🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 07 | ശനി ✍ പ്രൊഫസ്സർ എ.വി. ഇട്ടി മാവേലിക്കര

അർത്ഥമില്ലാത്ത കുറിപ്പടികൾ

ഡോക്ടറുടെ പരിശോധന തുടരുകയാണ്. പല നിലവാരത്തിലുമുള്ള ആളുകൾ അദ്ദേഹത്തെ കണ്ട് ഇറങ്ങിപ്പോകുന്നു. അവസാനം, മെലിഞ്ഞുണങ്ങിയ ഒരു മദ്ധ്യവയസ്ക്കൻ്റെ ഊഴം വന്നു. പരിശോധനയ്ക്കു ശേഷം, ഡോക്ടർ അയാൾക്കു മരുന്നുകൾ കുറിച്ചു കൊടുത്തു. ഓരോന്നിൻ്റെയും കൂടെ, ‘ഒന്നു വീതം ഭക്ഷണത്തിനു ശേഷം മൂന്നു നേരം’ എന്നെഴുതിയിട്ടുണ്ട്.  അയാൾ വിഷണ്ണനായി തിരിഞ്ഞു നിന്നു ഡോക്ടറോടു പറഞ്ഞു: “ഡോക്ടറെ, മൂന്നു നേരം ക്രമമായി ഭക്ഷണം കഴിക്കാനുണ്ടായിരുന്നെങ്കിൽ, ഞാനിവിടെ വരേണ്ടി വരികയില്ലായിരുന്നു”.

ഒന്നും മനസ്സിലാകാതെ എഴുതി വയ്ക്കുന്ന കുറിപ്പടികളാണ് ജീവിതത്തെ അർത്ഥരഹിതവും, പ്രശ്നബാധിതവും ആക്കുന്നത്. ആഹാരം അലങ്കാരമാകുന്നവനും, അത്യാവശ്യമാകുന്നവനും തമ്മിലുള്ള വ്യത്യാസം മനസ്സിലാക്കാനും പ്രതിവിധി കാണാനും നമുക്കു കഴിഞ്ഞിരുന്നെങ്കിൽ? ആരാണെന്നറിഞ്ഞു വേണം വിളമ്പാൻ: അത് അറിവായാലും ആഹാരമായാലും. ആഹാരമില്ലാത്തവന് അറിവു വിളമ്പിക്കൊടുക്കുന്നതിലോ, ആരോഗ്യ പരിപാലനത്തിനുള്ള മരുന്നു കുറിച്ചു നൽകുന്നതിലോ ഒരു കാര്യവുമില്ല. അർത്ഥമില്ലാത്ത കുറിപ്പടികൾ എഴുതാതിരിക്കാനെങ്കിലും നമുക്കു ശ്രദ്ധിക്കാം?

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര