🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 18 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

ഉള്ളിൽ ഉദിക്കട്ടെ സൂര്യൻ
——————————————–

അന്യായമായി ആളുകളെ തടങ്കലിൽ പാർപ്പിച്ചിരുന്ന കൂട്ടത്തിൽ ഒരു ഇരുമ്പു പണിക്കാരനും ഉണ്ടായിരുന്നു. താഴുനിർമ്മാണ വിഗദഗ്ദനായിരുന്നു അയാൾ. ദു:ഖാർത്തയായ അയാളുടെ ഭാര്യ, രാജാവിനെക്കണ്ട് അനുദിന പ്രാർത്ഥനയ്ക്കു് തൻ്റെ ഭർത്താവിനൊരു വിരിപ്പു നൽകാൻ അനുമതി നൽകണമെന്ന് അപേക്ഷിച്ചു. ആവശ്യം ന്യായമെന്നു കണ്ട രാജാവ്, അവരുടെ അപേക്ഷ അംഗീകരിച്ചു.

ഒരു ദിവസം, തൻ്റെ വിരിപ്പിൽ തുന്നിചേർത്തിരുന്ന അസാധാരണമായ ഒരു രൂപം അയാളുടെ ശ്രദ്ധയിൽപ്പെട്ടു. തന്നെ പൂട്ടിയിട്ടിരിക്കുന്ന താഴിൻ്റെ ഘടനയാണതെന്ന് അയാൾക്കു മനസ്സിലായി. അന്നു മുതൽ, താക്കോലുണ്ടാക്കേണ്ടതിനായുള്ള പരിശ്രമത്തിലായി ആയാൾ. അവസാനം, അയാൾ അതിൽ വിജയിച്ചു. പിറ്റേ രാത്രി അയാൾ ജയിൽ ചാടി രക്ഷപെട്ടു.

അഭിലാഷങ്ങൾക്കും ആഗ്രഹങ്ങൾക്കും കുറുകെ, ഇരുമ്പഴികൾ വയ്ക്കുമ്പോൾ, തടവറ രൂപപ്പെടുകയായി. ജയിൽ ഒരു സ്ഥലമല്ല. അതൊരു മാനസിക അവസ്ഥയാണ്. കുറ്റവാളികൾ മാത്രമല്ല തടവറയിലെ അന്തേവാസികൾ; പാറാവുകാരും തടവിലാണ്. കാലാവധി കഴിഞ്ഞു വിട്ടയയ്ക്കപ്പെടുന്ന കുറ്റക്കാരനാണോ, അതോ, ആജീവനാന്തം അവിടെയായിരിക്കുന്ന കാവൽക്കാരനാണോ യഥാർത്ഥത്തിൽ ജീവപര്യന്തം അനുഭവിക്കുന്നതു്?

സ്വയം നിർമ്മിക്കുന്ന തടവറകളിലാണു പലരുടെയും ജീവിതം. കൊടിയടയ്ക്കപ്പെട്ട വാതിലുകളുടെ പിന്നിലിരുന്ന് ആരും കാണാതെ കരഞ്ഞു തീർക്കേണ്ടതല്ല ഈ ജീവിതം. മറിച്ച്, പുറത്തെ സൂര്യോദയം കാണാനാകണം. അതിന്, അവനവൻ്റെ ഉള്ളിൽ ഒരു സൂര്യൻ ഉദിക്കണം. പ്രതിവിധികൾ ഇല്ലാത്ത ഒരു പ്രതിസന്ധിയും ഈ ഉലകിലില്ല. പരിമിതികൾക്കുള്ളിൽ നിന്നുകൊണ്ട് പരിഹാരം കണ്ടെത്താനാകണമെന്നു മാത്രം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര