🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 09 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ഹൃദയാർദ്രർ ആകാം നമുക്ക്

………………………………..

കാടിനടുത്തുള്ള ഒരു വീട്ടിൽ ഒരു വയോധിക പാർത്തിരുന്നു. ഒരു ദിവസം സന്ധ്യാ സമയത്ത് രണ്ടു വഴിപോക്കർ രാപാർക്കാൻ അനുവാദം ചോദിച്ച് അവരുടെ അടുത്തെത്തി. അവർ സന്തോഷത്തോടെ സമ്മതിച്ചു.

വഴിപോക്കർ ഭാണ്ഡത്തിൽ നിന്നും റവയെടുത്ത് ഭക്ഷണം പാകം ചെയ്യാനൊരുങ്ങുകയായിരുന്നു. “ഭക്ഷണം കഴിച്ചോയെന്ന് വയോധികയോടു ചോദിക്കേണ്ടാ; ഇതിൽ നിന്നൊരു പങ്കവർക്കു കൊടുക്കേണ്ടി വരും” എന്നു വഴിപോക്കർ പറയുന്നതു കേട്ട വയോധിക പറഞ്ഞു: “ഞാൻ ഉപ്പുമാവുണ്ടാക്കാൻ പോകുകയാണ്. നിങ്ങൾക്കു വേണോ?”

വഴിപോക്കർ അത്ഭുതപ്പെട്ടു. ഈ പാവം വയോധിക ഉപ്പുമാവുണ്ടാക്കുകയോ, ഞങ്ങൾക്കും കുടി തരികയോ?”, അവർ അന്യോന്യം ചോദിച്ചു. തങ്ങൾക്കും ഉപ്പുമാവു വേണമെന്നവർ പറഞ്ഞതു കേട്ട്, വയോധിക പാത്രം കഴുകി വെള്ളവുമൊഴിച്ച്, അടുപ്പത്തു വച്ചു. “ഇതിലിടാൻ അല്പം റവ വേണം, നിങ്ങളുടെ കൈയ്യിലുണ്ടോ?” അവർ വഴിപോക്കരോടു ചോദിച്ചു. അവർ കൊടുത്ത റവ, അടുപ്പത്തിരുന്ന പാത്രത്തിലിട്ട് ഉപ്പുമാവുണ്ടാക്കി അവർ കഴിച്ചു. വഴിപോക്കർക്കും നൽകി. അവരും കഴിച്ചു.

നമ്മിൽ പലരും ഈ വഴിപോക്കരേപ്പോലെയാണ് നമ്മെ സഹായിക്കുന്നവരേപ്പോലും തിരിച്ചു പരിഗണിക്കുവാൻ നാം പലപ്പോഴും തയ്യാറായിരിക്കില്ല. നമ്മുടെ സൗകര്യങ്ങളും ലഭനഷ്ടങ്ങളും മാത്രമാകും നമ്മുടെ മനസ്സിൽ. ആർക്കെങ്കിലും എന്തെങ്കിലും കൊടുത്താൽ, നമുക്കുള്ളതു കുറഞ്ഞു

പോകുമോ എന്നാകും നമ്മുടെ ആശങ്ക. ‘കൊടുക്കുന്തോറും ഏറിടും’ എന്ന ചൊല്ല്, വിദ്യയെക്കുറിച്ചു മാത്രമല്ല, വിഭവങ്ങളെക്കുറിച്ചും അന്വർത്ഥമാണ്.

കാരുണ്യം കാണിക്കാത്തവർക്ക് അതു തിരിച്ചു പ്രതീക്ഷിക്കാൻ എന്താണവകാശം?

കഴിയുന്നതു പോലെയൊക്കെ നമുക്കു ഹൃദയാർദ്രരാകാം. ആകുന്നതു പോലെയൊക്കെ കരുണ കാണിക്കാം. മറ്റു സഹായങ്ങളൊന്നും ചെയ്യാൻ കഴിഞ്ഞില്ലങ്കിൽ പോലും, ഹൃദയം തുറന്ന ഒരു പുഞ്ചിരിയെങ്കിലും, മറ്റുള്ളവർക്കു നൽകാം. ദൈവം സഹായിക്കട്ടെ.

സർവ്വേശ്വരൻ സഹായിക്കട്ടെ..

എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര