🌹 “ഇന്നത്തെ ചിന്താവിഷയം” 🌹 – 2024 | ജൂൺ 05 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ആയുസ്സിനെ അർത്ഥപൂർണ്ണമാക്കാം

ഒരു സന്യാസി, രാജകൊട്ടാരത്തിൽ കയറിച്ചെന്നു. നടപ്പിലെ ഗൗരവവും പ്രൗഡിയും കണ്ട്, ആരും അദ്ദേഹത്തെ തടഞ്ഞില്ല. രാജസന്നിധിയിൽ എത്തിയ സന്യാസി രാജാവിനോടു പറഞ്ഞു: ” ഇന്ന് ഈ സത്രത്തിൽ അന്തിയുറങ്ങാൻ എനിക്കൊരു മുറി തരണം?”

രാജാവു പറഞ്ഞു: ” ഇത് സത്രമല്ല, എൻ്റെ കൊട്ടാരമാണ് !” സന്യാസി ചോദിച്ചു: “താങ്കൾക്കു മുൻപ് ഇവിടെ ആരാണു താമസിച്ചിരുന്നത്?” “എൻ്റെ അച്ഛൻ”, രാജാവു മറുപടി പറഞ്ഞു. “അതിനു മുൻപ് ആരായിരുന്നു ഇവിടെ താമസിച്ചിരുന്നത് ”, സന്യാസി വീണ്ടും ചോദിച്ചു. “എൻ്റെ മുത്തച്ഛൻ”, രാജാവ് ആ ചോദ്യത്തിനും മറുപടി നൽകി. അതു കേട്ട സന്യാസി പറഞ്ഞു: “അപ്പോൾപ്പിന്നെ, ഇതു സത്രമല്ലാതെ മറ്റെന്താണ്?”

അമൂർത്തമായവയ്ക്കു മാത്രമാണ് ശാശ്വതമായ നിലനില്പുള്ളത്. മൂർത്തമായവയെല്ലാം താൽക്കാലികങ്ങൾ മാത്രം. വാസവും ജോലിയുമെല്ലാം, അസ്ഥിരമായ സങ്കല്ലങ്ങൾ മാത്രം. ജീവിതം തന്നെ താൽക്കാലികമാകുമ്പോൾ, എങ്ങനെയാണു മേൽവിലാസം സ്ഥിരമാകുന്നത്?

സ്വന്തമെന്നു നാം പറയുന്ന നേട്ടങ്ങളെല്ലാം, താൽക്കാലിക ജീവിതചക്രത്തിൻ്റെ പരിധിക്കുള്ളിലാണ് രൂപപ്പെടുന്നത്. ഒരാളുടെ ജീവിതത്തിന് വില നിശ്ചയിക്കുന്നത് അയാളുടെ നേട്ടങ്ങളല്ല, കാലത്തെ മറികടക്കുന്ന കർമ്മ പുണ്യങ്ങളാണ്. കാലശേഷവും കൈവിളക്കുകളായി നില നിൽക്കുന്നവ അവ മാത്രം. വാരിയെടുക്കുന്ന മുത്തുകളെക്കാൾ, വാരി വിതറുന്ന വിത്തുകളാണ് ഒരായസ്സിൻ്റെ തുടർച്ചയും, സ്ഥിരതയും നിശ്ചയിക്കുന്നത്.

എല്ലാം മാറ്റത്തിനു വിധേയമാണ്: കാലവും, പ്രകൃതിയും, ബന്ധങ്ങളും, കാഴ്ചപ്പാടുകളുമെല്ലാം. ഒന്നും സ്ഥായിയായ ഭാവം പുലർത്താറില്ല. ഉദ്വേഗവും ഉന്മാദവുമെല്ലാം, കാല പ്രവാഹത്തിൽ അപ്രത്യക്ഷമകും. തളർച്ചയും, വളർച്ചയും, തനതായ ഇടവേളകളിൽ രൂപമാറ്റത്തോടെ പ്രത്യക്ഷപ്പെട്ടുകൊണ്ടിരിക്കും. പത്തു വർഷത്തിനു മുമ്പുള്ള ഒരു ദുരനുഭവവും, ഇപ്പോൾ ആ അർത്ഥത്തിൽ പ്രസക്തമാകണമെന്നില്ല. ഇന്നുള്ള ദു:ഖങ്ങളിൽ പലതും നാളയുടെ സന്തോഷങ്ങളായി മാറിക്കൂടെന്നില്ല. ഒന്നിനേയും അധികം ആശ്ലേഷിക്കാതിരിക്കുക. എന്നാൽ, ജീവിതം ആർത്ഥപൂർണ്ണമാകും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍