🌹 “ഇന്നത്തെ ചിന്താവിഷയം” 🌹 – 2024 | നവംബർ 14 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

കടപ്പാടുകളുടെ കൂമ്പാരമായ ജീവിതം
———————————————————-

സോക്രട്ടീസിൻ്റെ മരണശിക്ഷ നടപ്പാക്കുന്നതിനു തൊട്ടുമുമ്പ് ജയിൽ ജീവനക്കാർ അദ്ദേഹത്തോടു ചോദിച്ചു: “അവസാന ആഗ്രഹങ്ങൾ വല്ലതുമുണ്ടോ?
ചെയ്തു തീർക്കാൻ കടപ്പാടുകൾ ബാക്കി വല്ലതും ഉണ്ടോ?” സോക്രട്ടീസ് പറഞ്ഞു:
“വീടിനടുത്തുള്ള ദേവാലയത്തിൽ ഒരു നേർച്ചക്കോഴിയെ നൽകാമെന്നു പറഞ്ഞിരുന്നു. നിറവേറ്റാൻ സാധിച്ചിട്ടില്ല!”
ജീവനക്കാർ ചോദിച്ചു: “ഇത്ര നിസ്സാരമായ ഒരു കടമയല്ലാതെ മറ്റൊന്നും ശേഷിക്കുന്നില്ലെ?” സോക്രട്ടീസ് തിരിച്ചു ചോദിച്ചു: “മറ്റു കടങ്ങളൊക്കെ, എങ്ങനെയാണു വീട്ടാനാകുക?”

ഒന്നാലോചിച്ചാൽ നമുക്കു മനസ്സിലാകും, കടപ്പാടുകളുടെ ഒരു കൂമ്പാരത്തിനു മുകളിലാണ് ഓരോ ജീവിതവും കെട്ടിപ്പൊക്കിയിരിക്കുന്നതെന്ന്. ജനിച്ചതും വളർന്നതും ജീവിക്കുന്നതും മരിക്കുന്നതുമെല്ലാം, കടപ്പാടുകൾ അവശേഷിപ്പിച്ചു കൊണ്ടു തന്നെ. തങ്ങൾ സ്വയംപര്യാപ്തരാണെന്നു ധരിച്ചു വശായവർ ഒന്നോർക്കണം: ”സ്വന്തം പാദമുദ്രകൾ മാത്രം പതിപ്പിച്ചു നടക്കാൻ കഴിയുന്ന വഴിയേത് ? ചെയ്യാൻ പറ്റുന്ന പ്രവൃത്തിയേത് ?”
ഭക്ഷണത്തിനും വസ്ത്രത്തിനുംപോലും, നാമാരോടെല്ലാം കടപ്പെട്ടിരിക്കുന്നു.

ആരോടാണു നമുക്കു കടപ്പാടില്ലാത്തത്:
പാൽ ചുരത്തുന്ന പശുവിനോടോ? പരിമളം പരത്തുന്ന പൂവിനോടോ? ആഹാരം പാകപ്പെടുത്തിത്തന്നവരോടോ ……………?
കൂടെ നിന്നവരോടുള്ള നന്ദി, കുളിരു നൽകിയതിന്. കാത്തു നിന്നവരോടുള്ള നന്ദി, കരുതൽ നൽകിയതിന്. കലഹിച്ചവരോടുള്ള നന്ദി, കരുത്തേകിയതിന്. ആരുടെ മുമ്പിലാണ് കരംകൂപ്പാതെ, കണ്ടില്ലെന്നു നടിച്ചു നമുക്കു കടന്നുപോകാനാകുന്നത് ?
നന്ദികാണിക്കാത്തവർക്കും നന്മ ചെയ്യുക എന്നതാണു നമ്മുടെ കടമ. അതാണ് സ്വന്തം കഴിവുകളാടുള്ള ആദരവും, അവ നൽകിയ സർവ്വേശ്വരനോടുള്ള യഥാർത്ഥ നന്ദിയും പ്രകടിപ്പിക്കാനുള്ള ഏക മാർഗ്ഗം. നമുക്കതിനാകട്ടെ..!

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര