🥭അങ്കമാലി മാങ്ങാക്കറി ✍തയ്യാറാക്കിയത്: ദീപ നായർ ബാംഗ്ലൂർ

എല്ലാവർക്കും നമസ്കാരം

മാങ്ങ സീസൺ ആയതിനാൽ മാങ്ങ കൊണ്ട് സാധാരണ ഉണ്ടാക്കുന്ന വിഭവങ്ങളല്ലാതെ പുതിയ പരീക്ഷണങ്ങൾ സർവ്വസാധാരണമാണ്. മാങ്ങാക്കറി നമ്മളെല്ലാവരും ഉണ്ടാക്കുമെങ്കിലും അങ്കമാലിക്കാരുടെ മാങ്ങാക്കറി ഫേമസ് ആണല്ലോ. ഇത്തിരി വ്യത്യസ്ത രീതിയിൽ ഞാൻ ഉണ്ടാക്കി നോക്കി. നല്ല രുചി. അപ്പോൾപ്പിന്നെ നിങ്ങളുമായി പങ്കുവയ്ക്കാമെന്നു വച്ചു.

🥭അങ്കമാലി മാങ്ങാക്കറി

🌼ആവശ്യമായ സാധനങ്ങൾ

🌻മൂത്ത മാങ്ങ – ഒരെണ്ണം
🌻ചെറിയ ഉള്ളി – ആറെണ്ണം
🌻ഇഞ്ചി – ഒരു കഷണം
🌻പച്ചമുളക് – രണ്ടെണ്ണം
🌻കറിവേപ്പില – ഒരു തണ്ട്
🌻ഉപ്പ് – പാകത്തിന്
🌻മഞ്ഞൾപ്പൊടി – കാൽ ടീസ്പൂൺ
🌻മുളകുപൊടി – അര ടീസ്പൂൺ
🌻മല്ലിപ്പൊടി – ഒരു ടീസ്പൂൺ
🌻വിനാഗിരി – രണ്ടു ടീസ്പൂൺ
🌻വെളിച്ചെണ്ണ – ഒരു ടീസ്പൂൺ
🌻രണ്ടാം തേങ്ങാപ്പാൽ – ഒരു കപ്പ്
🌻കട്ടി തേങ്ങാപ്പാൽ – മുക്കാൽ കപ്പ്
🌻വെളിച്ചെണ്ണ – മൂന്ന് ടീസ്പൂൺ
🌻കടുക് – അര ടീസ്പൂൺ
🌻ചെറിയ ഉള്ളി – രണ്ടെണ്ണം
🌻കറിവേപ്പില – ഒരു തണ്ട്
🌻ഉണക്കമുളക് – ഒരെണ്ണം

🌼ഉണ്ടാക്കുന്ന വിധം

🌻മൺചട്ടിയിൽ തൊലി കളഞ്ഞ് ചെറുതാക്കി മുറിച്ച മാങ്ങ, ഉള്ളി, ഇഞ്ചി എന്നിവയും കീറിയ പച്ചമുളകും, കറിവേപ്പിലയും ഉപ്പ്, മഞ്ഞൾപ്പൊടി, മുളകുപൊടി, മല്ലിപ്പൊടി, വെളിച്ചെണ്ണ, വിനാഗിരി ഇവ ചേർത്ത് കൈ കൊണ്ട് നന്നായി മിക്സ് ചെയ്ത് പതിനഞ്ച് മിനിറ്റ് അടച്ചു വയ്ക്കുക.

🌻രണ്ടാം തേങ്ങാപ്പാൽ ചേർത്ത് പാകം ചെയ്യുക.

🌻വെന്തു കഴിഞ്ഞാൽ ഒന്നാം പാൽ ചേർത്തിളക്കി ചൂടായതും സ്റ്റൗവ് ഓഫ് ചെയ്യുക.

🌻വെളിച്ചെണ്ണ ചൂടാക്കി കടുക് പൊട്ടിച്ച് വട്ടത്തിൽ മുറിച്ച ഉള്ളിയും കറിവേപ്പിലയും മുളകും ചേർത്തു മൂപ്പിച്ച് കറിയിൽ ചേർക്കുക. കുറച്ചുനേരം അടച്ചു വയ്ക്കുക.

🌻ഉച്ചയൂണിനുള്ള അങ്കമാലി മാങ്ങാക്കറി തയ്യാർ. അപ്പോ തുടങ്ങാം ല്ലേ.

തയ്യാറാക്കിയത്: ദീപ നായർ ബാംഗ്ലൂർ