

👫D) പഴഞ്ചൊല്ലുകളും വ്യാഖ്യാനവും (14)

1) ഏച്ച് കെട്ടിയാൽ മുഴച്ചിരിക്കും:

രണ്ട് വ്യതസ്ത കയറുകൾ തമ്മിൽ ചേർത്ത് കെട്ടിയാൽ കെട്ടിയ ഭാഗം മുഴച്ചിരിക്കും. രണ്ട് വ്യതസ്ത അഭിരുചികൾ ഉള്ള ആളുകൾ ചേരുമ്പോൾ ഈ പ്രയോഗം പ്രസ്ക്തം. അവരുടെ അഭിപ്രായ വ്യത്യാസത്തെ “മുഴച്ചിരിക്കും“ എന്നത് ദ്യോതിപ്പിക്കുന്നു.

2) ഒരുമ ഉണ്ടെങ്കിൽ ഉലക്കമേലും കിടക്കാം.

ഐക്യം ഉണ്ടെങ്കിൽ അസാധ്യമായ കാര്യങ്ങളും സാധ്യമാക്കാം.

3) കഞ്ഞി നൽകാതെ കൊന്നിട്ടു പാൽപായസം തലയിലൊഴിക്കുക. :

മരിക്കുന്നതിനു മുൻപൊക്കെ നന്നായി വിമർശിക്കപ്പെട്ടയാളെ മരണശേഷം പുകഴ്ത്തുക. ജീവിച്ചിരിക്കുമ്പോൾ സഹായിക്കാത്തവർ, മരിക്കുമ്പോൾ ആവേശപൂർവ്വം സഹായത്തിനെത്തും.

4) കടലിൽ കായം കലക്കുക.

വളരെയധികം ഉപയോഗിക്കേണ്ടിടത്ത് ഒരു വസ്തു അല്പം മാത്രം ഉപയോഗിക്കുക.

5) കറിയൊക്കെ കൊള്ളാം, പക്ഷേ വിളമ്പിയത് കോളാമ്പിയിൽ:

എത്ര നല്ല വസ്തുവും മോശപെട്ടതിനോട് ചേർന്നാൽ ഉപയോഗശൂന്യമാകും.

6) കാറ്റുള്ളപ്പോൾ തൂറ്റണം. :

കാറ്റുള്ളപ്പോൾ പാറ്റണം. ചെയ്യേണ്ട കാര്യങ്ങൾ സൗകര്യം കിട്ടുമ്പോൾ തന്നെ ചെയ്യണം.

7) കാശില്ലാത്തവൻ കാശിക്കു പോകേണ്ട :

ചെയ്യാൻ പറ്റാത്ത കാര്യം ചെയ്യേണ്ട

8) കുനിക്കൻ മദിച്ചാലും മുട്ടോളം :

കുനിക്കൻ=വലിയ കട്ടെറുമ്പ്. മുട്ടു വരെ എത്തുന്നതിനു മുമ്പേ കൊല്ലപ്പെട്ടെന്നു വരാം.
എത്ര കേമനെങ്കിലും പരിമിതിയുണ്ട്.

9) കുന്തം പോയാൽ കുടത്തിലും തപ്പണം.

ഒരു സാധനം കാണാതായാൽ അത് കിട്ടില്ല എന്നുറപ്പായ സ്ഥലത്ത് പോലും നോക്കണം.

10) കുരുടന്മാർ ആനയെ കണ്ടപോലെ.

ഒരു കാര്യത്തെപ്പറ്റി ഒരു സാമ്യവുമില്ലാത്ത പല അഭിപ്രായങ്ങൾ പറയുക.

📗📗

👫E) എളുപ്പത്തിൽ ഒരു ചിത്രം വരയ്ക്കാം (36)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖

👬👭👫👭👬👭👫👭👬👭