🌹 “ഇന്നത്തെ ചിന്താവിഷയം” 🌹 – 2024 | ജൂൺ 20 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

സത്യത്തെ അഭിമുഖീകരിക്കാൻ ആകട്ടെ
————————————————————-

മുല്ല നസറുദ്ദീൻ എപ്പോഴും താൻ മരിച്ചു പോയി എന്നു പറയുമായിരുന്നു. ഇതു കേട്ടു മടുത്ത അദ്ദേഹത്തിൻ്റെ ഭാര്യ, ഒരിക്കൽ അദ്ദേഹത്തേയും കൊണ്ട് ഒരു ഡോക്ടറുടെ അടുക്കൽ പോയി. ഡോകർ ഒരു സൂചി കൊണ്ട് വേറൊരാളുടെ കയ്യിൽ കുത്തി. അപ്പോൾ രക്തം വന്നു. മുല്ല പറഞ്ഞു: “ഇയാൾ മരിച്ചിട്ടില്ല!” ഇപ്പോൾ കാര്യം മനസ്സിലായില്ലെ എന്നു ചോദിച്ചു്, ഡോക്ടർ മുല്ലയുടെ കൈ മേലും, സൂചി കൊണ്ടു കുത്തി. അപ്പോഴും രക്തം വന്നു. ഡോകടർ ചോദിച്ചു: “ഇപ്പോൾ മനസ്സിലായില്ലെ, താങ്കളും മരിച്ചിട്ടില്ലെന്ന് ?” മുല്ല പറഞ്ഞു: “ഇപ്പോൾ എനിക്കു മനസ്സിലായി, മരിച്ചയാളിൻ്റെ കയ്യിൽ നിന്നും രക്തം ഒഴുകുമെന്ന് !”

യാഥാർത്ഥ്യങ്ങളോടു പൊരുത്തപ്പെടാനാവാത്തവർ എല്ലാം, ഒരളവിൽ മരിച്ചവരാണ്; സത്യം നിഷേധിക്കുന്നവരെല്ലാം, തങ്ങളുടെ ഭാവനാസൃഷ്ടികൾക്ക് അടിമകളും. കൈത്തിരികൾ മാത്രമല്ല, കനൽക്കട്ടകളും, ജീവിതത്തിൻ്റെ ഭാഗമായെന്നു വരാം. ഇഷ്ടമുള്ളതിനേമാത്രം തെരെഞ്ഞെടുത്തവതരിപ്പിക്കുവാൻ, ജീവിതം ഒരു സ്വപ്നാടനമല്ല. സിനിമയല്ലാത്തതുകൊണ്ട്, ഇടവേളകളിൽ ഇറങ്ങിപ്പോകാനുള്ള സ്വാതന്ത്ര്യം ആർക്കും ലഭിക്കുകയുമില്ല. ഒരു വശത്തു കരളുറപ്പും ദൃഢനിശ്ചയവും, മറുവശത്തു നിസ്സഹായതയും നിർവികാരതയും ഓളം തല്ലും. അഭിമുഖീകരിക്കേണ്ടി വരുന്ന സത്യങ്ങളെ, അവ അർഹിക്കുന്ന പ്രാധാന്യത്തോടും ഗൗരവത്തോടും കൂടെ അഭിമുഖീകരിക്കാൻ പഠിക്കുമ്പോഴാണ് ജീവിതത്തിനു വൈവിധ്യവും, വൈശിഷ്ട്യവും കൈവരിക. ഒന്നിൽ നിന്നും ഒളിച്ചോടുരുത്; ഒന്നും ഒളിപ്പിച്ചു വയ്ക്കുകയുമരുത്. കടന്നു വരുന്നതെല്ലാം, അവയുടെ രൂപത്തിലും ഭാവത്തിലും തന്നെ കടന്നു വന്നുകൊള്ളട്ടെ. ഒന്നിനേയും തടഞ്ഞു നിർത്താനോ, ഒഴുക്കിവിടാനോ ശ്രമിക്കരുത്. അങ്ങനെ ആയാൽ, അനുഭവങ്ങൾ കൊണ്ടുവരുന്ന അമൂല്യ രത്നങ്ങൾ ചിലപ്പോൾ നമുക്കു കാണാനാകാതെ പോയി എന്നു വന്നേക്കാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര