🌹 “ഇന്നത്തെ ചിന്താവിഷയം” 🌹 – 2025 | ജനുവരി 05 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

മനസ്സിനെ നിയന്ത്രിക്കാൻ പഠിക്കാം
———————————————————

ഭാര്യയും ഭർത്താവും, തടാകത്തിലുടെ ഒരു ചെറുവള്ളത്തിൽ യാത്ര ചെയ്യുകയായിരുന്നു. പെട്ടന്ന്, ശക്തമായ കാറ്റടിച്ച് ഓളമുണ്ടായി, വഞ്ചി മറിയുന്ന അവസ്ഥയിലായി. ഭാര്യ പേടിച്ചു ഭർത്താവിനോടു പറഞ്ഞു: “നമ്മൾ അക്കരയെത്തില്ല. വഞ്ചി മറിയും. നാമെന്തു ചെയ്യും?” ഭർത്താവു ശാന്തനായിത്തന്നെ ഇരുന്നു. ഭാര്യ ചോദിച്ചു: നിങ്ങൾക്കു പേടിയില്ലെ?”

ഭർത്താവ് തൻ്റെ കയ്യിലുണ്ടായിരുന്ന കത്തിയെടുത്തു ഭാര്യയുടെ കഴുത്തിൽ വച്ചു. ഭാവവ്യത്യാസമില്ലാതിരുന്ന ഭാര്യയോട് , അയാൾ ചോദിച്ചു: “നിനക്കു പേടിയില്ലെ?”‘ ഭാര്യ പറഞ്ഞു: “ഞാൻ എന്തിനാണു പേടിക്കുന്നത്. കത്തി, എന്നെ സ്നേഹിക്കുന്ന എൻ്റെ ഭർത്താവിൻ്റെ കയ്യിലല്ലെ ഇരിക്കുന്നത്?” ഭർത്താവു പറഞ്ഞു: “ഈ വഞ്ചിയും, കാറ്റും, ഓളവുമെല്ലാം, നമ്മെ സ്നേഹിക്കുന്ന ദൈവത്തിൻ്റെ കയ്യിലാണിരിക്കുന്നത്. എന്തു സംഭവിച്ചാലും, അതു നമ്മുടെ നന്മയ്ക്കായിരിക്കും?”

നിയന്ത്രണാതീതമായ കാര്യങ്ങളെക്കുറിച്ച്, വ്യാകുലപ്പെടുന്നതിൽ അർത്ഥമില്ല. അവിടെ നമുക്ക് ഒന്നും ചെയ്യാൻ സാദ്ധ്യമല്ല. മറിച്ച്, നിയന്ത്രണാധീനമായ കാര്യങ്ങളെക്കുറിച്ചു സങ്കടപ്പെടുന്നതിലും അർത്ഥമില്ല. അവിടെ നമുക്കെന്തെങ്കിലും ചെയ്യാൻ കഴിയും? പിന്നെന്തിനാണ് അന്യവശ്യമായ ആധി?” പ്രതിസന്ധികളുടെ ആഴത്തേക്കാൾ, അവയോടുള്ള സമീപനത്തിലെ അപക്വതയാണ് സാഹചര്യങ്ങളെ കൂടുതൽ വഷളാക്കുന്നത്.

നിയന്ത്രിക്കാനാകാത്ത സാഹചര്യങ്ങളെക്കാൾ അപകടകരം, നിയന്ത്രിക്കാനാകാത്ത മനസ്സാണ്. നിസ്സഹായനാണ് എന്നുറുപ്പുള്ള സാഹചര്യങ്ങളിൽ സംയമനത്തോടെ
ഇരിക്കുന്നതാണുചിതം. എന്നാൽ, സാമാന്യ ബുദ്ധി കൊണ്ടോ, സാഹസികത
കൊണ്ടോ, സാഹചര്യങ്ങളെ വരുതിയിലാക്കാൻ കഴിവുണ്ടെങ്കിൽ, അതിനായി ഒരുമ്പെട്ടിറങ്ങാൻ, സന്നദ്ധതയും ധൈര്യവുമുണ്ടായിരിക്കുകയും വേണം?

ശാന്തമായി ചിന്തിച്ചാൽ, പരിഹരിക്കാവുന്നവയായിരിക്കും പല പ്രശ്നങ്ങളും. ഒന്നു മനസ്സുവെച്ചാൽ പ്രതിവിധി കണ്ടെത്താനാകുന്നവയായിരക്കും അവ. അവിടെ പ്രശാന്തതയാണു പ്രതിവിധി. ഓരോ കാര്യത്തിനും, അതർഹിക്കുന്ന. പ്രാധാന്യം മാത്രം നൽകുവാൻ കഴിയുന്നതാണ്, മനസ്സിൻ്റെ പക്വത. അതിനെ നിയന്ത്രിക്കാൻ നാം പഠിക്കുകയും വേണം

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര