🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 30 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

സ്വന്തം ജീവിതത്തിൻ്റെ വിധാതാക്കളാകാം നമുക്ക്
——————————————————————————

വഴിയരികിൽ കുറെ ഉരുളൻ കല്ലുകൾ കൂട്ടിയിട്ടിരിക്കുകയായിരുന്നു. മുകളിൽ കിടന്നിരുന്ന ഏറ്റവും വലിയ കല്ലിനൊരു ചിന്ത: താൻ ഏറ്റവും മേലേ കിടക്കുന്നതു കൊണ്ടും, ഏറ്റവും വലിയതായതു കൊണ്ടും, ഒരു ദിവസം തനിക്കു നക്ഷത്രങ്ങളെ തൊടാനാകും. ഒരു ദിവസം ആ വഴി വന്ന ഒരു കുട്ടി, ഏറ്റവും മുകളിൽ കിടന്ന ആ വലിയ കല്ലെടുത്ത് അടുത്തുള്ള മാവിലെ മാമ്പഴം ലക്ഷ്യമാക്കി എറിഞ്ഞു. കല്ലു വിചാരിച്ചു : “തൻ്റെ സ്വപ്നം സാക്ഷാത്ക്കരിക്കപ്പെടാൻ പോകുകയാണ്. ഉടൻ തന്നെ തനിക്ക് നക്ഷത്രങ്ങളെ തൊടാനാകും” പക്ഷെ, കല്ല് മുകളിലേക്കു പോയതുപോലെ തന്നെ താഴേക്കു വന്ന് , ഒരു ചെളിക്കുണ്ടിൽ പതിച്ചു.

ഏറിയപ്പെടുന്ന കല്ലിന് , എറിയുന്നവൻ അതിനു കല്പിക്കുന്ന ലക്ഷ്യം മാത്രമേയുള്ളു. അതിനു തനതായ ഒരു ലക്ഷ്യമില്ല. മെയ്യനങ്ങാതെ, ചുരുണ്ടുകൂടി ഒരിടത്തു കിടക്കുന്നവർ കാണുന്നതു്ത് വെറും പകൽക്കിനാവുകൾ മാത്രമായിരിക്കും. കണ്ണു തുറന്നു സ്വപ്നം കാണാനുള്ള ത്രാണി പോലും അവർക്കുണ്ടാകണമെന്നില്ല. കണ്ണെത്തും ദൂരത്തുള്ളതെല്ലാം, കയ്യെത്തും ദൂരത്തുണ്ടെന്നു കരുതി അലസമായി കാത്തിരിക്കുന്നവർ, അവസാനം ചെളിക്കുണ്ടിൽത്തന്നെ ചെന്നവസാനിക്കും. അകലങ്ങളിലേക്കുള്ള യാത്രകൾക്ക്, ഉൾപ്രേരണയും, ഊർജ്ജസ്വലതയും, ലക്ഷ്യബോധവും ആവശ്യമാണ്.

വ്യക്തമായ ലക്ഷ്യബോധത്തോടെ നിരന്തരം ഉദ്യമങ്ങൾ നടത്തുന്നവർക്കു മാത്രമേ അകലങ്ങളിലുള്ള നക്ഷത്രങ്ങളിൽ എത്തിച്ചേരാനാകൂ. സ്വന്തമായ കാഴ്ചപ്പാടുകളും, മാർഗ്ഗരേഖകളും, കർമ്മപദ്ധതികളും അതിനാവശ്യമാണ്. അതില്ലാത്തവരെല്ലാം, വഴിയരികിലും, പാതവക്കിലും അടിഞ്ഞു കൂടും. ഒരനക്കവുമില്ലാതെ, അവിടെക്കിടന്നവർ ആയുസ്സു പാഴാക്കും. സ്വന്തം ജീവിതത്തിൻ്റെ വിധാതാക്കളാകുവാൻ കഴിയുന്നവർക്കു മാത്രമേ, സ്വപ്നങ്ങൾ സാക്ഷാത്ക്കാരിക്കാനാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര