🌹 “ഇന്നത്തെ ചിന്താവിഷയം” 🌹 – 2024 | ജൂലൈ 25 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

തിരിച്ചറിവുണ്ടാകുകയാണു പ്രധാനം
…………………………….

വിരിയാൻ വച്ചിരുന്ന കോഴി മുട്ടകളുടെ കൂട്ടത്തിൽ ഒരു താറാവിൻ മുട്ടയും ഉണ്ടായിരുന്നു. യഥാസമയം എല്ലാ മുട്ടകളും വിരിഞ്ഞു കുഞ്ഞുങ്ങൾ പുറത്തിറങ്ങി. അമ്മയുടെ കൂടെ എല്ലായിടത്തും ചിക്കിച്ചികഞ്ഞ് താറാവിൻ കുഞ്ഞും നടന്നു. ഒരു ദിവസം അമ്മയും കുഞ്ഞുങ്ങളും ഒരു കുളത്തിനരികിലെത്തി. വെള്ളം കണ്ടതും, താറാവിൻ കുഞ്ഞ് ആരേയും ഗൗനിക്കാതെ വെള്ളത്തിലേയ്ക്കെടുത്തു ചാടി. പരിഭ്രാന്തയായ തള്ളക്കോഴി, അപായ സൂചന എന്നപോലെ കൊക്കാൻ തുടങ്ങി. “ഞാൻ എൻ്റെ ലോകം കണ്ടെത്തിയിരിക്കുന്നു. നിങ്ങൾ ആകുലപ്പെടേണ്ടതില്ല”, താറാവിൻ കുഞ്ഞു വിളിച്ചു പറഞ്ഞു.

ഓരോരുത്തർക്കും അവരുടേതായ ഒരു ലോകമുണ്ട്. അപരൻ്റെ ലോകത്തെ ബഹുമാനിക്കാൻ മറ്റുള്ളവർക്കാകണം. തങ്ങളുടെ മൂശയ്ക്കകത്തു രൂപത്തെടുത്തിയെടുക്കേണ്ടവരാണ് തങ്ങളുടെ കുഞ്ഞുങ്ങൾ എന്ന ചിന്ത, മാതാപിതാക്കൾ പോലും ഉപേക്ഷിച്ചേ മതിയാകൂ. തലമുറ മാറുന്നതനുസരിച്ച് തനിമയിലും താൽപര്യങ്ങളിലും മാറ്റം സംഭവിച്ചെന്നിരിക്കും. ‘നിൻ്റെ പ്രായത്തിലെ ഞാൻ’ എന്ന പ്രയോഗം, ഏറെ ജീർണിച്ചതാണെന്ന തിരിച്ചറിവ് എല്ലാവർക്കും ഉണ്ടാകണം. ഏറ്റവും വലിയ അറിവ്, തിരിച്ചറിവാണ്. എന്നാൽ,പലരുടെയും പ്രശ്നം: അറിവുണ്ട്, തിരിച്ചറിവില്ല, എന്നതാണ്. അതുണ്ടാകുകയാണു പ്രധാനം. ഒരേ മനസ്സുണ്ടാകുന്നതിനേക്കാൾ ആവശ്യം, മറ്റു മനസ്സുകളെ മനസ്സിലാക്കാനുള്ള കഴിവ് ഉണ്ടാകുകയാണ്.

നാം ആരേയും വളർത്തണമെന്നില്ല; വളരാൻ അനുവദിച്ചാൽ മാത്രം മതി! കൂട്ടിലിട്ടു വളർത്തുന്ന ഒരു പക്ഷിയുടെയും ചിറകുകൾക്കു ബലമുണ്ടാകില്ല. എന്നാൽ, തുറന്നു വിട്ടാൽ, അവ സ്വയം യാത്ര ചെയ്യുകയും, എഴാം കടലിനക്കരെ വരെ ചെന്നെത്തുകയും ചെയ്തു കൊള്ളും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര