🌹 “ഇന്നത്തെ ചിന്താവിഷയം” 🌹 – 2024 | നവംബർ 26 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

നമുക്കു മറ്റുള്ളവരിൽ വിശ്വാസം നിലനിർത്താൻ ആകട്ടെ
———————————————————————————-–

വീടിനു തീ പിടിച്ചപ്പോൾ വീട്ടുടമ രക്ഷയ്ക്കായി മേൽക്കൂരയിൽ കയറി. അയാൾ അപകടാവസ്ഥയിൽ മുകളിലിരിക്കുന്നതു കണ്ട് , അയൽക്കാരിൽ
ചിലർ, ഒരു കമ്പിളിപ്പുതപ്പു കൊണ്ടുവന്ന് വിരിച്ചു പിടിച്ചു. എന്നിട്ടു പറഞ്ഞു: “താഴേക്കു ചാടിക്കോളൂ, ഞങ്ങൾ പിടുച്ചുകൊള്ളാം”. വീട്ടുടമ പറഞ്ഞു: “എനിക്കു നിങ്ങളെ പണ്ടേ അറിയാം. ഞാൻ ചാടിക്കഴിയുമ്പോൾ, നിങ്ങൾക്കു പുതപ്പു മാറ്റാനല്ലേ?”

അയൽക്കാർ പിന്നെയും നിർബന്ധിച്ചപ്പോൾ, അയാൾ പറഞ്ഞു: “നിങ്ങളെയൊന്നും എനിക്കു വിശ്വാസമില്ല. അതു കൊണ്ട് , ആ കമ്പിളി നിലത്തു വിരിച്ചിട്ട് നിങ്ങൾ മാറി നിൽക്കാമെങ്കിൽ, ഞാൻ ചാടാം.”

കാഴ്ച വികലമാകാതിരിക്കാൻ, കണ്ണിൻ്റെ കാഴ്ചാശേഷി മാത്രം പോരാ; നല്ല മനസ്സു കൂടി വേണം. അപരരെ വിശ്വാസമില്ലാത്തവർക്ക് അവനവനിലും വിശ്വാസം കാണണമെന്നില്ല! ആരെയും വിശ്വസിക്കാതെ എങ്ങനെയാണു ജീവിക്കാനാകുക? ഭക്ഷണം വിളമ്പുന്നവരുടെ കയ്യിൽ വിഷമുണ്ടെന്നു സംശയിച്ചാൽ പ്പിന്നെ, ഭക്ഷണം കഴിക്കാനാകുമോ?

ചില സമയങ്ങളിൽ, ശത്രുവെന്നു നാം ചിന്തിക്കുന്നവരെപ്പോലും, നമുക്കു വിശ്വസിക്കണ്ടി വന്നേക്കാം. അതു കൊണ്ടു നഷ്ടം സംഭവിക്കുന്നില്ലെങ്കിൽ, അതല്ലാതെ മറ്റു മാർഗ്ഗമില്ലെങ്കിൽ, എന്തിനവിശ്വസിക്കണം? എല്ലാവരേയും കണ്ണുമടച്ചു് വിശ്വസിക്കുന്നതിനേക്കാൾ വലിയ തെറ്റാണു്ണ്, ആരേയും വിശ്വസിക്കാതിരിക്കുന്നത്.

എല്ലാവരിലും ചില നന്മകൾ ശേഷിക്കുന്നുണ്ടായിരിക്കും പ്രതിയോഗികളുടെ മനസ്സിൽ, എപ്പോഴും പ്രതികാരമായിരിക്കണമെന്നില്ല. അപരൻ്റെ മനസ്സിലെ നന്മ കണ്ടെത്താൻ കഴിയാതിരിക്കുന്നതാണ്, ബന്ധങ്ങളുടെ ഊഷ്മളത നഷ്ടപ്പെടുന്നതിനു കാരണം. ഒരാളെ വിശ്വസിക്കുക എന്നതാകും അയാളോടു കാണിക്കാൻ കഴിയുന്ന ഏറ്റവും വലിയ ബഹുമാനം. നമുക്കതിനാകട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര