🌹 “ഇന്നത്തെ ചിന്താവിഷയം” 🌹 – 2024 | നവംബർ 22 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ജീവിതം ഒരു നേർ രേഖ അല്ല
———————————————–.

റയിൽവേ സ്‌റ്റേഷനിലെത്തിയ യാത്രക്കാരൻ, അന്വേഷണ കൗണ്ടറിൽ തിരക്കി: “മലബാർ എക്സ്പ്രസ് പോയോ?” “ഇല്ല “, കൗണ്ടറിലിരുന്ന ഉദ്യോഗസ്ഥൻ പറഞ്ഞു. “മാവേലിയോ?”, അയാൾ വീണ്ടും ചോദിച്ചു. “അര മണിക്കൂർ താമസാച്ചാണ്
അതോടുന്നതു്”, കൗണ്ടറിലിരുന്നയാളുടെ മറുപടി വന്നു. “ജനശതാബ്ദി, കൃത്യസമയത്താണോ?” യാത്രക്കാരൻ വീണ്ടും അന്വേഷിച്ചു. ” അതെ, പക്ഷെ വരാൻ ഇനിയും സമയമുണ്ട് ” അതിനും മറുപടി വന്നു. അയാളുടെ അടുത്ത ചോദ്യം അസ്വാഭാവികമായായിരുന്നു! “ചരക്കു വണ്ടി വല്ലതും വരാനുണ്ടോ?” യാത്രക്കാരനെന്തോ ‘തകരാർ’ ഉണ്ടെന്നു മനസിലാക്കിയ ഉദ്യാഗസ്ഥൻ അയാളോടു ചോദിച്ചു: “എങ്ങോട്ടു പോകാനാണ് ?” അയാൾ പറഞ്ഞു: “എങ്ങും പോകാനല്ല, ഈ പാളമൊന്നു മുറിച്ചു കടക്കാനാണു്ണ് !”

തികഞ്ഞ കണിശത്തോടെ മാത്രം ജീവിക്കുന്നവരിൽ ഭൂരിഭാഗവും, ഒന്നും ചെയ്യാൻ കഴിയാത്തവരോ, തുടങ്ങിയ കാര്യങ്ങൾ പോലും പാതി വഴിയിൽ അവസാനിപ്പിച്ചവരോ, ആയിരിക്കും. അളന്നു തിട്ടപ്പെടുത്തിയും, അരിച്ചെടുത്തും, ഗുണമേന്മ നോക്കിയും മാത്രം, എല്ലാക്കാര്യങ്ങളും മുമ്പോട്ടു കൊണ്ടു പോകാനാകയില്ല. ജീവിതത്തിന് അതിൻ്റേതായ ഒഴുക്കും, ആകസ്മികതയും ഉണ്ടായിരിക്കും. ഒരു ജീവിതവും ഇന്നുവരെ നേർരേഖയിൽ മാത്രം സഞ്ചരിച്ചിട്ടില്ല.
പൊങ്ങിയും താണും, തിരിഞ്ഞും മറിഞ്ഞും, തകർന്നടിഞ്ഞും ഉയിർത്തെഴുന്നേറ്റുമൊ ക്കെയാണ് ജീവിതം അതിൻ്റെ താളവും ലയവും കണ്ടത്തുന്നത് ! എല്ലാ വണ്ടികളും കടന്നു പോയ ശേഷം മാത്രം, ഒരാൾക്കു പാളം മുറിച്ചുകടക്കാനാവില്ല. ഇടവേളകളിൽ സ്വന്തം സമയവും സരണിയും, അയാളതിനു കണ്ടെത്തേണ്ടി വരും.

വേണ്ട അളവിൽ മാത്രമേ എല്ലാം ഉണ്ടാകാവൂ: സമ്പത്തായാലും, സന്തോഷമായാലും. ധാരാളിത്തവും ദാരിദ്ര്യവും സന്തുലനാവസ്ഥയുടെ എതിർ പദങ്ങളാണ്.
അമിതമായ അറിവോ, തികഞ്ഞ അജ്ഞതയോ, അതിരു കടന്ന അച്ചടക്കമോ, അനാവശ്യമായ അലഞ്ഞുനടപ്പോ ഒന്നും, ആരിലും ഒരു സംതൃപ്തിയും സൃഷ്ടിക്കില്ല.

യോജ്യമായ സമയത്ത്, ഉചിതമായ രീതിയിൽ പ്രവർത്തിക്കാനും പ്രതികരിക്കാനു
മുള്ള ശേഷിയാണു്ണ് ഒരാൾക്കാവശ്യം. അത്, സാഹചര്യങ്ങളുടെയും സമ്മർദ്ദങ്ങളുടെയും മുമ്പിൽ, പണയം വയ്ക്കയുമരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര