🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 15 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

ഉൾക്കരുത്തെന്ന ആയുധം
——————————————–

ക്രിസ്മസ് സമ്മാനം വാങ്ങാനായി ഒരച്ഛനും മകനും കൂടി കടയിലെത്തി. ബലൂണുകൾ കൊണ്ടു നിർമ്മിച്ച വലിയൊരു സ്തൂപം മകൻ ശ്രദ്ധിച്ചു. അതിൽ കൗതുകം തോന്നിയ അവൻ, അതിലാഞ്ഞിടിച്ചു. മറിഞ്ഞുവീണെങ്കിലും രണ്ടു തവണ ഉയർന്നു താണ് അതു പൂർവ്വ സ്ഥിതിയിലെത്തി. പല തവണ അവനതു തള്ളിയിടുവാൻ നോക്കിയെങ്കിലും അതു വീണ്ടും നിവർന്നു തന്നെ നിന്നു.

അപ്പോൾ, അച്ചൻ അവനോടു ചോദിച്ചു: “എന്തു കൊണ്ടാണ് നീ പല തവണ ശ്രമിച്ചിട്ടും, ബലൂൺ പ്രതിമ താഴെ വീഴാതെ വീണ്ടും ഉയർന്നു വന്നത് ?” അവൻ പറഞ്ഞു: “ഉത്തരം കൃത്യമായി എനിക്കറിയില്ല. പക്ഷെ, അതിനുള്ളിൽ അതിനെ എഴുന്നേല്പിച്ചു നിർത്തുന്ന എന്തോ ഒന്നുണ്ടു്!”

പുറന്തോടുകൾക്ക് ആകൃതി മാത്രമേ നൽകാൻ കഴിയൂ. കഴിവും കരുത്തും അകമേ നിന്നു വേണം രൂപപ്പെടുവാൻ. പുറത്തു നിന്നുള്ള ആക്രമണം മൂലമല്ല, പലരും അടിതെറ്റുന്നത് . ഉൾബലം ഇല്ലാത്തതു മൂലമാണത് സംഭവിക്കുന്നത്.
മൂർച്ചയില്ലാത്ത അസ്ത്രങ്ങൾക്കു പോലും കീറി മുറിക്കാൻ പാകത്തിൽ വികാരങ്ങളും ചിന്തകളും ദുർബലമാകുന്നതു മൂലമാണ് പ്രതിരോധ ശേഷി നഷ്ടപ്പെടുന്നത്. പുറത്തു നിന്നുള്ള ഒന്നിനും, ആരേയും കീഴ്പ്പെടുത്താനാകില്ല; ഉള്ള് ഉരുക്കു കൊണ്ടു നിർമ്മിച്ചതാണെങ്കിൽ?

വാഴ്ത്തുന്നവരുടെ കൂട്ടത്തിൽ മാത്രമല്ല, പ്രഹരമേൽപ്പിക്കുന്നവരുടെ കൂട്ടത്തിലും സഹവസിക്കാനാകണം നമുക്ക്. ഒരിക്കലെങ്കിലും ആഘാതമേൽക്കാത്തവർ ആദ്യ പ്രഹരത്തിൽത്തന്നെ താഴെ വീണു എന്നു വരാം. വീഴാതിരിക്കാനുള്ള ശേഷി മാത്രമല്ല നാം സമ്പാദിക്കേണ്ടത്. വീണിടത്തു നിന്നെഴുന്നേൽക്കാനുള്ള പ്രാപ്തിയും നാം നേടണം. ഉൾക്കരുത്ത് അതിനേറെ ആവശ്യമാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര