🌹 “ഇന്നത്തെ ചിന്താവിഷയം” 🌹 – 2024 | ജൂലൈ 21 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

നമ്മുടെ മനസ്സുകൾക്ക് മലകളെ കീഴടക്കാൻ ആകട്ടെ
—————————————————————————–

ബീഹാറിൽ, ഗേലൂറിലെ ഒരു സാധാരണക്കാരനായിരുന്നു ദശരഥ് മാഞ്ചി. തൻ്റെ ജോലി സ്ഥലത്തേക്കു ഭക്ഷണവുമായി വന്ന ഭാര്യ കാലുതെറ്റി വീണ് ഗുരുതരമായി പരുക്കേറ്റു. ഭാര്യയേയും ചുമന്നുകൊണ്ട് മാഞ്ചി ഏറ്റവും അടുത്തുള്ള ആശുപത്രിയിലേക്കു യാത്ര ആരംഭിച്ചു. ഗേലൂർ മല കടന്ന് എഴുപതു കിലോമീറ്റർ സഞ്ചരിക്കണമായിരുന്നു മാഞ്ചിക്ക്. മല മറിക്കൊടുത്തില്ല. സമയത്തിനു ചികിത്സ കിട്ടാതെ ഭാര്യ ഫൽഗുനിദേവി മരണമടഞ്ഞു.

നിസ്സാഹായനായ ആ മനുഷ്യൻ ശിഷ്ടായുസ്സ് നിഷ്ഫലമാക്കിയില്ല. മേലൂർ മല തുരന്ന് ഒരു തുരങ്കം സൃഷ്ടിക്കാനാണ് അയാൾ ശ്രമിച്ചത്. മറ്റുള്ളവരും സഹകരിച്ചു. ദശരഥ് മാഞ്ചിക്കു മുമ്പിൽ നീണ്ട ഇരുപത്തിയഞ്ചു വർഷത്തിനുശേഷം മല മാറിക്കൊടുത്തു. താജ്മഹൽ പണിയാൻ ഷാജഹാൻ എടുത്തതിനേക്കാൾ രണ്ടു വർഷം കൂടുതൽ.

മനസ്സിനു കീഴടക്കാനാവാത്ത ഒരു മലയുമില്ല. അനുഭവങ്ങൾ വൈകാരികതയിൽ അവസാനിക്കരുത്; വിചിന്തനത്തിലേക്കു നയിക്കണം. വിചിന്തനം വിജയത്തിലേക്കുള്ള വഴി തെളിക്കും. ഒരാളുടെ ജീവൻ പടിയിറങ്ങുമ്പോൾ അവസാനിക്കേണ്ടതല്ല അയാളോടുള്ള സ്നേഹം. എല്ലാ സ്നേഹചിന്തകളും, വ്യക്ത്യാധിഷ്ഠിതമാകരുത്. അതിൽ, മനുഷ്യസ്നേഹത്തിൻ്റെ അടിയൊഴുക്കുകൾ ഉണ്ടായിരിക്കണം.

ദുരന്തങ്ങൾ രൂപപ്പെടുത്തുന്നത് രണ്ടു തരം മനസ്സുകളാണ്: ഒന്നുകിൽ കീഴsങ്ങലിൻ്റെ; അല്ലെങ്കിൽ കീഴടക്കലിൻ്റെ. വികാരങ്ങൾക്കു കീഴടുങ്ങന്നവർ, മറ്റുള്ളവരെയും നിരാശപ്പെടുത്തിക്കൊണ്ടു മറ്റൊരു ദുരന്തമായി മാറും. എന്നാൽ, വികാരങ്ങളെ കീഴടക്കുന്നവർ, പ്രത്യാശയുടെ കിരണങ്ങൾ ചൊരിഞ്ഞു കൊണ്ട് മറ്റുള്ളവർക്കു വഴിവിളക്കായ്ത്തീരും. നമുക്കും അതിനാകട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര