🌻മാവേലിക്കരയിൽ നിന്നൊരു പുണ്യപുഷ്പം 🌻

അമേരിക്കയിലെ ഫിലഡൽഫിയയിൽ നിന്നും പ്രസിദ്ധീകരിക്കപ്പെടുന്ന ‘മലയാളി മനസ്സ് ‘ എന്ന ഓൺലൈൻ പത്രത്തിലെ സ്ഥിരം എഴുത്തുക്കാരനും അഡ്വൈസറി ബോർഡ് അംഗവുമാണ് പ്രൊഫസർ എ. വി. ഇട്ടി. ഞാൻ അദ്ദേഹത്തെ പരിചയപ്പെടുന്നത് ആർഷ ഭാരതി എന്ന ഫേസ്ബുക് ഗ്രൂപ്പ്‌ വഴിയാണ്. അദ്ദേഹം സ്ഥിരമായി അതിൽ എഴുതുകയുണ്ട്. ആ എഴുത്തുകളിൽ ആകൃഷ്ടനായ മലയാളി മനസ്സിന്റെ ചീഫ് എഡിറ്റർ ബഹു. രാജു ശങ്കരത്തിൽ, പ്രൊഫസർ എ. വി ഇട്ടിയെ മലയാളി മനസ്സിൽ എഴുതാനായി ക്ഷണിച്ചു. അതിനൊരു നിമിത്തമാവാൻ എനിക്ക് സാധിച്ചതിൽ ഏറെ ചാരിതാർത്ഥ്യമുണ്ട്.

മലയാളി മനസ്സ് ഓൺലൈൻ പത്രത്തിൽ അദ്ദേഹം ഞാറാഴ്ച തോറും ‘സുവിശേഷ വചസ്സുകൾ’ എന്ന പംക്തി എഴുതി വരുന്നു. ഒപ്പം, എല്ലാ ദിവസവും മനുഷ്യർ അനുവർത്തിക്കേണ്ട ജീവിതചര്യകളും മൂല്യങ്ങളും സംബന്ധിച്ച്, ‘ഇന്നത്തെ ചിന്താവിഷയം’ എന്ന പേരിലും മലയാളി മനസ്സിൽ ക്രമമായി എഴുതുന്നു. ‘പുണ്യ ദേവാലയങ്ങളിലൂടെ ഒരു യാത്ര’ എന്ന എൻ്റെ രണ്ടാമത്തെ പുസ്തകത്തിൽ അദ്ദേഹം മനോഹരമായ ഒരു ആശംസ എഴുതി എന്നെ പ്രോത്സാഹിപ്പിക്കുയുണ്ടായി എന്ന സന്തോഷവും, ഞാൻ ഈ അവസരത്തിൽ പങ്കുവയ്ക്കുന്നു. നിരവധി ഗ്രന്ഥങ്ങൾ രചിച്ചിട്ടുള്ള പ്രൊഫ. എ വി ഇട്ടി അറിവിന്റെ നിറകുടം എന്നതിലുപരി, നല്ലൊരു മനുഷ്യ സ്‌നേഹി കൂടിയാണ്.

ഒക്ടോബർ മാസത്തിൽ, ജീവിത പങ്കാളി ലീല (സൂസി ഇട്ടി)യും സാറും കൂടി, ഇന്ത്യയിലെ ഏറ്റവും പിന്നോക്ക സംസ്ഥാനങ്ങളിൽ ഒന്നായ ഒഡീഷ (ഒറീസ്സ) സംസ്ഥാനത്തെ റയഗഡ ജില്ലയിൽ പെട്ട ജിമിദിപ്പേട്ട കേന്ദ്രമാക്കി, സാർ അദ്ധ്യ
ക്ഷനായി പ്രവർത്തിക്കുന്ന ‘അഡോർ’ (ADORE – Agency for the Development of the Oppressed through Relief and Education) എന്ന സംഘത്തിൻ്റെ നേതൃത്വത്തിൽ
വികസന-വിദ്യാഭ്യാസ പ്രവർത്തനങ്ങൾ നിർവ്വഹിക്കപ്പെടുന്ന സ്ഥലങ്ങൾ സന്ദർശിച്ച്,
അവിടെ നടക്കുന്ന പ്രവർത്തനങ്ങൾ സംബന്ധിച്ച് പങ്കുവെച്ചത് വായിച്ചപ്പോൾ, അതിയായ സന്തോഷം തോന്നി.

പെൺകുട്ടികൾക്കും ആൺകുട്ടികൾക്കുമായി നടത്തപ്പെടുന്ന അഡോർ ഹോസ്റ്റലുകൾ സ്ഥിതിചെയ്യുന്ന ജിമിദിപ്പേട്ടയിൽ നിന്നും ഏറെ വിദൂരതയിൽ വനമദ്ധ്യത്തിൽ സ്ഥിതിചെയ്യുന്ന ടിലേഷ്, ആംബ് ഗുഡ, മിനിയാടംഗ, ഉസിരിക്കപ്പാട് എന്നീ ഗ്രാമങ്ങൾ സന്ദർശിക്കുവാനും അവർക്ക് ഇടയായി. തുടർന്ന് ADORE Hostel ൽ നടക്കുന്ന കുട്ടികളുടെ സന്ധ്യാരാധനകളിലും കലാകായിക പരിശീലന പരിപാടികളിലും പങ്കെടുക്കുവാനും അവർക്ക് സാധിച്ചു. ജിമിദിപ്പേട്ടയിൽനിന്ന് 16 കിലോ മീറ്ററോളം
അകലെ വനമദ്ധ്യത്തിൽ ഉള്ള ഒരു ഗ്രാമമാണ് ആംബഗുഡ. വിദ്യാഭ്യാസ സൗകര്യങ്ങളോ, സാമൂഹ്യ വളർച്ചയോ ഒന്നും, ഇന്നും ലഭ്യമല്ലാത്ത, വികസനത്തിനായി വാഞ്ചിക്കുന്ന ഗ്രാമീണമേഖലകളാണ് അവയെല്ലാം.

ഈ എൺപതാം വയസ്സിലും അദ്ദേഹം തൻ്റെ പത്നിയോടൊത്തു ഒറീസ്സാ സന്ദർശിക്കുകയും അഡോറിൻ്റെ സ്ഥലം പ്രവർത്തകരോടൊപ്പം, റയഗഡ കളക്ടറേയും
എം എൽ എയും നേരിൽ കണ്ട്, ജീമിദിപ്പേട്ടയിൽ നിന്നും ആംബഗുഡ ഗ്രാമത്തിലേക്കുള്ള റോഡ് നിർമ്മാണത്തെക്കുറിച്ച് സംസാരിച്ച്, റോഡ് നിർമ്മാണം ഈ സാമ്പത്തിക വർഷം തന്നെ പൂർത്തിയാകും എന്ന വാഗ്ദത്തം അവരിൽ നിന്നും നേടുകയുമുണ്ടായി. അവിടത്തെ സ്ക്കൂൾ കുട്ടികൾക്കായി ‘അഡോർ’ നടത്തുന്ന റ്റ്യൂഷ്യൻ ക്ലാസുകൾ ഫലകരമായി നടക്കുന്നു എന്ന് നേരിൽക്കണ്ട് ബോധ്യപ്പെടാനും അവർക്കായി.

ക്രിസ്തീയ ജീവിതത്തിന്റെ സക്രിയവും സചേതനവുമായ സാഫല്യം തേടുന്ന വിശ്വാസ തീർത്ഥയാത്രയാണ് പ്രൊഫസർ എ. വി ഇട്ടിയുടെ ജീവിതം എന്ന് ഏവരും സാക്ഷ്യപ്പെടുത്തും. മുതിർന്നവരുടെ ശാരീരിക പരിമിതികൾ ആത്മ ബലത്തിന്റെ ഉണർവിൽ അതിജീവിച്ച്, സ്വയം ഒരുസാക്ഷ്യ മാതൃകയാകുകയാണ് പ്രൊഫസർ എ വി ഇട്ടി. സാറിന്റെ മഹനീയ ജീവിതം 80 ന്റെ നിറവിൽ എത്തി നിൽക്കുമ്പോൾ, ADORE പ്രവർത്തനങ്ങളെയും പ്രവർത്തകരെയും ഓർത്ത് പ്രത്യേകം പ്രാർത്ഥിക്കുയും പ്രവർത്തനങ്ങളെ സാമ്പത്തികമായി സഹായിക്കുകയും ചെയ്യണമെന്ന് അദ്ദേഹം നമ്മോട് അഭ്യർത്ഥിക്കുന്നു. FCRA, 80 G റജിസ്ട്രേഷനുകളുള്ള ഒരു സംഘടനയാണ് ‘അഡോർ’ എന്നും അദ്ദേഹം വെളിപ്പെടുത്തി.

അഡോർ’ ചെയ്യുന്ന നന്മ പ്രവർത്തികളിൽ കഴിയും വിധം പങ്കാളികളാവാൻ
ദൈവം നമ്മെ എല്ലാവരേയും അനുഗ്രഹിക്കട്ടെ.

പ്രൊഫസർ ഇട്ടി എ. വി സാറിന്റെ പ്രവർത്തനങ്ങളെ കുറിച്ച് അറിയാൻ അദ്ദേഹത്തിന്റെ ഫോൺ നമ്പറിൽ വിളിക്കാൻ താല്പര്യപ്പെടുന്നു.
പ്രൊഫസർ ഇട്ടി എ. വി. Phone:- 94950 17850

സസ്നേഹം

ലൗലി ബാബു തെക്കെത്തല ✍️