🌹 “ഇന്നത്തെ ചിന്താവിഷയം” 🌹 – 2024 | നവംബർ 08 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

അദ്ധ്വാനമാണ് ആരാധന
……………………………………….

ഒരാൾ, അതി മനോഹരവും, ഫലസമൃദ്ധവുമായ ഒരു കൃഷിയിടത്തിൻ്റെ മദ്ധ്യത്തിലൂടെ യാത്ര ചെയ്യുകയായിരുന്നു. വാഹനം നിർത്തി കൃഷിയിടത്തിനുള്ളിൽ പ്രവേശിച്ച അയാൾ, നിലം ഉഴുതു കൊണ്ടിരുന്ന കൃഷിക്കാരനോടു പറഞ്ഞു: “ദൈവം നിങ്ങളെ മനോഹരമായ ഒരു കൃഷിയിടം നൽകി, അനുഗ്രഹിച്ചിരിക്കുന്നു. നിങ്ങൾ ദൈവത്തോടു നന്ദിയുള്ളവനായിരിക്കണം”. കർഷകൻ പറഞ്ഞു: “താങ്കൾ പറഞ്ഞതു ശരിയാണ്. എനിക്ക് ദൈവത്തോട് ഏറെ കടപ്പാടുണ്ട്. പക്ഷെ, ഈ കൃഷിയിടം എൻ്റെ അദ്ധ്വാനത്തിൻ്റെ കൂടി ഫലമാണ് . അതിന് , നിങ്ങൾ എനിക്കു നന്ദി പറയണം. അദ്ധ്വാനമാണു്ണ് ആരാധന”.

വിളഞ്ഞു നിൽക്കുന്ന വയലുകൾ പങ്കുവയ്ക്കുന്നത് ദൈവത്തിൻ്റെ മഹത്വം മാത്രമല്ല, വിത്തിൻ്റെയും, വിശ്വാസത്തിൻ്റെയും, അദ്ധ്വാനത്തിൻ്റെയും മഹത്വം കൂടിയാണ്. വിത്തിൽ നിന്നും വിളവിലേക്കുള്ള ദൂരം ഏറെയാണ്. വിളഭൂമി വെറും അദ്ധ്വാനത്തിൻ്റെ ഭൂമിക മാത്രമല്ല. കഷകൻ കണ്ട പദ്ധതികളുടെയും, പ്രവർത്തനങ്ങളുടെയും സമരഭൂമി കൂടിയാണത്. ഭൂമി ചിലർക്കു് കളിസ്ഥലം,
ചിലർക്ക് ശ്മശാനം; മറ്റു ചിലർക്ക് മാലിന്യം നിറയ്ക്കാനുള്ള നിക്ഷേപ കേന്ദ്രം. അദ്ധ്വാനിക്കാനും, വിതയ്ക്കാനും, വളർത്താനും അറിയാവുന്നവന് അത് വിളഭൂമിയാണ് ; ഒപ്പം, വിശുദ്ധ ഭൂമിയും.

പരീക്ഷണങ്ങളെയും, സങ്കീർണതകളെയും ഇഷ്ടപ്പെടുന്നവർ, വരണ്ടുണങ്ങിയ നിലത്തിലും, അവസരങ്ങൾ കണ്ടെത്തും. സ്വന്തം മുദ്ര പതിപ്പിക്കും. പ്രദർശനം മാത്രം കണ്ടാൽ പോരാ, പ്രവർത്തനങ്ങൾ കൂടി കാണണം. അപ്പോഴേ, അദ്ധ്വാനത്തോടു് ആദരവു തോന്നൂ. എല്ലാ സിദ്ധികൾക്കും പിന്നിൽ, അനല്പമായ അദ്ധ്വാനവും അർപ്പണവും ഉണ്ടാകും. അദ്ധ്വാനികളെ ആദരിക്കുക മാത്രമല്ല ചെയ്യേണ്ടത്. അദ്ധ്വാനശീലം വളർത്തിയെടുക്കാനുമാകണം. അദ്ധ്വാനമാണ് ആരാധന! സർവ്വേശ്വരൻ സഹായിക്കട്ടെ. ഏവർക്കും നന്മകൾ നേരുന്നു. നന്ദി, നമസ്ക്കാരം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര