🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് |12 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

നല്ല മനസ്സോടെ നൽകാൻ ആകട്ടെ

മുല്ല നസറുദ്ദീൻ, സുഹൃദ് സന്ദർശനത്തിനൊരുങ്ങി നിൽക്കുമ്പോഴാണ് ഒരു പഴയ കാല സുഹൃത്ത് തന്നെ കാണാനെത്തിയത് . ക്ഷേമാന്വേഷണൾക്കു ശേഷം, അവർ രണ്ടു പേരും കൂടി, സന്ദർശനത്തിനിറങ്ങി. സുഹൃത്തിൻ്റെ വസ്ത്രം മുഷിഞ്ഞിരുന്നതു കൊണ്ട് , മുല്ല, തനിക്കു രാജാവിൽ നിന്നും സമ്മാനമായി കിട്ടിയ മേലങ്കി അദ്ദേഹത്തിന് അണിയാൻ കൊടുത്തു. ആ മേലങ്കിയുടുത്ത സുഹൃത്തിൻ്റെ പ്രൗഢി മുല്ലയിൽ അസൂയയും അസ്വസ്ഥതയും ഉളവാക്കി. ആദ്യം അവർ ചെന്ന വീട്ടിൽ, മുല്ല സുഹൃത്തിനെ പരിചയപ്പെടുത്തി: “ഇതെൻ്റെ ബാല്യകാല സുഹൃത്ത്; ഇദ്ദേഹം ധരിച്ചിരിക്കുന്ന കുപ്പായം എൻ്റേതാണ് !” അതു കേട്ട സുഹൃത്തിൻ്റെ മുഖത്തു വെളിപ്പെട്ട അസ്വസ്ഥത മനസ്സിലാക്കിയ മുല്ല, അതു നാക്കിൻ്റെ പിഴവാണെന്നു പറഞ്ഞ് സ്വയം ന്യായീകരിച്ചു.

അടുത്ത വീട്ടിൽ ചെന്നപ്പോൾ മുല്ല പറഞ്ഞു: “ഇതെൻ്റെ സുഹൃത്തു്. ഇദ്ദേഹം ധരിച്ചിരിക്കുന്ന കുപ്പായം എൻ്റേതല്ല”. ദേഷ്യപ്പെട്ടു സ്ഥലം വിടാനൊരുങ്ങിയ സുഹൃത്തിനോടു ക്ഷമ ചോദിച്ച മുല്ല, ഒരവസരം കൂടി ചോദിച്ചു. അടുത്ത വീട്ടിൽ ചെന്നപ്പോൾ, മുല്ലയുടെ പരിചയപ്പെടുത്തൽ ഇങ്ങെനെ ആയിരുന്നു: “ഇതെൻ്റെ അടുത്ത സുഹൃത്ത് . ഇദ്ദേഹത്തിൻ്റെ വസ്ത്രത്തേക്കുറിച്ച്, ഞാനൊന്നും പറയില്ല”.

അടിച്ചമർത്തുന്നതെല്ലാം അനുയോജ്യമായ സമയത്തു പുറത്തു വരും: അത്, വിചാരമാണെങ്കിലും, വികാരമാണെങ്കിലും. ചിന്തകളെ അർക്കും ഒളിച്ചുവെക്കാനാവില്ല. അവ വാക്കുകളായും പ്രവൃത്തികളായും എപ്പോഴെങ്കിലും പുറത്തു വരും? നാവല്ല പിഴയ്ക്കുന്നത് ; മനസ്സാണ് . ഉള്ളിലുള്ളതു പുറത്തു വരുന്നതിനുള്ള മാർഗം മാത്രമാണു നാവ്.

നല്ലതു കൊടുത്തതു കൊണ്ടായില്ല; നല്ല മനസ്സോടെ കൊടുക്കാൻ ആകണം. നിവൃത്തികേടു കൊണ്ടും, സാഹചര്യസമ്മർദ്ദം കൊണ്ടും ചെയ്യുന്ന നന്മകൾക്കു കണക്കു പുസ്തകമുണ്ടായിരിക്കും. ഏറ്റവും മികച്ചതു നൽകുന്നത് ആതിഥ്യമര്യാദ; തുറന്ന മനസ്സോടെ നൽകുന്നതു ഹൃദയത്തിൻ്റെ നന്മ.

നൽകുന്നതെന്തും തുറന്ന മനസ്സോടെ നൽകാനാകണം നമുക്ക്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര