ന്യൂഡല്‍ഹി: ഇന്ത്യന്‍ പ്രീമിയര്‍ ലീഗില്‍ രാജസ്ഥാൻ പ്ലേ ഓഫ് ഉറപ്പിച്ചു. ഡല്‍ഹി ക്യാപ്പിറ്റല്‍സ് ലക്നോ സൂപ്പര്‍ ജയന്‍റ്സിനെ പരാജയപ്പെടുത്തിയതോടെയാണ് സഞ്ജുവും സംഘവും പ്ലേ ഓഫ് ഉറപ്പിച്ചത്.
സ്കോർ: ഡൽഹി 208/4. ലക്നോ 189/9. ടോസ് നഷ്ടപ്പെട്ട് ബാറ്റിംഗിനെത്തിയ ഡല്‍ഹി നിശ്ചിത ഓവറില്‍ നാല് വിക്കറ്റ് നഷ്ടത്തില്‍ 208 റണ്‍സ് നേടി. അഭിഷേഖ് പോറല്‍ (33 പന്തില്‍ 58), ട്രിസ്റ്റണ്‍ സ്റ്റബ്‌സ് (25 പന്തില്‍ 57) എന്നിവരുടെ ഇന്നിംഗ്‌സാണ് ഡല്‍ഹിയെ മികച്ച സ്‌കോറിലേക്ക് നയിച്ചത്.
മറുപടി ബാറ്റിംഗ് ആരംഭിച്ച ലക്നോ നിശ്ചിത ഓവറിൽ 189 റൺസ് എടുക്കാനെ കഴിഞ്ഞൊള്ളു. നിക്കോളാസ് പുരാന്‍ (27 പന്തില്‍ 61), അര്‍ഷദ് ഖാന്‍ (33 പന്തില്‍ 58) എന്നിവർ പൊരുതിയെങ്കിലും ലക്ഷ്യത്തിന് 19 റൺസ് അകലെ വീണു. ഇശാന്ത് ശര്‍മ ഡല്‍ഹിക്ക് വേണ്ടി മൂന്ന് വിക്കറ്റ് വീഴ്ത്തി.
ലക്നോവിനായി നവീൻ ഉൾഹഖ് രണ്ട് വിക്കറ്റ് വീഴ്ത്തി. മുപ്പത്തിനാല് റൺസിന് മൂന്നുവിക്കറ്റ് വീഴ്ത്തിയ ഡൽഹി താരം ഇശാന്ത് ശര്‍മയെ കളിയിലെ താരമായി തെരഞ്ഞെടുത്തു. പ്ലേ ഓഫിലെത്തുന്ന രണ്ടാമത്തെ ടീമാണ് രാജസ്ഥാൻ. കോൽക്കത്ത നേരത്തേതന്നെ പ്ലേ ഓഫിലെത്തിയിരുന്നു.
