👬👫കുട്ടീസ് കോർണർ 👬👫 (അറുപത്തിയൊന്നാം വാരം)

ഹായ് കുട്ടീസ്!!
ഈ ആഴ്ച നമുക്ക്A) തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം(വാക്കുകളെ കുറിച്ചൊരു വിശദീകരണം),
C) സ്ഥലനാമ കഥകൾ പിന്നെ കുറച്ചു D)കടംകഥകളും,
കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..😍

എന്ന് സ്വന്തം
ശങ്കരിയാന്റി.

👫A) തീപ്പെട്ടി ചിത്രം (6)

റോഡ് റോളർ

റോഡ് റോളറിന്റെ ചിത്രമുള്ള തീപ്പെട്ടി ചേർക്കുന്നു

റോഡുകളും വിമാനങ്ങൾക്കുള്ള റൺവേകളും പോലുള്ളവ നിർമ്മിക്കുമ്പോഴും അവ പുതുക്കി പണിയുമ്പോഴും അവയുടെ പ്രതലം നിരപ്പാക്കാനും അമർത്തി ബലപ്പെടുത്താനും ഉപയോഗിക്കുന്ന, മനുഷ്യർ ഉരുട്ടുന്നതോ, യന്ത്രസംവിധാനത്തോടേയുള്ളതോ ആയ ഉരുളുകളെയാണ് റോഡ് റോളർ(Road Roller) എന്നു പറയുന്നത്.
ഇന്ത്യയിൽ മീഡിയം മോട്ടോർ വിഭാഗത്തിൽ ഉൾപെട്ടിരിക്കുന്ന വാഹനമായ ഇതിന് ഏകദേശം 8.12 ടൺ ഭാരമുണ്ട്. ഉരുക്കുകൊണ്ട് പൂണ്ണമായും നിർമ്മിച്ചിരിക്കുന്ന ഈ വാഹനത്തിന് ഓറഞ്ച് നിറമാണു നിയമപരമായി നൽകിയിരിക്കുന്നത്. ഇതിൽ ഡ്രൈവർക്കു മാത്രമാണ് ഇരിപ്പിടം ഉള്ളത്. 12 ലിറ്റർ എഞ്ചിൻ ഓയിൽ ഉൾക്കൊള്ളൂന്ന 3600 സിസി, 4 സിലിണ്ടറുള്ള എഞ്ചിനാണുള്ളത്. ബാറ്ററി ഉപയോഗിച്ചുള്ള സെൽഫ് സ്റ്റാർട്ട് കൂടാതെ ലിവർ ഉപയോഗിച്ചു കറക്കിയും പ്രവർത്തിപ്പിക്കാം. ഡീസൽ ടാങ്കിന്റെ അളവ് 72 ലിറ്ററാണ്. നാല് ഗിയറുകളാണ് ഇതിനുള്ളത്. ക്ലച്ച് ഉപയോഗിച്ച് വേഗത ക്രമീകരിക്കാവുന്ന ഇതിന്റെ പരമാവധി വേഗം ഏഴര കിലോമീറ്റർ വരെയാണ്. സാധാരണ സാഹചര്യങ്ങളിൽ 4 കിലോമീറ്റർ വരെ മൈലേജ് ലഭിക്കുന്ന ഇതിന് ജോലി സമയത്ത് ലഭിക്കുന്നത് 3 കിലോമീറ്റർ മൈലേജ് മാത്രമാണ്. ഒരു ദിവസം 8 മണിക്കൂർ വീതം പണി ചെയ്താൽ ഒരു മാസം തികയുമ്പോഴേയ്ക്കും എഞ്ചിൻ ഓയിൽ മാറ്റേണ്ടതാണ്. 5 വർഷം കൂടുമ്പോൾ എഞ്ചിൻ പണിയും നടത്തേണ്ടതാണ്. ചക്രങ്ങളുടെ ആയുസ്സ് 20 കൊല്ലം മാത്രമാണ്. ചക്രങ്ങൾക്ക് തേയ്മാനം സംഭവിച്ചാൽ പുതിയവ മാത്രമേ ലഭിക്കുകയുള്ളൂ. ഇക്കാലത്ത് കൂടുതൽ കൃത്യതയോടെ വിശാലമായ പ്രതലങ്ങൾ വേഗത്തിൽ നിരപ്പാക്കാനും ഉറപ്പിക്കാനും കഴിയുന്ന ആത്യാധുനിക റോഡ് റോളർ സംവിധാനങ്ങൾ നിലവിൽ വന്നിട്ടുണ്ട്.

📗📗

👫B) പദ ലളിതം

നാകം

നാകമെന്ന പദം സ്വർഗമെന്നർത്ഥത്തിൽ കേൾക്കാത്തവർ ചുരുക്കം. എങ്ങനെ ആ പദത്തിന് സ്വർഗമെന്നർത്ഥം കിട്ടിയെന്ന് ചിന്തിച്ചു നോക്കു.സംസ്ക്യത പുല്ലിംഗശബ്ദമായ നാകം, ന+ അകം എന്നാണ് പിരിച്ചെഴുതേണ്ടത്.അകത്തിന് പാപമെന്നർത്ഥം. ന യ്ക്ക് ഇല്ലയെന്നും. അപ്പോൾ പാപമില്ലാത്ത ,സുഖമുള്ള സ്ഥലം നാകം ( സ്വർഗo). അപ്പോൾ നാകീ (ദേവൻ),നാകു(വാല്മീകി ) ഇവ നമുക്ക് ചിന്തിച്ചു നോക്കാവുന്നതെയുള്ളു.

📗📗

👫C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ 😍

തൃശ്ശിവപേരൂര്‍

തൃശ്ശിവപേരൂര്‍, അഥവാ, തൃശ്ശൂരിന്റെ നാമോത്പത്തി ശൈവമത വ്യാപനവുമായി ബന്ധപ്പെട്ടിരിക്കുന്നു. തിരു ശിവ പെരിയ ഊര്‍ ആണ് തൃശ്ശിവപേരൂര്‍ ആയി പരിണമിച്ചതത്രെ. തിരു എന്നത് ആദരസൂചകമായി ഉപയോഗിക്കുന്ന ഒരു ഉപസര്‍ഗ്ഗമാണ്. പെരിയ ഊര്‍ എന്നാല്‍ വലിയ ഊര് (സ്ഥലം) എന്നര്‍ത്ഥം.

📗📗

👫D) കടങ്കഥകൾ (17)

1) എന്റെ പായ മടക്കീട്ടും മടക്കീട്ടും തീരുന്നില്ല-

ആകാശം.

2) എന്റെ തോട്ടത്തിലെ പൂക്കള്‍ എണ്ണീട്ടും എണ്ണീട്ടും തീരുന്നില്ല-

നക്ഷത്രങ്ങള്‍.

3) എണ്ണക്കുഴിയില്‍ ഞാവല്‍പ്പഴം-

കൃഷ്ണമണി.

4) എങ്ങു നോക്കിയാലും കാലില്ലാ പന്തല്‍-

ആകാശം.

5) എപ്പോഴും വട്ടത്തില്‍ ഒരേ നടത്തം-

വാച്ചിന്റെ സൂചി.

6) എല്ലാം തിന്നും. എല്ലാം ദഹിക്കും, വെള്ളം കുടിച്ചാല്‍ ചത്തു പോകും-

തീ.

7) എല്ലാ കാളയ്ക്കും മണ്ടയ്ക്കു കൊമ്പ്. എന്റെ കാളയ്ക്കു പള്ളയ്ക്കു കൊമ്പ്-

കിണ്ടി.

8) എന്റെ നാക്കില്‍ നിനക്കു വിരുന്ന്-

വാഴയില.

9) എല്ലാം കാണും, എല്ലാം കേള്‍ക്കും, മറുപടിയില്ല-

കണ്ണും കാതും.

10) എല്ലുണ്ടതിന് കാലുണ്ടതിന്, വര്‍ഷം തടുക്കാന്‍ കഴിവുണ്ടതിന്-

കുട .

📗📗

👫E) എളുപ്പത്തിൽ ഒരു ചിത്രം വരയ്ക്കാം (45)

അവതരണം:

സൈമ ശങ്കർ, മൈസൂർ

➖➖➖➖➖➖➖➖➖➖➖
👬👭👫👭👬👭👫👭👬👭