📱വാർത്തകൾ ഒറ്റനോട്ടത്തിൽ📱 – 2024 | ജൂലൈ 12 | വെള്ളി ✍ കപിൽ ശങ്കർ

🔹കേരളത്തിന്റെ ഭാവിവികസനസ്വപ്നം യാഥാര്‍ഥ്യമാക്കാന്‍ വിഴിഞ്ഞം അന്താരാഷ്ട്ര തുറമുഖം ഇന്ന് മുതല്‍ പ്രവര്‍ത്തനസജ്ജമാകും. വിഴിഞ്ഞം തുറമുഖത്തെത്തിയ ആദ്യ ചരക്കു കപ്പലായ ലോകത്തെ രണ്ടാമത്തെ വലിയ കപ്പല്‍ കമ്പനിയായ മെസ്‌കിന്റെ സാന്‍ ഫെര്‍ണാണ്‍ഡോയ്ക്കുള്ള ഔദ്യോഗിക സ്വീകരണം ഇന്ന്. വിഴിഞ്ഞം തുറമുഖത്ത് രാവിലെ 10-ന് നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ ചരക്കുകപ്പലിന് ഔദ്യോഗികസ്വീകരണം നല്‍കും. കേന്ദ്ര തുറമുഖവകുപ്പ് മന്ത്രി സര്‍ബാനന്ദ സോനോവാള്‍ മുഖ്യാതിഥിയാകും. അദാനി ഗ്രൂപ്പ് ഡയറക്ടര്‍ കരണ്‍ അദാനിയും പങ്കെടുക്കും. ഇന്ന് നടക്കുന്ന ചടങ്ങിനു വമ്പന്‍ ജനാവലിയെ പങ്കെടുപ്പിക്കാനാണ് സര്‍ക്കാര്‍ തീരുമാനം. സംസ്ഥാന മന്ത്രിമാര്‍, വിശിഷ്ട വ്യക്തികള്‍, ഉദ്യോഗസ്ഥര്‍, ജനപ്രതിനിധികള്‍ എന്നിവര്‍ പങ്കെടുക്കും. ചടങ്ങിലേക്ക് പ്രതിപക്ഷ നേതാവ് വി.ഡി. സതീശന് ക്ഷണമില്ല.

🔹സംസ്ഥാനത്ത് പനി ബാധിതരുടെ എണ്ണം ഉയരുന്നതായി റിപ്പോര്‍ട്ട്. 13,196 ഇന്നലെ പനി ചികിത്സയ്ക്കായി ആശുപത്രികളിലെത്തിയത്. 145 പേര്‍ക്ക് ഡെങ്കിപ്പനി സ്ഥിരീകരിച്ചു, 416 പേര്‍ ഡെങ്കിപനിയുടെ രോഗ ലക്ഷണവുമായി ചികിത്സയിലാണ്. കൂടാതെ 42 പേര്‍ക്ക് എച്ച് വണ്‍ എന്‍ വണ്‍ പനിയും സ്ഥിരീകരിച്ചു. രോഗവ്യാപനം തുടരുന്ന പശ്ചാത്തലത്തില്‍ ആരോഗ്യവകുപ്പ് ജാഗ്രതാ നിര്‍ദ്ദേശം നല്‍കിയിട്ടുണ്ട്.

🔹അരൂര്‍ തുറവൂര്‍ ദുരിതയാത്രക്ക് പരിഹാരം വാഹനങ്ങള്‍ വഴി തിരിച്ചുവിടുക മാത്രമാണെന്ന് ആലപ്പുഴ ജില്ലാ കളക്ടര്‍. അതിനായി ഗതാഗത ക്രമീകരണങ്ങള്‍ ഏര്‍പ്പെടുത്തുന്നതിനുള്ള നടപടികള്‍ ആരംഭിച്ചതായും കളക്ടര്‍ അറിയിച്ചു. വലിയ വാഹനങ്ങള്‍ അരൂര്‍ തുറവൂര്‍ ദേശീയ പാത വഴി വരാന്‍ അനുവദിക്കില്ല. റോഡിലെ കുഴികള്‍ കോണ്‍ക്രീറ്റ് ചെയ്ത് അടയ്ക്കുo. ഓടകള്‍ നിര്‍മ്മിക്കാന്‍ റോഡ് അടച്ചിടേണ്ടി വരുമെന്നും മേല്‍പാത നിര്‍മ്മാണം കഴിഞ്ഞ ശേഷം മാത്രമേ ഓട നിര്‍മ്മിക്കാനാകൂ എന്നും കളക്ടര്‍ പറഞ്ഞു.

🔹നികുതി വെട്ടിച്ചെന്ന കേസില്‍ കേന്ദ്ര സഹ മന്ത്രി സുരേഷ് ഗോപി ഹൈക്കോടതിയില്‍ അപ്പീല്‍ നല്‍കി. പുതുച്ചേരി വാഹന രജിസ്‌ട്രേഷന്‍ വഴി സുരേഷ് ഗോപി നികുതി വെട്ടിച്ചെന്നാണ് കേസ്. വിടുതല്‍ ഹര്‍ജി തള്ളിയ മജിസ്‌ട്രേറ്റ് കോടതി ഉത്തരവിനെതിരെയാണ് സുരേഷ് ഗോപി ഹൈക്കോടതിയില്‍ അപ്പീല്‍ നല്‍കിയത്. എറണാകുളം മജിസ്‌ട്രേറ്റ് കോടതിയുടെ ഉത്തരവ് റദ്ദാക്കണമെന്നാണ് സുരേഷ് ഗോപിയുടെ ആവശ്യം.

🔹ഓട്ടിസം ബാധിതനായ വിദ്യാര്‍ത്ഥിയെ സ്‌കൂളില്‍ നിന്ന് നിര്‍ബന്ധിച്ച് പുറത്താക്കിയെന്ന ആരോപണം ഉയര്‍ന്ന സംഭവത്തില്‍ സംസ്ഥാന മനുഷ്യാവകാശ കമ്മീഷന്‍ കേസെടുത്ത് അന്വേഷണത്തിന് ഉത്തരവിട്ടു. തൈക്കാട് ഗവ. മോഡല്‍ സ്‌കൂളിലെ പ്രധാന അധ്യാപകനെതിരായാണ് ആരോപണം. സ്‌കൂളില്‍ നടന്ന ഒരു പൊതു പരിപാടിക്കിടയില്‍ കുട്ടി ശബ്ദമുണ്ടാക്കിയെന്ന് പറഞ്ഞ് കുട്ടിയെ സ്‌കൂളില്‍ നിന്ന് പുറത്താക്കുകയായിരുന്നുവെന്നും സ്‌കൂളില്‍ നിന്ന് ടി.സി. വാങ്ങാന്‍ പ്രിന്‍സിപ്പല്‍, കുട്ടിയുടെ അമ്മക്ക് നിര്‍ദ്ദേശം നല്‍കിയെന്നുമാണ് ആരോപണം.

🔹കാലവര്‍ഷം സജീവമാകാന്‍ സാധ്യതയെന്ന് റിപ്പോര്‍ട്ടുകള്‍. ശനി, ഞായര്‍ ദിവസങ്ങളോടെ വടക്കന്‍ കേരളത്തില്‍ ചെറിയ തോതില്‍ കാലവര്‍ഷം ശക്തമാകുമെന്നാണ് കാലാവസ്ഥ വിഭാഗത്തിന്റെ അറിയിപ്പ്. ആഗോള മഴപാത്തിയുടെ സ്വാധീനത്താല്‍ വരും ദിവസങ്ങളില്‍ പശ്ചിമ പസഫിക്കിലും തെക്കന്‍ ചൈന കടലിലും ബംഗാള്‍ ഉള്‍ക്കടലിലും ചക്രവാതച്ചുഴികളോ ന്യുന മര്‍ദ്ദങ്ങളോ രൂപപെടാനുള്ള സാധ്യത കൂടുതലാണെന്നും കാലാവസ്ഥ വിഭാഗം അറിയിച്ചു.

🔹സംസ്ഥാനത്തെ ഒരു സര്‍ക്കാര്‍ ആശുപത്രിയ്ക്ക് കൂടി ദേശീയ ഗുണനിലവാര അംഗീകാരം ലഭിച്ചതായി ആരോഗ്യ വകുപ്പ് മന്ത്രി വീണാ ജോര്‍ജ്. വയനാട് മെഡിക്കല്‍ കോളേജ് 95 ശതമാനം സ്‌കോറോടെയാണ് മുസ്‌കാന്‍ സര്‍ട്ടിഫിക്കേഷന്‍ നേടിയെടുത്തത്. നേരത്തെ കോഴിക്കോട് സര്‍ക്കാര്‍ മെഡിക്കല്‍ കോളേജ് മാതൃശിശു സംരക്ഷണ കേന്ദ്രത്തിന് 96 ശതമാനം സ്‌കോറോടെ മുസ്‌കാന്‍ സര്‍ട്ടിഫിക്കേഷന്‍ ലഭിച്ചിരുന്നു. കൂടുതല്‍ ആശുപത്രികളെ ദേശീയ ഗുണനിലവാരത്തിലേക്ക് ഉയര്‍ത്താനാണ് ലക്ഷ്യമിടുന്നതെന്നും മന്ത്രി വ്യക്തമാക്കി.

🔹ചട്ടങ്ങള്‍ ലംഘിച്ച് റോഡില്‍ വാഹനമിറക്കുന്നവര്‍ക്കെതിരെ മുഖം നോക്കാതെ നടപടി വേണമെന്ന് സര്‍ക്കാരിനോട് ഹൈക്കോടതി. മിക്ക ഐ എ എസ് , ഐ പി എസ് ഉദ്യോഗസ്ഥരും ബീക്കണ്‍ലൈറ്റുവെച്ചും സര്‍ക്കാര്‍ എബ്ലം വച്ചുമാണ് യാത്രചെയ്യുന്നത്. ജില്ലാ കലക്ടര്‍മാര്‍ അടക്കമുളളവര്‍ക്ക് അടിയന്തര സാഹചര്യങ്ങള്‍ക്കുവേണ്ടിയാണ് ബീക്കണ്‍ ലൈറ്റ് നല്‍കിയിരിക്കുന്നത്. ചട്ടലംഘനം നടത്തിയ വാഹനങ്ങള്‍ക്കെതിരെ സ്വീകരിച്ച നടപടികള്‍ ഇന്ന് അറിയിക്കാനും ഡിവിഷന്‍ ബെഞ്ച് സര്‍ക്കാരിനോട് ആവശ്യപ്പെട്ടു.

🔹തനിക്ക് തെറ്റുതിരുത്താന്‍ അവസരം തരണമെന്ന് സഞ്ജു ടെക്കി. തന്നെ ഒരു സ്ഥിരം കുറ്റക്കാരനായി സമൂഹം കാണരുത്. സ്‌കൂളിലെ പരിപാടിയില്‍നിന്ന് ഒഴിവാക്കിയതില്‍ സങ്കടമെന്നും തെറ്റ് എറ്റുപറഞ്ഞ് വിദ്യാര്‍ഥികളോട് സംസാരിക്കാന്‍ ഉദ്ദേശിച്ചിരുന്നുവെന്നും സഞ്ജു പറഞ്ഞു. മണ്ണഞ്ചേരി സര്‍ക്കാര്‍ സ്‌കൂളിലെ മഴവില്ല് എന്ന പേരില്‍ സംഘടിപ്പിക്കുന്ന കുട്ടികളുടെ മാഗസിന്‍ പ്രകാശന ചടങ്ങിലാണ് സഞ്ജു ടെക്കിയെ മുഖ്യാതിഥിയായി ക്ഷണിച്ചിരുന്നത്. എന്നാല്‍ റോഡ് നിയമലംഘനത്തിന് ശിക്ഷിക്കപ്പെട്ടയാളെ അതിഥിയാക്കിയത് വിവാദമായതിനെ തുടര്‍ന്ന് സഞ്ജുവിനെ പരിപാടിയില്‍ നിന്ന് ഒഴിവാക്കുകയും ചെയ്തു.

🔹തിരുവമ്പാടി കെഎസ്ഇബി സെക്ഷന്‍ ഓഫീസിലുണ്ടായ ആക്രമണവുമായി ബന്ധപ്പെട്ട കേസില്‍ പ്രതികളുടെ ജാമ്യാപേക്ഷ കോടതി തള്ളി. പ്രതികള്‍ ചെയ്തത് ഗുരുതരമായ കുറ്റമെന്ന് ചൂണ്ടികാണിച്ചാണ് കോടതി ജാമ്യം നിഷേധിച്ചത്. താമരശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്ട്രേട്ട് കോടതി ആണ് ജാമ്യാപേക്ഷയില്‍ വിധി പറഞ്ഞത്. ഒന്നാംപ്രതിയും യൂത്ത് കോണ്‍ഗ്രസ് നേതാവുമായ അജ്മല്‍ സ്ഥിരം കുറ്റവാളി എന്ന് അന്വേഷണ ഉദ്യോഗസ്ഥന്‍ കോടതിയെ അറിയിച്ചു.

🔹നീറ്റ്-യുജി കേസില്‍ ഒരാള്‍ കൂടി അറസ്റ്റില്‍. ചോദ്യപേപ്പര്‍ ചോര്‍ത്തിയ കേസിലെ സൂത്രധാരനെന്ന് കരുതുന്ന ‘റോക്കി’ എന്നറിയപ്പെടുന്ന രാകേഷ് രഞ്ജനെയാണ് ബീഹാറില്‍ നിന്ന് സിബിഐ അറസ്റ്റ് ചെയ്തത്. അറസ്റ്റിന് ശേഷം വിവിധ സ്ഥലങ്ങളില്‍ അന്വേഷണ ഏജന്‍സി നടത്തിയ പരിശോധനയില്‍ രേഖകള്‍ കണ്ടെടുത്തതായി ഉദ്യോഗസ്ഥര്‍ പറഞ്ഞു. പ്രതിയെ 10 ദിവസത്തേക്ക് സിബിഐ കസ്റ്റഡിയില്‍ വിട്ടു. ഇതോടെ അറസ്റ്റിലായവരുടെ എണ്ണം 33 ആയി.

🔹തമിഴ്നാട്ടില്‍ ഗുണ്ടാ നേതാവ് ദുരൈ (40)യെ പൊലീസ് വെടിവെച്ച് കൊലപ്പെടുത്തി. തിരുച്ചിറപ്പള്ളി പുതുക്കോട്ടയില്‍ വെച്ചാണ് ഏറ്റുമുട്ടല്‍ കൊല നടന്നത്. വനമേഖലയില്‍ ഗുണ്ടകള്‍ ഒളിച്ചിരിക്കുന്നത് അറിഞ്ഞാണ് പൊലീസ് സ്ഥലത്തെത്തിയത്. അഞ്ച് കൊലക്കേസ് അടക്കം 69 കേസുകളില്‍ പ്രതിയാണ് ഗുണ്ടാ നേതാവായ ദുരൈ.

🔹ജയ്പൂര്‍ വിമാനത്താവളത്തില്‍ സിഐഎസ്എഫ് അസിസ്റ്റന്റ് സബ് ഇന്‍സ്പെക്ടറുടെ മുഖത്തടിച്ച സംഭവത്തില്‍ സ്പൈസ്ജെറ്റ് ജീവനക്കാരിയെ അറസ്റ്റ് ചെയ്തു. വിമാനത്താവളത്തിലെ സുരക്ഷാ പരിശോധന സംബന്ധിച്ചുണ്ടായ തര്‍ക്കമാണ് അടിയില്‍ കലാശിച്ചത്. എന്നാല്‍ ജീവനക്കാരിയോട് സിഐഎസ്എഫുകാരന്‍ അസഭ്യം പറഞ്ഞതാണ് പ്രശ്നങ്ങള്‍ക്ക് കാരണമെന്ന് സ്പൈസ് ജെറ്റ് വിശദീകരിക്കുന്നു.

🔹പത്ത് പേരുടെ ഒഴിവുകളിലേക്ക് ഗുജറാത്തിലെ ഒരു സ്വകാര്യ കമ്പനി നടത്തിയ അഭിമുഖത്തില്‍ പങ്കെടുക്കാനെത്തിയത് 1800ല്‍ അധികം പേര്‍. ഇന്റര്‍വ്യൂ നടന്ന ഹോട്ടലിലുണ്ടായ തിക്കിലും തിരക്കിലും കൈവരി തകര്‍ന്ന് നിരവധിപ്പേര്‍ താഴെ വീണു. ആര്‍ക്കും കാര്യമായ പരിക്കുകളില്ല. അതേസമയം സംസ്ഥാനത്തെ തൊഴിലില്ലായ്മയുടെ നേര്‍ചിത്രമാണ് ഇതെന്ന് കോണ്‍ഗ്രസ് ആരോപിച്ചു.

🔹ചാലക്കുടിയിൽ ദേശീയ പാതയോരത്തുള്ള വീട്ടിൽ മോഷണം. പണവും ഗോൾഡ് കവറിങ് ആഭരങ്ങളും നഷ്ടപ്പെട്ടു. പോട്ട സിഗ്നൽ ജംഗ്ഷനു സമീപം പുല്ലൻ വിത്സന്റെ വീട്ടിലാണ് മോഷണം നടന്നത്. വീട്ടുകാർ സ്ഥലത്തുണ്ടായിരുന്നില്ല. തിങ്കളാഴ്ച വൈകിട്ട് വിത്സനും കുടുംബവും നെടുമ്പാശേരിയിൽ മകളുടെ വീട്ടിലേക്ക് പോയിരുന്നു. വ്യാഴാഴ്ച രാവിലെ വീട്ടിൽ ജാതിക്ക പറിക്കാൻ എത്തിയവരാണ് മോഷണം നടന്നതായി കണ്ടത്. തുടർന്ന് വീട്ടുകാരെ വിളിച്ചു വരുത്തി നടത്തിയ പരിശോധനയിലാണ് 3000രൂപയും ഗോൾഡ് കവറിങ് ആഭരങ്ങളും നഷ്ടപ്പെട്ടതായി കണ്ടെത്തിയത്. വീടിനുള്ളിലെ വാതിലുകളും, അഞ്ചോളം അലമാരകളും തകർത്ത മോഷ്ടാക്കൾ സാധങ്ങളും വാരിവലിച്ചിട്ടിട്ടുണ്ട്. വീട്ടിൽ സൂക്ഷിച്ചിരുന്ന അറുപതിനായിരം രൂപയോളം വില വരുന്ന ജാതിക്കയും, ഇലക്ട്രോണിക്സ് ഉപകരണങ്ങളും നഷ്ടപ്പെട്ടിട്ടില്ല. പണവും സ്വർണവും അപഹരിക്കുന്ന സംഘമാകാം മോഷണത്തിനു പിന്നിൽ എന്നാണ് നിഗമനം.

🔹സംസ്ഥാനത്ത് ആറു പേർക്ക് കൂടി കോളറ സ്ഥിരീകരിച്ചു. തിരുവനന്തപുരം നെയ്യാറ്റിൻകരയിൽ ചികിത്സയിൽ ഉണ്ടായിരുന്നവരിൽ ആറുപേർക്കാണ് രോഗം സ്ഥിരീകരിച്ചത്. രോഗം സ്ഥിരീകരിച്ച മൂന്നുപേര്‍ ഐരാണിമുട്ടം ഐസൊലേഷന്‍ വാര്‍ഡിലും രണ്ട് പേര്‍ മെഡിക്കല്‍ കോളേജിലും ചികിത്സയില്‍ തുടരുകയാണ്. ഇതോടെ തിരുവനന്തപുരത്ത് രോഗം സ്ഥിരീകരിച്ചവരുടെ എണ്ണം 9 ആയി. നേരത്തെ കാസർഗോഡും ഒരാൾക്ക് രോഗം സ്ഥിരീകരിച്ചിരുന്നു. രോഗവ്യാപനം തുടരുന്ന പശ്ചാത്തലത്തിൽ ആരോഗ്യവകുപ്പ് ജാഗ്രതാ നിർദ്ദേശം നൽകിയിട്ടുണ്ട്.

🔹പറന്നുയരുന്നതിന് തൊട്ടുമുമ്പ് അമേരിക്കന്‍ എയര്‍ലൈന്‍സ് വിമാനത്തിന്റെ ടയര്‍ പൊട്ടിത്തെറിച്ച് അപകടം. യു.എസിലെ ടാംമ്പയില്‍ നിന്നും ഫ്ലോറിഡയിലേക്ക് പുറപ്പെട്ട വിമാനത്തിന്റെ ടയറുകളില്‍ ഒന്നാണ് റണ്‍വേയില്‍ വെച്ച് പൊട്ടിത്തെറിച്ചത്. യു.എസിലെ ടാംമ്പാ വിമാനത്താവളത്തില്‍ വെച്ച് ബുധനാഴ്ച രാവിലെയായിരുന്നു സംഭവം.

🔹വിവാഹ വാര്‍ഷിക ആഘോഷത്തിനായി വിദേശത്തെത്തിയ താരദമ്പതികള്‍ നേരിടേണ്ടി വന്നത് ദുരനുഭവം. നടന്‍ വിവേക് ദഹിയയും ഭാര്യയും നടിയുമായ ദിവ്യാങ്ക ത്രിപാഠിയുമൊത്തുള്ള വിദേശ സഞ്ചാരത്തിനിടെ ഫ്‌ളോറന്‍സില്‍വെച്ച് തങ്ങള്‍ കൊള്ളയടിക്കപ്പെട്ടെന്ന് വിവേക് വെളിപ്പെടുത്തി. തങ്ങളുടെ പഴയ കുറച്ച് വസ്ത്രങ്ങളൊഴികെ കള്ളന്മാര്‍ എല്ലാം കൊണ്ടുപോയെന്നും സഹായംതേടിയപ്പോള്‍ ലോക്കല്‍ പൊലീസ് കൈയ്യൊഴിഞ്ഞുവെന്നും വിവേക് പറഞ്ഞു.

🔹അസമില്‍ നടന്ന വന്‍ ലഹരി വേട്ടയില്‍ 30 കോടി രൂപ വിലവരുന്ന ഒരു ലക്ഷം യാബ ഗുളികകള്‍ പിടിച്ചെടുത്തു. ലഹരി ശേഖരം കടത്തുകയായിരുന്ന രണ്ട് യുവാക്കളെ പൊലീസ് അറസ്റ്റ് ചെയ്തിട്ടുണ്ട്. കരിംഗഞ്ച് ജില്ലയിലെ ഗന്ധരാജ് ബാരി ഏരിയയില്‍ രാത്രിയായിരുന്നു ലഹരി വേട്ട. കാറിന്റെ ഇന്ധന ടാങ്കില്‍ പ്രത്യേക സംവിധാനമുണ്ടാക്കി അതിനകത്തായിരുന്നു ഒരു ലക്ഷം ഗുളികകള്‍ ഒളിപ്പിച്ചിരുന്നത്. വിപണിയില്‍ ഇതിന് 30 കോടി രൂപ വില വരുമെന്ന് പൊലീസ് പറഞ്ഞു.

🔹ഗൗതം ഗംഭീര്‍ പുതിയ പരിശീലകനായി ചുമതലയേറ്റതിന് ശേഷമുള്ള ഇന്ത്യയുടെ ആദ്യ പരമ്പര ശ്രീലങ്കയ്‌ക്കെതിരെ. ജൂലൈ 26 മുതലാണ് പരമ്പര ആരംഭിക്കുക. മൂന്ന് വീതം ടി20, ഏകദിന മത്സരങ്ങളാണ് പരമ്പരയിലുള്ളത്. ശ്രീലങ്കയും പുതിയ പരിശീലകനായ സനത് ജയസൂര്യയുടെ കീഴിലാണ് പരമ്പര കളിക്കാനെത്തുന്നത്. ടി20 മത്സരങ്ങള്‍ ജൂലൈ 26, 27,29 തീയതികളിലും ഏകദിന മത്സരങ്ങള്‍ ഓഗസ്റ്റ് 1, 4,7 തീയതികളിലും നടക്കും.

🔹ഇന്ത്യന്‍ സിനിമാലോകം ഏറെ ആകാംക്ഷയോടെ കാത്തിരിക്കുന്ന കമല്‍ ഹാസന്‍ ചിത്രമാണ് ‘ഇന്ത്യന്‍ 2’. ജൂലൈ 12ന് ബിഗ് സ്‌ക്രീനുകളില്‍ എത്താന്‍ പോവുകയാണ് 1996ല്‍ പുറത്തിറങ്ങിയ ഇന്ത്യന്‍ എന്ന ചിത്രത്തിന്റെ ഈ സീക്വല്‍. ഇന്ത്യന്‍ 2ലെ പ്രധാന താരങ്ങളുടെ പ്രതിഫലവിവരങ്ങളാണ് ഇപ്പോള്‍ പുറത്തുവരുന്നത്. അതേസമയം ഇന്ത്യന്‍ 2 വിന്റെ അവസാനം ഇന്ത്യന്‍ 3യുടെ ട്രെയിലര്‍ കാണിക്കുമെന്നാണ് ശങ്കര്‍ പറഞ്ഞിരിക്കുന്നത്. എല്ലാം നല്ല രീതിയില്‍ നടന്നാല്‍ ആറ് മാസത്തിനുള്ളില്‍ ചിത്രം റിലീസ് ചെയ്യുമെന്നും ശങ്കര്‍ പറയുന്നു. ഇന്ത്യന്‍ 2, ഇന്ത്യന്‍ 3 എന്നിവയ്ക്കായി കമല്‍ഹാസന്‍ മൊത്തം 150 കോടി രൂപ ഈടാക്കിയതായാണ് റിപ്പോര്‍ട്ട്. സംവിധായകന്‍ ശങ്കറിന് 50 കോടി രൂപയാണ് പ്രതിഫലം. നടന്‍ സിദ്ധാര്‍ത്ഥിന് നാല് കോടി രൂപയും നടി കാജല്‍ അഗര്‍വാളിന് മൂന്ന് കോടി രൂപയുമാണ് പ്രതിഫലം. രാകുല്‍ പ്രീത് സിംഗിന് രണ്ട് കോടി രൂപയും ഇന്ത്യന്‍ 2വില്‍ അതിഥി വേഷത്തില്‍ പ്രത്യക്ഷപ്പെടുകയും ഇന്ത്യന്‍ 3യില്‍ പ്രധാന പ്രതിനായകനായി മാറുകയും ചെയ്യുന്ന എസ്ജെ സൂര്യയ്ക്ക് 50 ലക്ഷം രൂപയുമാണ് പ്രതിഫലം. പ്രിയ ഭവാനി ശങ്കറിന് 30 ലക്ഷം രൂപയാണ് പ്രതിഫലം. ചിത്രത്തിന്റെ സംഗീതം നിര്‍വഹിക്കുന്ന അനിരുദ്ധ് രവിചന്ദര്‍ 10 കോടി രൂപയാണ് ഈടാക്കിയായതെന്നാണ് റിപ്പോര്‍ട്ട്. 20 വര്‍ഷത്തിനു ശേഷമാണ് കമലും ശങ്കറും ഒന്നിച്ചു സിനിമ ചെയ്യുന്നത്. ഇന്ത്യനിലെ സ്വാതന്ത്ര്യ സമരസേനാനി സേനാപതി നയിക്കുന്ന പുതിയ പോരാട്ടങ്ങളാണ് ഇന്ത്യന്‍ 2 വിന്റെ ഇതിവൃത്തം എന്നാണറിയുന്നത്.

തയ്യാറാക്കിയത്:
കപിൽ ശങ്കർ