🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 05 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ഏതു ചെറുതും വലുതാണ്
———————————————-

ധ്യാന പരിശീലനത്തിന്നു വന്ന ശിഷ്യന് ഒരു പാത്രം കൊടുത്തിട്ടു ഗുരു പറഞ്ഞു: “ഇതിൽ മുഴുവൻ കല്ലുകൾ നിറയ്ക്കുക”. പാത്രത്തിൽ കല്ലുകൾ നിറച്ച് അടുത്തെത്തിയ ശിഷ്യനോടു ഗുരു ചോദിച്ചു: “അതിനകത്ത് ഇനി ഒന്നും കൊള്ളില്ലെ?” ശിഷ്യൻ പറഞ്ഞു: “ഇല്ല ഗുരോ”. ഗുരു കൈ നിറയെ കുന്നിക്കുരു കൊടുത്തിട്ടു പറഞ്ഞു: “ഇതു കൂടി അതിൽ ഇടൂ”. കുന്നിക്കുരു പാത്രത്തിൽ ഇട്ടതിനു ശേഷം ശിഷ്യൻ പറഞ്ഞു: “ഇപ്പോൾ മുഴുവനും നിറഞ്ഞു”. ഗുരു കുറെ പൂഴി വാരി ശിഷ്യൻ്റ കയ്യിൽ കൊടുത്തിട്ടു പറഞ്ഞു: “ഇതു കൂടി അതിൻ നിറയ്ക്കൂ”. അതും ചെയ്തതിനു ശേഷം ശിഷ്യൻ പറഞ്ഞു: “ഗുരോ, ഇനി അതിൽ ഒന്നും കൊള്ളില്ല!”. ഒരു ഗ്ലാസ്സിൽ കുറച്ചു വെള്ളം അവൻ്റെ കയ്യിൽ കൊടുത്തിട്ടു ഗുരു പറഞ്ഞു: “ഇതു കൂടി അതിൽ ഒഴിയ്ക്കൂ”. അതും പാത്രത്തിൽ ഒഴിച്ചതിനു ശേഷം, അന്തിച്ചു നിന്ന ശിഷ്യനോടു ഗുരു പറഞ്ഞു: “ഇനി താൻ പോയി ധ്യാനം അഭ്യസിച്ചു കൊള്ളൂ”.

എന്തിനേയും സ്വീകരിക്കാനും ഉൾക്കൊള്ളാനുമുള്ള സഹിഷ്ണതയും, ന്നന്നദ്ധതയുമാണ് ഒരാളുടെ ജീവിതത്തെ സാർഥകമാക്കുന്നത്. സ്ഥിരം പ്രവർത്തനങ്ങളും, സൗഹൃദങ്ങളും, ശൈലികളും രൂപപ്പെടുത്തി, മറ്റൊന്നിനെയും സ്വീകരിക്കാനാവാത്ത വിധം മനസ്സിനെ പരുവപ്പെടുത്തുന്നതിൽ മനോസുഖത്തിൻ്റെ ഒരു മന:ശാസ്ത്രം ഒളിഞ്ഞിരിപ്പുണ്ട്.

ചെറുതിനു മാത്രം നിറയ്ക്കാവുന്ന ചില വിടവുകളുണ്ട് ! വലുതുകൾ തമ്മിലുള്ള കൂടിച്ചേരലുകളിൽ, അവർ പോലുമറിയാതെ രൂപപ്പെടുന്ന ചില അകലണ്ടളുണ്ട്. നാം കെട്ടിപ്പൊക്കുന്ന ഓരോ സൗധത്തിൻ്റെയും വിടവുകൾക്കിടയിലിരിക്കുന്ന മണൽത്തരികൾക്ക്, അവയുടേതായ ചില കഥകൾ പറയാനുണ്ടാകും.

മണൽത്തരികൾക്കു പകരം നിൽക്കാൻ വെള്ളാറം കല്ലുകൾക്കാകില്ല. വെള്ളാറം കല്ലുകളുടെ ദൗത്യം നിറവേറ്റാൻ കരിങ്കൽ പാറകൾക്കുമാകില്ല! ഒന്നു ചെറുതാകാനും, താഴ്ന്നു കൊടുക്കാനും ശീലിച്ചാൽ, ഏവർക്കും തനതു സ്ഥാനങ്ങൾ കണ്ടെത്താനാകും. അവഗണിച്ചു മാറ്റി നിർത്തുന്ന പലരും, ഒഴിവാക്കാനാകാത്ത ദൗത്യങ്ങളിലൂടെ നമ്മെ അത്ഭുതപ്പെടുത്തി എന്നു വരാം. ഓരോ ജീവിതവും ഓരോ നിയോഗമാണ്. അതിനെ, വലുപ്പച്ചെറുപ്പത്തിൻ്റെയോ, ഏറ്റക്കുറച്ചിലിൻ്റെയോ ഏകകം കൊണ്ട് അളക്കാൻ ശ്രമിക്കരുത് .

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര