🌹 ചിന്താ പ്രഭാതം 🌹 – 2024 | ഡിസംബർ 11 | ബുധൻ ✍ ബേബി മാത്യു അടിമാലി

ഈ ഭൂമുഖത്തുള്ള എല്ലാ മനുഷ്യർക്കും അന്തസോടെയും ആത്മാഭിമാനത്തോടെയും ജീവിക്കാൻ കഴിയണം എന്ന ചിന്തയിൽ നിന്നാണ് മനുഷ്യാവകാശം എന്ന ആശയം ഉടലെടുത്തത്. എല്ലാ മനുഷ്യരുടെയും അർഹതയായി കരുതപ്പെടുന്ന അടിസ്ഥാന അവകാശങ്ങളും സ്വാതന്ത്രൃങ്ങളുമാണ് മനുഷ്യാവകാശങ്ങൾ എന്നറിയപ്പെടുന്നത്.

മനുഷ്യാവകാശങ്ങളായി പൊതുവെ കണക്കാക്കപ്പെടുന്നവയിൽ ജീവനും സ്വത്തിനും സ്വാതന്ത്ര്യത്തിനുമുളള അവകാശം, ആശയ വിനിമയത്തിനുള്ള അവകാശം, നിയമത്തിനു മുൻപിൽ തുല്യതക്കുള്ള അവകാശം തുടങ്ങി പൗരത്വ – രാഷ്ട്രീയ അവകാശങ്ങളും സംസ്ക്കാരത്തിൽ പങ്കുപറ്റാനുള്ള അവകാശം , ഭക്ഷണത്തിനുള്ള അവകാശം തുടങ്ങിയ സാമ്പത്തിക – സംസ്കാരിക അവകാശങ്ങളും ഉൾപ്പെടുന്നു. സാമൂഹ്യ നീതി നിഷേധിക്കപ്പെടുമ്പോഴും ജനാധിപത്യ ക്രമം പാലിക്കപ്പെടാതിരിക്കുമ്പോഴും സ്വാതന്ത്ര്യം നിഷേധിക്കപ്പെടുമ്പോഴും ഇല്ലാതാവുന്നത് മനുഷ്യാവകാശങ്ങളാണ്.

1215 ജൂൺ 15 ന് ഒപ്പു വെച്ച മാഗ്നാകാർട്ടയാണ് മനുഷ്യാവകാശങ്ങൾക്കുള്ള ആദ്യ ചുവട് വെയ്യ്പ് എന്ന് പറയാം.
“സമത്വം സ്വാതന്ത്ര്യം സാഹോദര്യം ” എന്ന മുദ്രവാക്യമുയർത്തിയ ഐതിഹാസികമായ ഫ്രഞ്ചു വിപ്ലവം മനുഷ്യാവകാശ ചരിത്രത്തിൽ ഒരു നൂതന അദ്ധ്വായം എഴുതി ചേർത്തു. 1948 ഡിസംബർ 10 നാണ് യു. എൻ പൊതുസഭ അന്താരാഷ്ട്ര മനുഷ്യാവകാശ പ്രഖ്യാപനം അംഗീകരിച്ചത്. മനുഷ്യാവകാശ പ്രഖ്യാപനം കഴിഞ്ഞ് പതിറ്റാണ്ടുകൾ പിന്നിട്ടിട്ടും രാജ്യത്തിനകത്തും പുറത്തുമുള്ള മനുഷ്യാവകാശ ലംഘനങ്ങൾ പലപ്പോഴും ഗൗരവമായി കണക്കാക്കപ്പെടുന്നില്ല.

സ്ത്രീകളും പെൺകുട്ടികളും രണ്ടാം തരം പൗരന്മാരായി കാണക്കാക്കപ്പെടുന്ന അവസ്ഥ പലസ്ഥലങ്ങളിലും ഇന്നുമുണ്ട്. മനുഷ്യാവകാശ ലംഘനങ്ങൾക്ക് ഇന്ന് കുട്ടികളും ഇരയാവുന്നു. 1989 നവംബർ 20ന് യു എൻ പൊതുസഭ കുട്ടികളുടെ അവകാശ ഉടമ്പടി അംഗീകരിച്ചെങ്കിലും രാജ്യത്തെ ശിക്ഷാ നിയമത്തിലും ഭരണകൂടത്തിലും നിയമങ്ങൾ ഉണ്ടങ്കിലും കുട്ടികളുടെ അവകാശങ്ങൾ അംഗീകരിക്കാനും ചൂഷണം തടയാനും പൂർണ്ണമായും കഴിഞ്ഞിട്ടില്ല. ബാലവേല, കൗമാര പീഡനം എന്നിങ്ങനെ വ്യത്യസ്ത സാഹചര്യങ്ങളിൽ ഇന്നും ചൂഷണത്തിനും പീഡനത്തിനും കുട്ടികൾ ഇരയായികൊണ്ടിരിക്കുന്നു .

മനുഷ്യ ചരിത്രത്തിലെ പുതുയുഗപ്പിറവിയ്ക്ക് തുടക്കമിട്ട സാർവ്വദേശീയ മനുഷ്യാവകാശ പ്രഖ്യാപനത്തിലെ ഒന്നാം അനുഛേദം പറയുന്നതു പോലെ “എല്ലാ മനുഷ്യരും സ്വതന്ത്രമായി ജനിക്കുന്നു. പദവിയിലും അവകാശത്തിലും തുല്യത പുലർത്തുകയും ചെയ്യുന്നു . അവർ ബുദ്ധിയും മനസ്സാക്ഷിയും കൊണ്ട് അനുഗ്രഹീതരും പരസ്പരം സാഹോദര്യം പുലർത്താൻ നിർബന്ധിതരുമാണ് ” .

എത്രയോ സമര പോരാട്ടങ്ങളിലൂടെ നേടിയെടുത്ത മനുഷ്യാ അവകാശങ്ങൾ നിഷേധിക്കപ്പെടുന്ന ഇന്നത്തെ കാലഘത്തിൽ ഈ അവകാശങ്ങളെക്കുറിച്ച് ബോധവാന്മാരാകുകയും അവ സംരക്ഷിക്കാനുള്ള കാവലാളായി തീരുകയും ചെയ്യേണ്ടത് ഏതൊരു പൗരന്റെയും കടമയും ഉത്തരവാദിത്വവുമാണ് .

ഒത്തിരി ഇഷ്ടത്തോടെ……🙏

🙏 ശുഭദിനാശംസകൾ 🙏

ബേബി മാത്യു അടിമാലി