🌧️ മഴത്തോഴി🌧️ (കവിത) ✍ സരസ്വതി വി.കെ ഒറ്റപ്പാലം

ഏകാന്തതകളിലെ തോഴി
അലസ നിമിഷങ്ങളിൽ ഞാൻ
അവളോട് സല്ലപിച്ചു.
എന്റെ നൊമ്പരം കേട്ട് അവൾ
പിടഞ്ഞു.
പൊട്ടിക്കരഞ്ഞു.
മതി വരുവോളം തേങ്ങി.
ആ തേങ്ങൽ
അരുവിയായ് പുഴയായ് പെയ്തിറങ്ങി
അല തല്ലി.
കണ്ണീർ കടലിൻ ആഴക്കയങ്ങളിൽ
ഉറവതൻ നിശബ്ദ സംഗീതമായ് നീ
മാറിയതും ഞാനറിവു.
സംഹാര താണ്ഡവമാടിയും
രൗദ്രഭാവത്തിൽ മൂർത്തിയായ്
നിന്നതും ഞാനറിവൂ.
ഭൂമിയാം ദേവിയെ നിത്യ സുന്ദരിയാം
സുമംഗലിയാക്കിയോ നിൻ
മൃദുസ്പർശം.
മഴത്തോഴീ… നിൻ
അലസാഗമനത്തിനായ്
എന്നും ഇവൾ കാത്തിരിപ്പൂ.
ഉർവരതയുടെ പുതുനാമ്പുകൾ
നിന്നിൽ മുളച്ചതും ഞാനറിവൂ.
നീയെൻ ആത്മ മിത്രമോ
നീയെൻ ആത്മ മിത്രമോ

സരസ്വതി വി.കെ ഒറ്റപ്പാലം