വാർത്തകൾ ഒറ്റനോട്ടത്തിൽ – 2024 | ഒക്ടോബർ 22 | ചൊവ്വ കപിൽ ശങ്കർ

തനിക്ക് വിശ്രമിക്കാന്‍ സമയമില്ലെന്നും ഇന്ത്യയുടെ സ്വപ്നങ്ങള്‍ പൂര്‍ത്തികരിക്കാനുള്ള പരിശ്രമത്തിലാണ് തന്റെ സര്‍ക്കാരെന്നും പ്രധാനമന്ത്രി നരേന്ദ്ര മോദി. കഴിഞ്ഞ അഞ്ചുവര്‍ഷം ആഗോളതലത്തില്‍ വിവിധ ആശങ്കകളുയര്‍ന്ന സമയമാണെന്നും ആ ആശങ്കകള്‍ക്കിടയിലും ഇന്ത്യ പ്രതീക്ഷയുടെ കിരണമായെന്നും പ്രധാനമന്ത്രി അഭിപ്രായപ്പെട്ടു. ഇനി മുതല്‍ വിജയത്തിന്റെ അളവുകോല്‍ ‘നമ്മള്‍ നേടാന്‍ ആഗ്രഹിക്കുന്നതെന്താണോ അതായിരിക്കുമെന്നും 2047-ഓടെ ഇന്ത്യയെ വികസിത രാജ്യമാക്കുക എന്ന കാഴ്ചപ്പാട് ഈ ചിന്താഗതിയുടെ ഭാഗമാണെന്നും പ്രധാനമന്ത്രി കൂട്ടിച്ചേര്‍ത്തു.

കല്‍പാത്തി രഥോത്സവത്തിന്റെ പശ്ചാത്തലത്തില്‍ ഉപതിരഞ്ഞെടുപ്പ് നടക്കുന്ന പാലക്കാട് നിയമസഭാ മണ്ഡലത്തിലെ വോട്ടെടുപ്പ് തീയതി മാറ്റണമെന്ന ആവശ്യവുമായി പാലക്കാട് മുന്‍ എം.എല്‍.എയും വടകര എം.പിയുമായ ഷാഫി പറമ്പില്‍. പാലക്കാടിനെ സംബന്ധിച്ച് വലിയ പ്രാധാന്യമുള്ള ഉത്സവമാണെന്നും സംസ്ഥാനത്തിനു പുറത്തുനിന്നും ആളുകള്‍ വരുന്നതാണെന്നും അതേ തീയതില്‍ തിരഞ്ഞെടുപ്പ് നടത്തുന്നതിന് പ്രായോഗികമായി ബുദ്ധിമുട്ടുണ്ടെന്നും ഷാഫി പറമ്പില്‍ തിരഞ്ഞെടുപ്പ് കമ്മിഷനെ അറിയിച്ചു.

എഡിഎം നവീന്‍ ബാബു ആത്മഹത്യ ചെയ്ത സംഭവത്തില്‍, പി പി ദിവ്യയെ ചോദ്യം ചെയ്യാതെ പൊലീസ്. ദിവ്യയുടെ മുന്‍കൂര്‍ ജാമ്യ ഹര്‍ജി വാദം കേള്‍ക്കുന്നത് വ്യാഴാഴ്ചയിലേക്ക് മാറ്റി. ജില്ലാ കളക്ടറുടെ മൊഴിയും ഇതുവരെ രേഖപ്പെടുത്തിയിട്ടില്ല. എഡിഎമ്മിന്റെ ആത്മഹത്യയിലേക്ക് നയിച്ച കാരണമറിയാന്‍ ദിവ്യയുടെ മൊഴി നിര്‍ണായകമെന്നിരിക്കെ, റവന്യൂ വകുപ്പ് അന്വേഷണത്തിലും അവര്‍ക്ക് സാവകാശം നല്‍കുകയാണ്.

എഡിഎം നവീന്‍ ബാബുവിനെതിരെ കൈക്കൂലി ആരോപണം ഉന്നയിച്ച പരിയാരം മെഡിക്കല്‍ കോളേജ് ജീവനക്കാരന്‍ പ്രശാന്തന്റെ മൊഴിയെടുത്ത് കണ്ണൂര്‍ പൊലീസ്. കണ്ണൂര്‍ ടൗണ്‍ പൊലീസ് സ്റ്റേഷനിലാണ് പ്രശാന്തിന്റെ മൊഴിയെടുത്തത്. അതേസമയം പ്രശാന്തനെ പുറത്താക്കുമെന്ന് ആരോഗ്യമന്ത്രി വീണ ജോര്‍ജ്ജ് അറിയിച്ചു. പ്രശാന്തന്‍ സര്‍ക്കാര്‍ ജീവനക്കാരനല്ലെന്ന് പറഞ്ഞ മന്ത്രി കൂടുതല്‍ പരിശോധനക്ക് ആരോഗ്യവകുപ്പ് അഡീഷനല്‍ ചീഫ് സെക്രട്ടറി ഇന്ന് പരിയാരത്തെത്തുമെന്ന് അറിയിച്ചു.

തെരഞ്ഞെടുപ്പ് സഹകരണത്തിനായി അന്‍വറുമായി ഇനി ചര്‍ച്ചയില്ലെന്നും യുഡിഎഫിനോട് വിലപേശാന്‍ പി.വി അന്‍വര്‍ വളര്‍ന്നിട്ടില്ലെന്നും പ്രതിപക്ഷ നേതാവ് വി ഡി സതീശന്‍. അന്‍വര്‍ പുതിയ പാര്‍ട്ടിയുണ്ടാക്കിയതിനെ തുടര്‍ന്ന് ഞങ്ങളുമായി സഹകരണത്തിന് വന്നു. നിങ്ങള്‍ റിക്വസ്റ്റ് ചെയ്താല്‍ സ്ഥാനാര്‍ത്ഥിയെ പിന്‍വലിക്കാമെന്ന് അന്‍വറും പറഞ്ഞു, എന്നാല്‍ പിന്നീടാണ് കണ്ടീഷന്‍സ് വെച്ചുളള അന്‍വറിന്റെ വാര്‍ത്താ സമ്മേളനം ഉണ്ടായതെന്ന് വി ഡി സതീശന്‍ വ്യക്തമാക്കി. എഐസിസി പ്രഖ്യാപിച്ച സ്ഥാനാര്‍ത്ഥിയായ രമ്യ ഹരിദാസിനെ പിന്‍വലിക്കാനാണ് അന്‍വര്‍ പറയുന്നതെന്നും സതീശന്‍ പരിഹസിച്ചു.

പി വി അന്‍വര്‍ യുഡിഎഫിനൊപ്പം നില്‍ക്കണമെന്ന് തിരുവഞ്ചൂര്‍ രാധാകൃഷ്ണന്‍. കോണ്‍ഗ്രസുമായി അന്‍വര്‍ വിലപേശിയാല്‍ എല്‍ഡിഎഫ് വിരുദ്ധ വോട്ടുകളില്‍ വിള്ളല്‍ വീഴും. അന്‍വര്‍ യുഡിഎഫിനൊപ്പം നിന്നാല്‍ ഒരുപാട് സ്‌കോപ്പുണ്ട്. അതേസമയം പാലക്കാട്ടെ വിമര്‍ശനങ്ങളെല്ലാം ഷാഫി പറമ്പിലിന്റെ തലയില്‍ വെക്കുന്നത് ശരിയല്ലെന്നും തിരുവഞ്ചൂര്‍ രാധാകൃഷ്ണന്‍ പറഞ്ഞു.

സ്ഥാനാര്‍ഥിയെ പിന്‍വലിക്കേണ്ടി വന്നാല്‍ പാലക്കാട് ഉപതിരഞ്ഞെടുപ്പില്‍ യുഡിഎഫിനെ പിന്തുണയ്ക്കുമെന്ന് പി.വി അന്‍വര്‍. പ്രതിപക്ഷ നേതാവ് വി.ഡി സതീശന്‍ അപമാനപ്പെടുത്തിയാല്‍ താനങ്ങ് സഹിക്കുമെന്നും പാലക്കാട് ഡിഎംകെ സ്ഥാനാര്‍ഥിത്വത്തെ ചൊല്ലിയുള്ള തീരുമാനം നാളെ അറിയിക്കുമെന്നും അന്‍വര്‍ പറഞ്ഞു. അതേസമയം ചേലക്കരയില്‍ ഡിഎംകെ സ്ഥാനാര്‍ഥിയെ നിര്‍ത്തുമെന്നും അന്‍വര്‍ വ്യക്തമാക്കി.

എഡിഎം നവീന്‍ ബാബുവിന്റെ മരണത്തിന് ഉത്തരവാദിയായ കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റ് പി.പി ദിവ്യയെ സംരക്ഷിക്കുന്നത് ആരെന്ന് മുഖ്യമന്ത്രി തുറന്നു പറയണമെന്ന് ബിജെപി സംസ്ഥാന പ്രസിഡണ്ട് കെ സുരേന്ദ്രന്‍. എന്തു കൊണ്ടാണ് ദിവ്യയെ അറസ്റ്റ് ചെയ്യാത്തതെന്നും ഒളിവില്‍ പോകാന്‍ സഹായിച്ചത് ആരാണെന്നും സുരേന്ദ്രന്‍ ചോദിച്ചു. ദിവ്യക്കെതിരെ ഒരു നടപടിയും എടുക്കാന്‍ സര്‍ക്കാര്‍ ആഗ്രഹിക്കുന്നില്ലെന്നും ദിവ്യയെ സംരക്ഷിക്കില്ലെന്ന മുഖ്യമന്ത്രിയുടെ പ്രസ്താവന ആത്മാര്‍ത്ഥതയില്ലാത്തതാണെന്നും അദ്ദേഹം പറഞ്ഞു.

അങ്കമാലി അര്‍ബന്‍ സഹകരണ ബാങ്കിലെ നിക്ഷേപ തട്ടിപ്പുമായി ബന്ധപ്പെട്ട് ബാങ്കിന്റെ മുന്‍ സെക്രട്ടറി ബിജു കെ ജോസിനെ ക്രൈം ബ്രാഞ്ച് അറസ്റ്റ് ചെയ്തു. വ്യാജ രേഖ ചമച്ചതും എല്ലാ രേഖകളിലും ഒപ്പിട്ടതും ഇയാളാണന്ന് അന്വഷണ സംഘം വ്യക്തമാക്കി. ബാങ്കിലെ അക്കൗണ്ടന്റ് ഷിജു കെ എ നേരത്തെ അറസ്റ്റിലായിരുന്നു. അനര്‍ഹരായവര്‍ക്ക് ലോണുകള്‍ അനുവദിച്ച് പണാപഹരണവും, ക്രമക്കേടും നടത്തിയും സഹകരണ സംഘത്തിന് 55 കോടി രൂപയുടെ ബാധ്യത വരുത്തി വെച്ചിരിക്കുന്നു എന്നാണ് പരാതി.

മണ്ണാറശ്ശാല ശ്രീ നാഗരാജ ക്ഷേത്രത്തിലെ ആയില്യം മഹോത്സവം പ്രമാണിച്ച് ആലപ്പുഴ ജില്ലയിലെ എല്ലാ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും ഒക്ടോബര്‍ 26ന് പ്രാദേശിക അവധി പ്രഖ്യാപിച്ചു. പൊതുപരീക്ഷകള്‍ മുന്‍ നിശ്ചയ പ്രകാരം നടത്തുന്നതിന് ഉത്തരവ് ബാധകമല്ലെന്നും ജില്ലാ ഭരണകൂടം അറിയിച്ചു.

ബലാത്സംഗക്കേസില്‍ നടന്‍ സിദ്ദിഖിന്റെ മുന്‍കൂര്‍ ജാമ്യാപേക്ഷ രണ്ടാഴ്ചത്തേക്ക് മാറ്റി. ഇതുവരെ അറസ്റ്റ് തടഞ്ഞുള്ള ഇടക്കാല ഉത്തരവ് തുടരുമെന്ന് സുപ്രീംകോടതി അറിയിച്ചു. സിദ്ദിഖ് അന്വേഷണവുമായി സഹകരിക്കുന്നില്ലെന്നും മുന്‍കൂര്‍ ജാമ്യം നല്‍കിയാല്‍ സിദ്ദിഖ് തെളിവ് നശിപ്പിക്കും എന്നാണ് സംസ്ഥാന സര്‍ക്കാര്‍ കോടതിയില്‍ വാദിച്ചത്. എന്നാല്‍ തെളിവ് നശിപ്പിക്കാന്‍ ആണെങ്കില്‍ സിദ്ദിഖിന് അത് മുമ്പേ ചെയ്യാമായിരുന്നില്ലേ എന്ന് സുപ്രീം കോടതി ചോദിച്ചു. സംസ്ഥാന സര്‍ക്കാരിന്റെ സത്യവാങ്മൂലത്തിന് എതിര്‍ സത്യവാങ്മൂലം നല്‍കാന്‍ സമയം വേണമെന്ന് സിദ്ദിഖ് കോടതിയോട് ആവശ്യപ്പെട്ടു. ഇത് പരിഗണിച്ചാണ് കേസ് രണ്ടാഴ്ചയ്ക്ക് ശേഷം പരിഗണിക്കാനായി മാറ്റിയത്.

ആലുവ സ്വദേശിയായ നടിയുടെ ബലാത്സംഗ പരാതിയിലെടുത്ത കേസില്‍ നടനും എംഎല്‍എയുമായ മുകേഷിനെ അറസ്റ്റ് ചെയ്ത് വിട്ടയച്ച് വടക്കാഞ്ചേരി പൊലീസ്. ഞായറാഴ്ച്ചയാണ് മുകേഷ് വടക്കാഞ്ചേരി സ്റ്റേഷനില്‍ ഹാജരായത്. അതീവ രഹസ്യമായി വൈദ്യപരിശോധനയും ചോദ്യംചെയ്യലും പൂര്‍ത്തിയാക്കി അറസ്റ്റ് രേഖപ്പെടുത്തി വിട്ടയക്കുകയായിരുന്നുവെന്നാണ് റിപ്പോര്‍ട്ടുകള്‍.

ഓണ്‍ലൈനിലൂടെ മുന്‍കൂറായി പണമടച്ച് മദ്യം ബുക്ക് ചെയ്ത് വില്‍പ്പന നടത്തുന്നത് ബെവ്‌കോ നിര്‍ത്തിവെച്ചു. ബെവ്‌കോ വെബ്സൈറ്റില്‍ ഗുരുതര പിഴവ് കണ്ടെത്തിയതിനെ തുടര്‍ന്നാണിത്. കൂടിയ തുകയ്ക്കുള്ള മദ്യം വെബ്സൈറ്റിലൂടെ കുറഞ്ഞ തുകയ്ക്ക് ബുക്ക് ചെയ്യാന്‍ കഴിയുമെന്ന് കണ്ടെത്തിയതിനെ തുടര്‍ന്നാണ് വെബ്സൈറ്റിലൂടെ മദ്യം പണമടച്ച് ബുക്ക് ചെയ്യുന്ന സംവിധാനം നിര്‍ത്തിവെച്ചത്.

യാത്രക്കാരന്‍ മനുഷ്യ ബോംബ് ഭീഷണി മുഴക്കിയതിനെ തുടര്‍ന്ന് നെടുമ്പാശ്ശേരിയില്‍ നിന്നുള്ള വിസ്താര വിമാനം അര മണിക്കൂറിലേറെ വൈകി. ഇന്നലെ വൈകിട്ട് 3.50ന് മുംബൈക്ക് പുറപ്പെടാനൊരുങ്ങിയ വിമാനത്തിലെ യാത്രക്കാരനായ മഹാരാഷ്ട്ര സ്വദേശി വിജയ് മന്ദായനാണ് ഭീഷണി മുഴക്കിയത്. ഇയാളെ പൊലീസിന് കൈമാറി. 3.50 ന് പുറപ്പെടേണ്ടിയിരുന്ന വിമാനം പരിശോധനയ്ക്ക് ശേഷം 4.20 നാണ് മുംബൈയിലേക്ക് പുറപ്പെട്ടത്.

സ്‌കൂള്‍, കോളേജ് തലങ്ങളിലെ എയ്ഡഡ് അധ്യാപകരുടെ ശമ്പള വിതരണത്തിലെ അനിശ്ചിതത്വം മാറി. 2024 ഓക്ടോബര്‍ മാസം മുതല്‍ ശമ്പള വിതരണത്തിന് മേലധികാരികളുടെ ഒപ്പ് വേണമെന്ന ധന വകുപ്പിന്റെ വിവാദ ഉത്തരവ് സര്‍ക്കാര്‍ മരവിപ്പിച്ചു. ഹെഡ് മാസ്റ്റര്‍മാര്‍ക്കും പ്രിന്‍സിപ്പല്‍മാര്‍ക്കും പഴയ പോലെ ബില്‍ ട്രഷറിയിലേക്ക് കൈ മാറാം.

സൗദിയില്‍ വധശിക്ഷ റദ്ദ് ചെയ്ത കോഴിക്കോട് സ്വദേശി അബ്ദുല്‍ റഹീമിന്റെ മോചനകാര്യത്തില്‍ ഇന്നലേയും തീരുമാനമായില്ല. റിയാദിലെ ജയിലില്‍ കഴിയുന്ന റഹീമിന്റെ മോചന ഹര്‍ജി ഇന്നലെ കോടതി പരിഗണിച്ചെങ്കിലും തീരുമാനമെടുത്തില്ല. ഇന്നലെ രാവിലെ കേസ് പരിഗണിച്ച കോടതി വിശദവിവരങ്ങള്‍ പരിശോധിച്ച ശേഷം വധശിക്ഷ റദ്ദ് ചെയ്ത അതെ ബെഞ്ചാണ് വിധി പറയേണ്ടതെന്നും ചീഫ് ജസ്റ്റീസിന്റെ ഓഫീസ് അക്കാര്യം തീരുമാനിക്കുമെന്നും അറിയിക്കുകയായിരുന്നു.

മധ്യ കിഴക്കന്‍ ബംഗാള്‍ ഉള്‍ക്കടലിനും ആന്‍ഡമാന്‍ കടലിനും മുകളിലായി രൂപപ്പെട്ട ന്യൂനമര്‍ദ്ദം ഇന്ന് തീവ്ര ന്യൂന മര്‍ദ്ദമായും നാളെ ചുഴലിക്കാറ്റായും മാറാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. ചുഴലിക്കാറ്റ് ഒക്ടോബര്‍ 24 ന് ഒഡിഷ -പശ്ചിമ ബംഗാള്‍ തീരത്തിന് സമീപം എത്തിച്ചേരാനും സാധ്യത. ഇതിന്റെ ഭാഗമായി വരും ദിവസങ്ങളില്‍ കേരളത്തില്‍ ഒറ്റപ്പെട്ടയിടങ്ങളില്‍ ശക്തമായ മഴക്ക് സാധ്യതയുണ്ടെന്നും ജാഗ്രത വേണമെന്നും കാലാവസ്ഥാ വകുപ്പ് മുന്നറിയിപ്പ് നല്‍കി.

കോടതികളില്‍ പ്രാക്ടീസ് ചെയ്യുന്ന അഭിഭാഷകര്‍ക്ക് മാധ്യമ പ്രവര്‍ത്തനത്തിനുള്ള അനുമതി നല്‍കാനാവില്ലെന്ന് സുപ്രീം കോടതി. അഭിഭാഷകവൃത്തി മാഹാത്മ്യമുള്ള തൊഴിലാണെന്നും ഒരു അഭിഭാഷകന് താനൊരു ഫ്രീലാന്‍സ് മാധ്യമപ്രവര്‍ത്തകന്‍ ആണെന്ന് പറയാന്‍ കഴിയില്ലെന്നും ജസ്റ്റിസ് അഭയ് എസ്. ഓക അധ്യക്ഷനായ സുപ്രീം കോടതി ബെഞ്ച് ചൂണ്ടിക്കാട്ടി.

കൊൽക്കത്തയിലെ ആർജി കർ ആശുപത്രിയിൽ അനിശ്ചിതകാല നിരാഹാര സമരം അവസാനിപ്പിച്ച് ഡോക്ടർമാർ. കഴിഞ്ഞ ദിവസം മുഖ്യമന്ത്രി മമതാ ബാനർജിയുമായി നടന്ന കൂടിക്കാഴ്ചക്ക് ശേഷമാണ് സമരം പിൻവലിച്ചത്.
17 ദിവസം നീണ്ട നിരാഹാര സമരമാണ് അവസാനിപ്പിച്ചത്. ഇന്നുമുതൽ സംസ്ഥാന വ്യാപകമായി പണിമുടക്കിന് ആഹ്വാനം ചെയ്തതിന് ശേഷമാണ് മമത ചർച്ചക്ക് തയ്യാറായത്. എന്നാൽ ആരോഗ്യ സെക്രട്ടറിയെ സ്ഥാനത്ത് നിന്നും നീക്കം ചെയ്യുന്ന ആവശ്യം അംഗീകരിച്ചില്ല.

ആന്ധ്രപ്രദേശ് മുഖ്യമന്ത്രി എന്‍. ചന്ദ്രബാബു നായിഡുവിന് പിന്നാലെ കുട്ടികളുടെ എണ്ണം വര്‍ധിപ്പിക്കണമെന്ന ആഹ്വാനവുമായി തമിഴ്‌നാട് മുഖ്യമന്ത്രി എം.കെ. സ്റ്സ്റ്റാലിനും. ജനസംഖ്യക്കനുസൃതമായി ലോക്സഭ മണ്ഡലങ്ങളുടെ എണ്ണം കുറയ്ക്കാന്‍ കേന്ദ്രസര്‍ക്കാര്‍ ആസൂത്രണം നടത്തുന്ന പശ്ചാത്തലത്തിലാണ് ദക്ഷിണേന്ത്യന്‍ സംസ്ഥാനങ്ങളിലെ ജനസംഖ്യാ വളര്‍ച്ചയെ പറ്റി ചര്‍ച്ചകള്‍ സജീവമാകുന്നത്. ചെന്നൈയില്‍ നടന്ന സമൂഹവിവാഹം ഉദ്ഘാടനം ചെയ്യുമ്പോഴായിരുന്നു സ്റ്റാലിന്റെ ആഹ്വാനം.

പ്രധാനമന്ത്രി നരേന്ദ്ര മോദിയുടെ വിദ്യാഭ്യാസ ബിരുദത്തെക്കുറിച്ചുള്ള പരാമര്‍ശത്തില്‍ ഗുജറാത്ത് സര്‍വകലാശാല രജിസ്ട്രാര്‍ നല്‍കിയ മാനനഷ്ടക്കേസ് ചോദ്യം ചെയ്തുള്ള അരവിന്ദ് കെജ്രിവാളിന്റെ ഹര്‍ജി സുപ്രീം കോടതി തള്ളി. മാനനഷ്ടക്കേസില്‍ നല്‍കിയ സമന്‍സ് ചോദ്യം ചെയ്തുള്ള കെജ്രിവാളിന്റെ ഹര്‍ജി നേരത്തെ ഗുജറാത്ത് ഹൈക്കോടതി തള്ളിയിരുന്നു. ഈ ഉത്തരവിനെ ചോദ്യം ചെയ്താണ് മുന്‍ ദില്ലി മുഖ്യമന്ത്രി സുപ്രീം കോടതിയെ സമീപിച്ചത്.

മൂവാറ്റുപുഴ കൂത്താട്ടുകുളത്ത് ഫാം കത്തി നശിച്ചു. പാലക്കുഴ സ്വദേശി റെജി ജോസഫിന്റെ കോഴിഫാമാണ് കത്തി നശിച്ചത്. അഗ്‌നിബാധയില്‍ 600 ഓളം കോഴിക്കുഞ്ഞുങ്ങള്‍ ചത്തു. ഫാമിനു തീ വെച്ചതാണെന്ന സംശയത്തില്‍ ഉടമ.
ശനിയാഴ്ച രാത്രിയാണ് കുത്താട്ടുകുളം ഇല്ലിക്കുന്നിലെ റെജി ജോസഫിന്റെ കോഴിഫാമില്‍ തീപടര്‍ന്നത്. ഫാമിന്റെ മേല്‍ക്കൂരയുടെ ഇരുവശത്തു നിന്നുമാണ് തീ പടര്‍ന്നിരിക്കുന്നത്. കൂത്താട്ടുകുളം, തൊടുപുഴ എന്നിവിടങ്ങളില്‍ നിന്നുള്ള അഗ്‌നിരക്ഷാസേന എത്തിയാണ് തീ അണച്ചത്. കൂട് കത്തി നശിച്ചതില്‍ ദുരൂഹതയുണ്ടെന്ന് ബ്ലോക്ക് പഞ്ചായത്ത് മെമ്പറും ആരോപിച്ചു.
10000 കോഴികളെ വളര്‍ത്താന്‍ സൗകര്യമുള്ള ഫാമിനാണ് തീ പിടിച്ചത്. ഫാം കത്ത് നശിച്ചതിനെ തുടര്‍ന്ന് കര്‍ഷകന് 5 ലക്ഷം രൂപയുടെ നഷ്ടമാണ് ഉണ്ടായത്.

പ്രായപൂര്‍ത്തിയാകാത്ത പെണ്‍കുട്ടിയെ സ്‌നേഹം നടിച്ച് തട്ടിക്കൊണ്ടുപോയി പീഡിപ്പിച്ച കേസില്‍ യുവാവിനെ തിരുവല്ല പൊലീസ് പിടികൂടി. ഇരവിപേരൂര്‍ വള്ളംകുളം പുത്തന്‍ പറമ്പില്‍ വീട്ടില്‍ നിന്നും കവിയൂര്‍ കോട്ടൂര്‍ ഓര്‍ത്തഡോക്‌സ് പള്ളിക്ക് സമീപം വാടകയ്ക്ക് താമസിക്കുന്ന പുത്തന്‍ പറമ്പില്‍ അനീഷ്‌കുര്യനാണ് അറസ്റ്റിലായത്. കുട്ടി പഠിക്കാന്‍ പോയപ്പോള്‍ മല്ലപ്പള്ളി ബസ് സ്റ്റാന്‍ഡില്‍ നിന്നും സ്‌കൂട്ടറില്‍ കയറ്റിക്കൊണ്ട് പോയി ഇയാളുടെ അമ്മയുടെ വെങ്കോട്ടയിലെ വീട്ടിലെത്തിച്ച് പീഡിപ്പിക്കുകയായിരുന്നു. കുട്ടിയുടെ ആധാര്‍ കാര്‍ഡ്, പാസ്‌പോര്‍ട്ട്, ജനന സര്‍ട്ടിഫിക്കറ്റിന്റെ പകര്‍പ്പ് തുടങ്ങിയ രേഖകള്‍ ഇയാള്‍ കൈക്കലാക്കുകയും ചെയ്തു.
കഴിഞ്ഞദിവസമാണ് തിരുവല്ല പൊലീസില്‍ കുട്ടി മൊഴിനല്‍കിയത്, തുടര്‍ന്ന് കേസ് രജിസ്റ്റര്‍ ചെയ്തു അന്വേഷണം ആരംഭിച്ചു. ജില്ലാ പൊലീസ് മേധാവി വി ജി വിനോദ് കുമാറിന്റെ നിര്‍ദേശാനുസരണം പ്രതിക്കായുള്ള തെരച്ചില്‍ എസ് എച്ച് ഓയുടെ നേതൃത്വത്തിലുള്ള സംഘം ഊര്‍ജ്ജിതമാക്കിയിരുന്നു. തുടര്‍ന്ന് ഞാലിക്കണ്ടത്തു നിന്നും പ്രതിയെ കസ്റ്റഡിയിലെടുത്തു. വൈദ്യപരിശോധനയ്ക്ക് ശേഷം സ്റ്റേഷനിലെത്തിച്ച് വിശദമായി ചോദ്യം ചെയ്തപ്പോള്‍ ഇയാള്‍ കുറ്റം സമ്മതിച്ചു. തുടര്‍ന്ന് അറസ്റ്റ് രേഖപ്പെടുത്തി. ഇയാളുടെ മൊബൈല്‍ ഫോണ്‍ പൊലീസ് പിടിച്ചെടുത്തു.
കുട്ടിയെ വൈദ്യപരിശോധനയ്ക്ക് വിധേയയാക്കുകയും, തുടര്‍ നടപടികള്‍ കൈക്കൊള്ളുകയും ചെയ്തു. കുട്ടിയുടെ മൊഴി കോടതിയില്‍ രേഖപ്പെടുത്തി. പ്രതി കൈവശപ്പെടുത്തിയ രേഖകള്‍ റാന്നി അങ്ങാടി പേട്ടയിലെ സ്വകാര്യ വ്യക്തിയുടെ കടമുറിക്കുള്ളില്‍ നിന്നും അന്വേഷണസംഘം കണ്ടെടുത്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഇന്ത്യയില്‍ തുടരാന്‍ അനുവദിക്കണമെന്ന് കേന്ദ്രമന്ത്രി അമിത് ഷായോട് അഭ്യര്‍ഥിച്ച് ബംഗ്ലാദേശ് എഴുത്തുകാരി തസ്ലിമ നസ്രീന്‍. കഴിഞ്ഞ 20 വര്‍ഷക്കാലമായി ഈ രാജ്യം എന്റെ രണ്ടാമത്തെ വീടാണെന്നും എന്നാല്‍, ജൂലായ് 22 മുതല്‍ തന്റെ റെസിഡന്റ് പെര്‍മിറ്റ് നീട്ടികിട്ടിയിട്ടില്ലെന്നും ഇക്കാര്യത്തില്‍ താന്‍ വളരെ ദുഃഖിതയാണെന്നും ഇവിടെ തുടരാന്‍ അനുവദിച്ചാല്‍ ഞാന്‍ നിങ്ങളോട് കടപ്പെട്ടിരിക്കുമെന്നും തസ്ലിമ എക്സില്‍ പങ്കുവെച്ച കുറിപ്പില്‍ പറയുന്നു.

ട്രെയിനിലെ എസി കോച്ചിൽ ഒരു യാത്ര..ആഹാ എന്താ രസം അല്ലെ! ട്രെയിൻ യാത്രകൾ പൊതുവേ ഏവർക്കും പ്രിയങ്കരമാണെങ്കിലും എസി കോച്ചിലുള്ള യാത്ര ചിലർക്ക് വൈബാണ്. കോച്ചിനുള്ളിലെ വൃത്തിയാണ് എസി കോച്ച് ഇഷ്ടപ്പെടാൻ പലർക്കും കാരണം, ഒരുവിധം വൃത്തിയുള്ള ശുചിമുറികൾ ലഭിക്കും എന്നത് മറ്റൊരു കാര്യം. എസി കോച്ചിലെ മറ്റൊരു പ്രത്യേകത തലയണ, പുതപ്പ്, ബെഡ്ഷീറ്റ്. ‘ഇതൊക്കെ കഴുകുമോ?’ എന്ന ചോദ്യം എസി കോച്ചിൽ ആദ്യമായി കയറുന്ന ആരും ഒന്ന് ചോദിച്ച് പോകും. ‘ഓരോ ഉപയോഗ ശേഷവും ഇതെല്ലാം കഴുകും” എന്ന് ചിലർ മറുപടിയായി തട്ടി വിടാറുമുണ്ട്.
എന്നാൽ അങ്ങനെ അല്ല! എസി കോച്ചിൽ യാത്രക്കാർക്ക് വേണ്ടി നൽകുന്ന
പുതപ്പ് മാസത്തിൽ ഒരിക്കലേ കഴുകൂ എന്നാണ് റെയിൽവേ ഇപ്പോൾ ചോദ്യത്തിനായുള്ള മറുപടിയായി നൽകിയിരിക്കുന്നത്. ചിലപ്പോഴൊക്കെ മാസത്തിൽ രണ്ട് തവണ ഇത് കഴുകുമെന്നും റെയിൽവേ വ്യക്തമാക്കുന്നു. വിവരാവകാശ നിയമ പ്രകാരം ദ ന്യൂ ഇന്ത്യൻ എക്സ്പ്രസ്സ് ചോദിച്ച ചോദ്യങ്ങൾക്കുള്ള ഉത്തരമായാണ് ഇക്കാര്യങ്ങൾ റെയിൽവേ പറഞ്ഞത്.
റെയിൽവേ തൊഴിലാളികളോട് ഇക്കാര്യം തിരക്കിയെന്നും പുതപ്പ് മാസത്തിൽ ഒരിക്കലേ കഴുകുകയുള്ളൂവെന്ന മറുപടി അവരിൽ നിന്ന് ലഭിച്ചുവെന്നും
ഇത് പുതപ്പിൽ കറ പറ്റിയാലോ, നാറ്റം ഉണ്ടെങ്കിലോ മറ്റോ ആയിരിക്കുമെന്നുമാണ് അവർ പറയുന്നത്. പുതപ്പ് , തലയണ, ബെഡ്ഷീറ്റ് എന്നിവയ്ക്ക് അധിക ചാർജ് ഈടാക്കുമോ എന്ന ചോദ്യത്തിന് ഇതെല്ലാം ട്രെയിൻ ടിക്കറ്റ് ചാർജിൽ ഉൾപ്പെടും എന്നായിരുന്നു മറുപടി.
ഇന്ത്യൻ റെയിൽവേക്ക് രാജ്യത്ത് ആകെ 46 ഡിപ്പാർട്മെന്റൽ ലോണ്ട്രികളും 25
ബൂട്ട് ലോണ്ട്രികളുമാണ് ഉള്ളത്. വാഷിംഗ് മെഷീനുകൾ അടക്കം റെയിൽവേ ഇതിനായി സജ്ജീകരിച്ചിട്ടുണ്ട്. കരാർ അടിസ്ഥാനത്തിൽ ആയിരിക്കും ജീവനക്കാരുടെ നിയമനം.

ദില്ലിയിലെ സിആര്‍പിഎഫ് സ്‌കൂളിലുണ്ടായ സ്ഫോടനവുമായി ബന്ധപ്പെട്ട നിര്‍ണായക വിവരങ്ങള്‍ പുറത്ത്. സ്ഫോടനം നടന്ന സ്ഥലത്തിന് സമീപം സംശയാസ്പദമായ സാഹചര്യത്തില്‍ ഒരാളുടെ സാന്നിധ്യം കണ്ടെത്തിയതായി അധികൃതര്‍ അറിയിച്ചു.വെളുത്ത നിറത്തിലുള്ള ടീഷര്‍ട്ട് ധരിച്ച ഒരാളാണ് സ്ഫോടനത്തിന് പിന്നില്‍ പ്രവര്‍ത്തിച്ചതെന്ന സംശയം ശക്തമാക്കുന്ന തെളിവുകളാണ് അന്വേഷണ സംഘത്തിന് ലഭിച്ചിരിക്കുന്നത്.സംഭവത്തില്‍ ഭാരതീയ ന്യായ സംഹിതയിലെ വിവിധ വകുപ്പുകള്‍ പ്രകാരം കേസ് രജിസ്റ്റര്‍ ചെയ്തിട്ടുണ്ട്.

കൊതുകിനെ തുരത്താൻ പുതിയ ഡ്രോൺ പരീക്ഷണവുമായി ദില്ലി. കെമിക്കൽ സ്പ്രേ ചെയ്ത് കൊതുകിനെയും അതുവഴി കൊതുക് ജന്യ രോഗത്തെയും തടയുന്നതിന് വേണ്ടിയാണ് ഇത്. പദ്ധതിയുടെ ഉദ്ഘടാനം ദില്ലി മേയർ ഷെല്ലി ഒബ്‌റോയ് നിർവഹിച്ചു.

2026-ല്‍ നടക്കാനിരിക്കുന്ന ഗ്ലാസ്‌ഗോ കോമണ്‍വെല്‍ത്ത് ഗെയിംസില്‍നിന്ന് ഹോക്കിയെ ഒഴിവാക്കിയേക്കുമെന്ന് റിപ്പോര്‍ട്ട്. പണച്ചെലവിനെ തുടര്‍ന്നാണ് നീക്കം. ഇതു സംബന്ധിച്ച ഔദ്യോഗിക തീരുമാനം ഉടന്‍ ഉണ്ടായേക്കുമെന്നാണ് റിപ്പോര്‍ട്ട്.

പരിക്കേറ്റ് ഒരു വർഷത്തിലേറെയായി പുറത്തായിരുന്ന ബ്രസീൽ സൂപ്പർ താരം നെയ്മർ വീണ്ടും കളത്തിൽ. ഇന്നലെ സൗദി അറേബ്യൻ ക്ലബായ അൽ ഹിലാലിന് വേണ്ടിയാണ് അദ്ദേഹം കളത്തിലിറങ്ങിയത്. യുഎഇ ക്ലബായ അൽ ഐനെതിരെ എഎഫ്‌സി ചാമ്പ്യൻസ് ലീഗ് പോരാട്ടത്തിൻ്റെ രണ്ടാം പകുതിയിലാണ് നെയ്മർ ഇറങ്ങിയത്.
നെയ്മറിൻ്റെ കാൽമുട്ടിനാണ് പരിക്കേറ്റിരുന്നത്. 77-ാം മിനിറ്റിൽ നാസർ അൽ ദൗസരിക്ക് പകരക്കാരനായാണ് അദ്ദേഹം ഇറങ്ങിയത്. സേലം അൽ ദൗസരി ഗോൾ നേടിയതിന് തൊട്ടുപിന്നാലെയായിരുന്നു ഇത്. ഈ സമയം 5-3 എന്ന നിലയിലായിരുന്നു അൽ ഹിലാൽ. അൽ ഐൻ പെനാൽറ്റി നേടിയതിനെത്തുടർന്ന് മത്സരം 5-4ൽ അവസാനിച്ചു.

കാര്‍ത്തിക് ആര്യനെ നായകനാക്കി അനീസ് ബസ്മി സംവിധാനം ചെയ്ത ഹൊറര്‍ കോമഡി ചിത്രം ‘ഭൂല്‍ ഭുലയ്യ 3’ യുടെ ടൈറ്റില്‍ ട്രാക്ക് ശ്രദ്ധേയമാകുന്നു. ഭൂല്‍ ഭുലയ്യയിലെ ഐക്കോണിക് ഗാനം ‘ഹരേ റാം’ റീമിക്സാണ് ടൈറ്റില്‍ ഗാനം. ദില്‍ജിത്ത് ദോസാഞ്ച്, പിറ്റ്ബുള്‍ എന്നിവരാണ് ഗാനത്തിന്റെ പുതിയ പതിപ്പ് ആലപിച്ചിരിക്കുന്നത്. ടി സിരീസ് ഫിലിംസ്, സിനി1 സ്റ്റുഡിയോസ് എന്നീ ബാനറുകളില്‍ ഭൂഷന്‍ കുമാര്‍, കൃഷന്‍ കുമാര്‍, മുറാദ് ഖേതാനി എന്നിവരാണ് ചിത്രം നിര്‍മ്മിക്കുന്നത്. ഇതിനകം ഗാനം 40 മില്ല്യണ്‍ വ്യൂ ആണ് നേടിയിരിക്കുന്നത്. റിപ്പോര്‍ട്ട് പ്രകാരം ഡിജിറ്റല്‍, സാറ്റലൈറ്റ്, മ്യൂസിക് റൈറ്റ്സ് ചേര്‍ത്ത് ചിത്രത്തിന് ലഭിച്ചിരിക്കുന്നത് 135 കോടിയാണ്. ചിത്രത്തിന്റെ ഡിജിറ്റല്‍ റൈറ്റ്സ് നെറ്റ്ഫ്ലിക്സും സാറ്റലൈറ്റ് റൈറ്റ്സ് സോണി നെറ്റ്വര്‍ക്കിനുമാണ് വിറ്റിരിക്കുന്നതെന്നും അവര്‍ റിപ്പോര്‍ട്ട് ചെയ്യുന്നു. വിദ്യാ ബാലന്‍, മാധുരി ദീക്ഷിത്, തൃപ്തി ദിംറി, വിജയ് റാസ് തുടങ്ങിയവര്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്ന ചിത്രം ദീപാവലി റിലീസ് ആയി പ്രേക്ഷകരിലേക്ക് എത്തും.

തയ്യാറാക്കിയത്:
കപിൽ ശങ്കർ