🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 17 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

ഭയത്തിൽ നിന്നും ക്രീയാത്മകത രൂപപ്പെടില്ല
__________________________________________

ഒരു നാട്ടിൽ ആഭ്യന്തര യുദ്ധം പൊട്ടിപ്പുറപ്പെട്ടു. ജനങ്ങളെല്ലാം നാടുവിട്ടു പോയി. എന്നാൽ, ഒരു വയോധികൻ മാത്രം സ്വന്തം കുടിലിൽ പതിവുപോലെ ജീവിതം തുടർന്നു. ഇതറിഞ്ഞ സൈന്യാധിപൻ, അയാളെക്കാണാൻ ആ കുടിലിലെത്തി. സാധാരണ തനിക്കു ലഭിക്കാറുള്ള ബഹുമാനാദരവുകൾ ഒന്നും വൃദ്ധനിൽ
നിന്നും ലഭിക്കാതെ വന്നപ്പോൾ, സൈന്യാധിപൻ ക്രുദ്ധനായി. അദ്ദേഹം ആക്രോശിച്ചു:
“എൻ്റെ മുമ്പിൽ തല വണക്കാത്തവൻ്റെ തല ഒറ്റ വെട്ടിനു മാറ്റാൻ എനിക്കറിയാം”.
വൃദ്ധൻ ഭാവഭേദമില്ലാതെ പ്രതികരിച്ചു:
“ഇത്രയും പ്രായമുള്ള എന്നെക്കൊല്ലാൻ, വാൾ വേണമെന്നു കരുതുന്ന താങ്കളെ ആരാണു സൈന്യാധിപനാക്കിയത് ?”

ഭയമില്ലാതായാൽത്തന്നെ, എല്ലാ മാനസീകാടിമത്വങ്ങളും അവസാനിക്കും.
ആത്മാർത്ഥതയില്ലാത്ത ആദരവും, ആരും കാണത്തപ്പോഴുള്ള അവഹേളനവുമാണ് , ഭയപ്പെട്ട് , അനുസരിക്കുന്നവരിൽ നിന്നു പുറപ്പെടുക. കൈകൂപ്പി നിൽക്കുന്നവരെല്ലാം, ആജ്ഞാനുവർത്തികളാണെന്നു കരുതരുത്. കാര്യം കാണാനോ, സംഘർഷം ഒഴിവാക്കാനോ ഉള്ള താൽപര്യം മാത്രമായിരിക്കും അത്. ഭയത്തിൽ നിന്ന്, ആത്മാർത്ഥമായ അനുസരണമോ, അദ്ധ്വാനമോ രൂപപ്പെടില്ല. പീഡനങ്ങളിൽ നിന്നും രക്ഷനേടാനുള്ള ചെപ്പടിവിദ്യ മാത്രമായിരിക്കും, അത്. സമ്മർദത്തിലൂടെയും വേട്ടയാടിലൂടെയും, പുറത്തു വരിക, പകയും വിദ്വേഷവും മാത്രമായിരിക്കും.

തനിച്ചു നിൽക്കാനും, തൻ്റേടത്തോടെ പ്രതികരിക്കാനും അറിയാവുന്നവരെ, അർക്കും ഭീഷണിപ്പെടുത്തി അനുസരിപ്പിക്കാനാകില്ല. ഭയപ്പെടുത്തി നിർത്തിയിരിക്കുന്ന അടിമകളിൽ നിന്നല്ല, സ്നേഹത്തോടെ, ആദരവോടെ, ആത്മസമർപ്പണത്തോടെ ഒപ്പംനിന്നു പ്രവർത്തിക്കുന്നവരിൽ നിന്നു മാത്രമേ,
ക്രീയാത്മകത രൂപപ്പെടൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര