തിരുവനന്തപുരം: തിരുവനന്തപുരത്തെ വെള്ളപ്പൊക്ക ദുരിത നിവാരണ പ്രവർത്തനങ്ങൾക്കായി 200 കോടി രൂപയുടെ കർമപദ്ധതിയുമായി കേന്ദ്രസർക്കാർ. ദേശീയ ദുരന്തനിവാരണ അതോറിറ്റിയാണ് കർമപദ്ധതി തയ്യാറാക്കുന്നത്. തിരുവനന്തപുരം ഉൾപ്പെടെ ഒൻപത് നഗരങ്ങൾക്കായി 1800 കോടി രൂപയുടെ കർമപദ്ധതിയാണ് നടപ്പിലാക്കുക.
ഓരോ നഗരത്തിലും നടപ്പാക്കേണ്ട പദ്ധതി സംബന്ധിച്ച നിർദേശങ്ങൾ സംസ്ഥാന സർക്കാർ സമർപ്പിക്കണമെന്ന് ദേശീയ ദുരന്ത നിവാരണ അതോറിറ്റി അറിയിച്ചു.
15-ാം ധനകാര്യ കമ്മീഷൻ്റെ ശുപാർശ പ്രകാരം ദേശീയ ദുരന്തനിവാരണ അതോറിറ്റി തങ്ങളുടെ കീഴിലെ ഫണ്ട് വിനിയോഗിക്കൽ സംബന്ധിച്ച് 2022 ഫെബ്രുവരി 28ന് മാർഗനിർദേശങ്ങൾ പുറപ്പെടുവിച്ചിരുന്നു. ഇതുപ്രകാരം, രാജ്യത്ത് ജനസംഖ്യയേറിയ ഏഴ് നഗരങ്ങളിലെ പ്രളയ ദുരിത നിവാരണ പ്രവർത്തനങ്ങൾക്കായി 2500 കോടി രൂപ അനുവദിച്ചിരുന്നു. ഇതിലേക്കുള്ള സംസ്ഥാന സർക്കാരുകളുടെ നിർദേശങ്ങൾ ദേശീയ ദുരന്തനിവാരണ അതോറിറ്റിക്ക് ലഭിക്കുകയും അന്തിമ അംഗീകാരത്തിനായി നൽകിയിരിക്കുകയുമാണ്. ഇതിനു പുറമേയാണ് സമാന കർമപദ്ധതിക്കായി ഒൻപത് നഗരങ്ങൾക്ക് 1800 കോടി രൂപ കൂടി അനുവദിച്ചിരിക്കുന്നത്.
200 കോടി രൂപയുടെ കർമപദ്ധതിയാണ് തിരുവനന്തപുരത്ത് നടപ്പാക്കുക. ഇതിൽ 150 കോടി രൂപ (75 ശതമാനം) കേന്ദ്രസർക്കാരും 50 കോടി രൂപ (25 ശതമാനം) സംസ്ഥാന സർക്കാരും നൽകും. വെള്ളപ്പൊക്കവുമായി ബന്ധപ്പെട്ട ദുരന്തങ്ങളെ നേരിടാനുള്ള നഗരങ്ങളുടെ ശേഷി വർധിപ്പിക്കാനാണ് ദുരന്തനിവാരണ അതോറിറ്റിയുടെ ലക്ഷ്യം.
സന്നിഗ്ദ്ധ ഘട്ടങ്ങളിൽ നരേന്ദ്ര മോദി സർക്കാർ കേരളത്തിന് സഹായഹസ്തം നീട്ടുന്നതിന് മറ്റൊരുദാഹരണം കൂടിയാണിതെന്ന് കേന്ദ്രമന്ത്രിയും തിരുവനന്തപുരത്തെ എൻഡിഎ സ്ഥാനാർഥിയുമായ രാജീവ് ചന്ദ്രശേഖർ പറഞ്ഞു. തിരുവനന്തപുരത്തെ പ്രളയ ദുരിത നിവാരണ പ്രവർത്തനങ്ങൾക്കായി 200 കോടി രൂപയുടെ കർമപദ്ധതി കേന്ദ്ര സർക്കാർ കേരളത്തിന് ഉറപ്പാക്കിയിരിക്കുന്നു. മഴക്കെടുതികളും വെള്ളക്കെട്ടും മൂലം തലസ്ഥാന നിവാസികൾ അഭിമുഖീകരിക്കുന്ന ബുദ്ധിമുട്ടുകൾ പരിഹരിക്കുന്നതിന് പര്യാപ്തമായ ക്രിയാത്മക നിർദ്ദേശങ്ങൾ മുന്നോട്ടുവെച്ചുകൊണ്ട്‌ സംസ്ഥാനം ഭരിക്കുന്ന പിണറായി വിജയൻ സർക്കാരാണ് ഇതിന്മേൽ വേണ്ട നടപടികൾ ഇനി കൈക്കൊള്ളേണ്ടതെന്ന് അദ്ദേഹം എക്സിൽ കുറിച്ചു.
2024 മെയ് അവസാനത്തോടെ പ്രസ്തുത നിർദേശങ്ങൾ കേന്ദ്രത്തിന് സമർപ്പിക്കേണ്ടതാണെന്ന് സംസ്ഥാന സർക്കാരിനെ വീണ്ടും ഓർമപ്പെടുത്തുന്നു. തിരുവനന്തപുരത്തെ ജനങ്ങൾക്ക് മേൽ നാശം വിതച്ച് പെയ്യുന്ന കനത്ത മഴയെത്തുടർന്നുണ്ടാകുന്ന വെള്ളപ്പൊക്കത്തിൻ്റെ പ്രശ്നങ്ങൾ പരിഹരിക്കുകയാണ് ഈ കേന്ദ്രസർക്കാർ പദ്ധതിയുടെ ലക്ഷ്യമെന്നും രാജീവ ചന്ദ്രശേഖർ ചൂണ്ടിക്കാട്ടി.
