🌹 “ഇന്നത്തെ ചിന്താവിഷയം” 🌹 – 2024 | ജൂലൈ 31 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

നഷ്ടങ്ങളെ നേട്ടങ്ങളാക്കാം
————————————————

അപകടത്തിൽ ഇടതുകരം നഷ്ടപ്പെട്ടെങ്കിലും, ആ പത്തു വയസ്സുകാരൻ എങ്ങനെയെങ്കിലും ജൂഡോ പഠിക്കണമെന്ന് അതിയായി ആഗ്രഹിച്ചു. പ്രശസ്തനായ ഒരു ഗുരുവിൻ്റെ ശിഷ്യത്വം സ്വീകരിച്ച് അവൻ പരിശീലനം തുടങ്ങി. പക്ഷെ, മൂന്നു മാസം കഴിഞ്ഞിട്ടും, ഒരടവു മാത്രമേ ഗുരു അവനെ പഠിപ്പിച്ചുള്ളു. അവസാനം ധൈര്യം സംഭരിച്ച് അവൻ ഗുരുവിനോട് ചോദിച്ചു: “മറ്റsവുകൾ എന്നാണു പഠിപ്പിക്കുക?” ഗുരു പറഞ്ഞു: “നീ ഒരടവു മാത്രം പഠിച്ചാൽ മതി. അതിൻ്റെ ആവശ്യമേ നിനക്കുള്ളു!”. ഗുരുവിനെ വിശ്വസിച്ച് കുട്ടി പരിശീലനം തുടർന്നു.

ആദ്യ മത്സരമെത്തി. രണ്ടു പ്രതിയോഗികളെ നിഷ്പ്രയാസം തോൽപിച്ച് അവൻ തന്നെ ജേതാവായി. മടക്കയാത്രയിൽ ശിഷ്യൻ ഗുരുവിനോടു ചോദിച്ചു: “എങ്ങനെയാണ് ഒരടവു മാത്രം പഠിച്ച ഞാൻ ചാംപ്യനായത് ?” ഗുരു പറഞ്ഞു: “ഒന്ന്, നീ പഠിച്ചത് ഏറ്റവും ബുദ്ധിമുട്ടുള്ള അടവാണ്. രണ്ടാമത്, ആ അടവു പ്രതിരോധിക്കാനുള്ള ഏക മാർഗ്ഗം, നിൻ്റെ ഇടംകയ്യിൽ പിടിക്കുക എന്നതാണ്. നിൻ്റെ പ്രതിയോഗിക്കതു സാധ്യവുമായിരുന്നില്ല”.

നഷ്ടങ്ങൾ നേട്ടങ്ങളാകും: പിടിച്ചു കയറാനുള്ള മനസ്സും മന:ക്കട്ടിയുമുണ്ടെങ്കിൽ ! പകരം വയ്ക്കാനാവാത്ത വിജയങ്ങൾ നേടിയവരെല്ലാം, വൈപരീത്യങ്ങളെ അതിജീവിട്ടുള്ളവരാണ്.

സ്വയം അംഗീകരിക്കണം: എല്ലാ പോരായ്മകളാടും പ്രശ്നങ്ങളോടും കൂടെത്തന്നെ. അവിടെ നിന്നും പരിശ്രമത്തിൻ്റെ നാമ്പുകൾ പൊട്ടി മുളയ്‌ക്കും. തോൽക്കാൻ മനസ്സില്ലാത്തവനെ തോൽപിക്കാൻ ആരേക്കൊണ്ടും ആകില്ല. വീറും, വാശിയും, വിവേകവും ഒരുമിക്കുമ്പോൾ, വിജയത്തിലേക്കുള്ള വഴികൾ താനേ തെളിഞ്ഞു വരും.

ഗുണമറിയുന്ന ഒരു ഗുരുവുണ്ടാകണം; പിടിച്ചു നടത്താൻ മാത്രമല്ല, കൈപിടിക്കാനാവില്ലെന്നറിയുമ്പോഴും, കരുത്തായി കൂടെ നിൽക്കുവാൻ. കഴിവ് അളന്നെടുക്കുന്നവൻ മാത്രമല്ല, കുറവുകൾ നികത്തിയെടുക്കുന്നവൻ കൂടിയാണു ഗുരു.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര