🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 03 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

കൂടെ നിൽക്കുന്നവരുടെ സഹായം തള്ളിക്കളയരുത്
——————————————————————————–

നാടക റിഹേഴ്സൽ നടന്നു കൊണ്ടിരിക്കുകയാണ്. മിക്ക അഭിനേതാക്കളും, സമയത്ത് എത്താറില്ല. എന്നാൽ, നായകൻ തികഞ്ഞ കൃത്യനിഷ്ട പാലിച്ചിരുന്നു. റിഹേഴ്സൽ പൂർത്തിയായപ്പോൾ, ട്രൂപ്പിൻ്റെ ഉടമ, അയാളെ അഭിനന്ദിച്ചു കൊണ്ടു പറഞ്ഞു: “നിങ്ങളിലായിരുന്നു എൻ്റെ വിശ്വാസം മുഴുവൻ. എല്ലാം കൃത്യനിഷ്ടയോടെ ചെയ്തതു നിങ്ങൾ മാത്രമാണ് “.

നായകൻ പറഞ്ഞു: “ഈ നാടകത്തിൻ്റെ അരങ്ങേറ്റ ദിവസം, എൻ്റെ കല്യാണമാണ്.
അന്നു വരാൻ കഴിയാത്തതുകൊണ്ട്, പരിശീലനത്തിനെങ്കിലും കൃത്യ സമയത്ത് എത്താമെന്നു കരുതി!”

ജീവിതം എപ്പോഴും അസന്നിഗ്ദതകൾ നിറഞ്ഞതാണ്. ചിലപ്പോഴെങ്കിലും, എന്തു ചെയ്യണമെന്നറിയാതെ, മിഴിച്ചു നിൽക്കേണ്ടി വരും. നീണ്ട പരിശീലനത്തിനു ശേഷവും, അരങ്ങിലെത്തുമ്പോൾ, ഒന്നും ചെയ്യാനാവാതെ പകച്ചു നിൽക്കുന്നതിന് ആരേയാണു കുറ്റപ്പെടുത്തേണ്ടത് ? സ്വയം പഴിചാരിയിട്ടും കാര്യമില്ല. ആകസ്മീകതയെ അങ്ങനെതന്നെ അംഗീകരിക്കാനും, അതിജീവന ശേഷിക്കനുസരിച്ചു സാവധാനം മറികടക്കാനുമേ സാധിക്കൂ.

കണക്കു കൂട്ടലുകളും, റിഹേഴ്സലുകളും അമ്പേ പരാജയപ്പെടുമ്പോഴും, ജീവിതത്തിൻ്റെ ഒഴുക്കു നിലയ്ക്കാൻ പാടില്ല. അപ്രതീക്ഷിതമായതു കണ്ട് , എല്ലാവരും പകച്ചു നിൽക്കുമ്പോഴും, തൻ്റെ വഞ്ചി തുഴയാൻ ത്രാണിയുള്ളവനു മാത്രം അവകാശപ്പെട്ടതാണു വിജയം.

തെറ്റും ശരിയും എന്തിൻ്റെ അടിസ്ഥാനത്തിലാണു തീരുമാനിക്കുക?
പ്രത്യക്ഷത്തിലുള്ള ശരികളുടെയും തെറ്റുകകളുടെയും മറുപുറം അന്വേഷിക്കാത്തിടത്തോളം കാലം, സത്യം നിഗൂഢമായിരിക്കും. സാന്നിദ്ധ്യം ഉറപ്പുവരുത്തുന്നവരെല്ലാം, ചില നേട്ടങ്ങളിൽ കണ്ണു വച്ചിട്ടുണ്ടാകാം.., ഓരോ സാന്നിദ്ധ്യവും, കാര്യസാദ്ധ്യത്തിനു വേണ്ടിയുള്ള മുൻകരുലായിരുന്നു എന്നും വന്നേക്കാം?

അകന്നു നിൽക്കുന്നവരെല്ലാം, അനഭിമതരായിരിക്കണമെന്നില്ല. തനതു ശീലങ്ങളുടെയോ, രീതികളുടെയോ തുടർച്ചയാകാം അവരുടെ അകൽച്ച. ഒപ്പമില്ലാത്തവരുടെ വീര്യത്തേക്കാൾ പ്രയോജനം ചെയ്യുന്നത്, കൂടെയുള്ളവരുടെ സഹായങ്ങളാകും. അവയെ അവഗണിക്കാൻ ഇടയാകരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര