🌹 “ഇന്നത്തെ ചിന്താവിഷയം” 🌹 – 2024 | ജൂലൈ 24 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

നമ്മുടെ ഉള്ളിലെ ഈശ്വരനെ തിരിച്ചറിയാൻ ആകട്ടെ
——————————————————————————-

ശിഷ്യൻ ഗുരുവിനോടു ചോദിച്ചു: “പ്രാർത്ഥന മൂലം ദൈവം മനുഷ്യൻ്റെ അടുത്തേക്കു വരുമോ?” അദ്ദേഹം ഒരു മറു ചോദ്യമാണ് ഉന്നയിച്ചത്. “നിൻ്റെ പ്രാർത്ഥന കൊണ്ട് നാളെ സൂര്യൻ ഉദിക്കുകയോ ഉദിക്കാതിരിക്കുകയോ ചെയ്യുമോ?” ശിഷ്യൻ പെട്ടന്നു തന്നെ മറുപടി നൽകി: “ഇല്ല, സൂര്യൻ ഉദിക്കുന്നതു പ്രപഞ്ച നിയമങ്ങൾ അനുസരിച്ചാണ് !” ഗുരു പറഞ്ഞു: “ദൈവം എപ്പോഴും നമ്മുടെ കൂടെയുണ്ട് ; നമ്മുടെ പ്രാർത്ഥന കണക്കിലെടുക്കാതെ തന്നെ!” ശിഷ്യൻ അപ്പോൾ അല്പം അത്ഭുതത്തോടെ ചോദിച്ചു: “അങ്ങനെയെങ്കിൽ, പ്രാർത്ഥന നിഷ്ഫലമാണോ?” ഗുരു പറഞ്ഞു: “നീ വേണ്ട സമയത്ത് ഉണർന്നില്ലെങ്കിൽ, നിനക്കു സൂര്യോദയം കാണാനാകില്ല. അതുപോലെ, നീ പ്രാർത്ഥിക്കുന്നില്ലെങ്കിൽ, നിനക്ക് ഈശ്വരസാന്നിദ്ധ്യം അറിയാനാകില്ല!”

ഈശ്വരനെ നാം വിളിച്ചുണർത്തേണ്ട ആവശ്യമില്ല. പ്രപഞ്ചതാളത്തിൽത്തന്നെ ഈശ്വരനുണ്ട്. എന്നാൽ ഈശ്വരനെ നാം കണ്ടത്താതെ പോകുന്നത് നാം ഉറങ്ങുന്നതു കൊണ്ടാകാം. കണ്ണടച്ചിരിക്കുമ്പോൾ പ്രത്യക്ഷപ്പെടുന്ന ഒരു അത്ഭുത പ്രതിഭാസമായി എന്തിനാണു ദൈവത്തെ വ്യാഖ്യാനിക്കുന്നത് ? തൊട്ടടുത്തിരിക്കുന്ന സഹോദരരനെ കണ്ണു തുറന്നു കാണാനാകാതെ, ദൈവത്തെക്കാണാൻ കണ്ണുമടച്ചിരുന്നിട്ടെന്തു പ്രയോജനം? അകലങ്ങളിൽ ഉള്ളവരേയാണു വിളിച്ചു വരുത്തേണ്ടത്. അടുത്തിരിക്കുന്നവരെ അടുത്തറിഞ്ഞാൽ മാത്രം മതി. മറ്റെവിടെയെങ്കിലും ഈശ്വരനെ അന്വേഷിച്ചു നടക്കുന്നതിലും നല്ലത്, അവരവരിലും അപരനിലുമുള്ള ഈശ്വരനെ കണ്ടെത്തുകയാണ്.

എല്ലാറ്റിലും ഈശ്വരനെ ദർശിക്കാനുള്ള കഴിവും കരുത്തും നൽകണെ എന്നാകട്ടെ നമ്മുടെ പ്രാർത്ഥന. പ്രാർത്ഥനകൾ ഫലകരമാകുന്നത് അനുഗ്രഹങ്ങൾ വാരിക്കൂട്ടുമ്പോഴല്ല; സ്വയം അനുഗ്രഹമായി മാറുമ്പോഴാണ്. പ്രാർത്ഥിക്കുന്നതിലും
ശ്രേഷ്ഠമാണ്, മറ്റുള്ളവരുടെ പ്രാർത്ഥനകളിൽ നമുക്കൊരു സ്ഥാനമുണ്ടാകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര