👬👫കുട്ടീസ് കോർണർ 👬👫 (അമ്പത്തിമൂന്നാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)മുല്ല തമാശ (B)പൊതു അറിവ്
(C)പദ്യം (D)പഴഞ്ചൊല്ലും കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ…😍

എന്ന് സ്വന്തം
ശങ്കരിയാന്റി.

👫A) ഹോജ മുല്ല തമാശ (11)

തിന്നാനുള്ള വക-വായിക്കാനുള്ള വക

ആട്ടിൻകരളും വാങ്ങി വീട്ടിലേക്കു മടങ്ങുകയായിരുന്നു മുല്ലാ. ആട്ടിൻകരളു കൊണ്ട്‌ ഒരു വിശേഷവിഭവമുണ്ടാക്കാനുള്ള കുറിപ്പടി ഒരു ചങ്ങാതി എഴുതിക്കൊടുത്തയച്ചത്‌ മറ്റേക്കൈയിലുമുണ്ട്‌. പെട്ടെന്ന് ഒരു പരുന്തു വന്ന് ആട്ടിൻകരളും കൊത്തിയെടുത്തു പറന്നു. ‘കൊണ്ടുപോ,കൊണ്ടുപോ!’ മുല്ലാ പരുന്തിനെ നോക്കി പറഞ്ഞു. ‘നിനക്കു കരളല്ലേ കൈയിൽക്കിട്ടിയുള്ളു; അതുകൊണ്ടു കറിവയ്ക്കാനുള്ള കുറിപ്പടി എന്റെ കൈയിലല്ലേ!’

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

1) വചനം – സംഭാഷണം, വാക്യം, ഉപദേശം

2) വർഗ്ഗം – സമുദായം, പക്ഷം, അദ്ധ്യായം

3) വർണ്ണം – നിറം, ജാതി, അക്ഷരം, അലങ്കാരം

4) വർഷം – ആണ്ട്, മഴ, മേഘം

5) വഴി – പാത, ഉപായം, മതം

6) വാരി – ജലം, വാരുക, കമുകിന്റെയും മറ്റും തടി

7) വിധി – കർമ്മം, പ്രവൃത്തി, കോടതിയുടെ തീർപ്പ്

8) ശുകം – തത്ത, വസ്ത്രം, ചേലാഞ്ചലം

9) ശുഭം – ഐശ്വര്യം, മംഗളം, ജലം

10) ശൃംഗം – കൊമ്പ്, കൊടുമുടി, മുകളറ്റം

📗📗

👫C) പണ്ടേ പ്രചാരത്തിലുള്ള പദ്യങ്ങൾ(22)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ പ്രാവിനെ കുറിച്ചൊരു കവിതയാണ്‌ കുട്ടീസ്. 😍

പ്രാവ്

പ്രാവേ പ്രാവേ പോകരുതേ
വാ വാ കൂട്ടിനകത്താക്കാം
പാലും പഴവും പോരെങ്കില്‍
ചോറും കറിയും ഞാന്‍ നല്‍കാം
കൊള്ളാം കുഞ്ഞേ നിന്നിഷ്ടം
തള്ളാന്‍ പാടില്ലെന്നാലും
ഞാനങ്ങോട്ടേക്കില്ലപ്പോള്‍
മാനം നോക്കിപ്പോകുന്നു

👫D) പഴഞ്ചൊല്ലുകളും വ്യാഖ്യാനവും (15)

1) കുറിക്കു വച്ചാൽ മതിൽക്കെങ്കിലും കൊള്ളണം:

മതിലിന്റെ മീതെ വച്ച കുറിയിൽ കൊണ്ടില്ലെങ്കിൽ, മതിലിൽ എങ്കിലും കൊള്ളണം (കുറി=ലക്‌ഷ്യം).
ചെറിയ ഫലമെങ്കിലും പ്രവൃത്തിക്ക് ഉണ്ടാവണം.

2) കുറുക്കൻ ചത്താലും കണ്ണ് കോഴിക്കൂട്ടിൽ. :

ചില ശീലങ്ങൾ മരണം വരെ തുടരും.

3) കെട്ടുപാടിനു കൊടുത്താൽ മുട്ടിനു കിട്ടും :
കെട്ടുപാട്=ശല്യം/ബുദ്ധിമുട്ട്. ചെയ്തതിനനുസരിച്ചു ശിക്ഷ.

4) കൈ വിട്ട കല്ലും, വായ് വിട്ട വാക്കും. :

വാക്കുകൾ എപ്പോഴും സുക്ഷിച്ചു പ്രയോഗിക്കണം, രണ്ടും തിരിച്ചെടുക്കാൻ പറ്റില്ല.

5) കടം വാങ്ങി ഇടെചെയ്യല്ല:

കൊക്കിലൊതുങ്ങുന്നതെ കൊത്താവൂ.
ചെയ്യാൻ കഴിയുന്ന കാര്യങ്ങൾ മാത്രമേ ഏറ്റെടുക്കാവൂ.

6) കൊക്കെത്ര കുളം കണ്ടതാ. :

ഒരു വ്യക്തിക്ക് ചിരപരിചയമുള്ള പ്രവൃത്തികളെ സൂചിപ്പുക്കുന്നു.

7) കൊമ്പൻ പോയതു മോഴക്കും വഴി :

കഴിവുള്ളവർ എന്തെങ്കിലും ചെയ്താൽ, കഴിവില്ലാത്തവനും ഗുണം.

8 )കോടാതെ കാണി കൊടുത്താൽ കോടി കൊടുത്ത പോലെ:

കോടാതെ=മടിക്കാതെ, കോടി=തുണി/വലിയ ഒരു സംഖ്യ. സന്തോഷത്തോടെ ചെയ്യുന്ന ചെറിയ കാര്യത്തിനും മഹിമയുണ്ട്.

9) ക്ഷീരമുള്ളോരകിടിൻ ചുവട്ടിലും ചോര തന്നെ കൊതുകിന് കൗതുകം. :

പശുവിന്റെ അകിട് നിറച്ച് പാലാണെങ്കിലും കൊതുകിനു അതിലല്ല താല്പര്യം. അതിന്റെ സ്വഭാവം ചോര കുടിക്കലാണ്. ചില ആളുകൾ ഇതുപോലെയാണ്. ശ്രേഷ്ഠമായതിനെ വർജ്ജിച്ചുകൊണ്ട് അല്ലാത്തതിന്റെ പിന്നാലെ പോകൂ എന്നത് അവരുടെ സ്വഭാവമാണ്.

10) ഗുണമുണ്ടെങ്കിൽ പണമില്ല, പണമുണ്ടെങ്കിൽ ഗുണമില്ല :

എല്ലാ കാര്യങ്ങളും ഒത്തുവരുന്നത്‌ വളരെ വിരളമാണ് എന്ന് പറയുന്ന ചൊല്ല്

📗📗

👫E) എളുപ്പത്തിൽ ഒരു ചിത്രം വരയ്ക്കാം (37)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖

👬👭👫👭👬👭👫👭👬👭