🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 25 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

പിടിച്ചു നിൽക്കാൻ ആകട്ടെ
————————————————

കുടുംബത്തിനു വേണ്ടി ദൂരെദേശത്തു കഷ്ടപ്പെട്ടു ജോലി ചെയ്യുകയായിരുന്ന ഗൃഹനാഥൻ, വർഷങ്ങൾക്കൊണ്ടു നേടിയ സമ്പാദ്യവുമായി വീട്ടിലേക്കു മടങ്ങുക യായിരുന്നു. ഒരു നദി കടന്നു വേണമായിരുന്നു വീട്ടിലെത്താൻ. കടത്തുകാരൻ അയാളോടു ചോദിച്ചു: “നിങ്ങൾക്ക് നീന്തൽ അറിയുമോ?” “ഇല്ല”, അയാൾ പറഞ്ഞു. “ഈ വഞ്ചി മറിഞ്ഞാൽ, താങ്കൾ എന്തു ചെയ്യും?” കടത്തുകാരൻ്റെ ചോദ്യമവസാനിക്കുന്നതിനു മുമ്പുതന്നെ, ഒഴുക്കിൽപ്പെട്ടു വള്ളം മറിഞ്ഞു.

ഒരു തരത്തിൽ, നീന്തി മറുകരയിലെത്തിയ വഞ്ചിക്കാരൻ നോക്കുമ്പോൾ, മറ്റേയാളും തീരത്തു നിൽക്കുന്നു. കടുത്തുകാരൻ ദേഷ്യത്തോടെ ചോദിച്ചു: “നിങ്ങളെന്തിനാണ് നീന്തൽ അറിയില്ലെന്നു കള്ളം പറഞ്ഞതു്?”‘ അയാൾ പറഞ്ഞു: “സത്യമായും എനിക്കു നീന്തലറിയില്ല. മുങ്ങിച്ചാകാൻ തുടങ്ങിയപ്പോൾ, എന്നെ വിശ്വസിച്ചു വീട്ടിലിരിക്കുന്ന കുടുംബത്തെ ഓർമ്മ വന്നു. എല്ലാ സമ്പാദ്യവുമടങ്ങിയ ഈ സഞ്ചിയുമായി, കൈകാലിട്ടടിച്ച് , എങ്ങനെയോ ഞാൻ ഇവിടെയെത്തി”, തൻ്റെ അരയിൽ മുറുകെക്കെട്ടിയിരുന്ന ഒരു സഞ്ചി ചൂണ്ടിക്കാട്ടി അയാൾ പറഞ്ഞു! “ഈ ഭാണ്ഡം മാറ്റി, എന്നെ നദിയിലിട്ടു നോക്ക്, ഞാൻ മുങ്ങിച്ചാകും, തീർച്ച”, അയാൾ കൂടിച്ചേർത്തു.

തോൽക്കാതിരിക്കാൻ ഒരു കാരണമെങ്കിലുമുണ്ടാകണം ജീവിതത്തിൽ. എല്ലാം നഷ്ടപ്പെട്ടുവെന്നു കരുതുന്നവർ പിടിച്ചു നിൽക്കുന്നത് ആ ഒരു വിചാരത്തിൻ്റെ പേരിലായിരിക്കും. എന്തിനു വേണ്ടി ഒരാൾ നിലകൊള്ളുന്നുവോ, അത് ഒരു ഊർജ്ജകേന്ദ്രമായിരിക്കും അയാൾക്ക്.

അടിയൊഴുക്കുകൾക്കു മുമ്പിൽ അടിയറവു പറയാതിരിക്കാനും, പ്രയത്നങ്ങൾ വിഫലമാകാതിരിക്കാനും. പരാജയപ്പെടുമെന്നു കരുതിയ എല്ലാവരും പരാജയപ്പെട്ടിട്ടില്ല, ആശയറ്റവരൊഴിച്ച്. നമുക്കും പിടിച്ചു നിൽക്കാനാകട്ടെ ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര