🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 28 | ശനി ✍ പ്രൊഫസ്സർ എ.വി. ഇട്ടി മാവേലിക്കര

വിത്തിൽ നിന്നു വേണം തുടങ്ങുവാൻ
——————————————————–

വാദ്യസംഗീതം പഠിക്കുവാൻ, ഗുരുവിൻ്റടുത്തെത്തിയതായിരുന്നു ശിഷ്യൻ. സംഗീതോപകരണം കയ്യിൽക്കൊടുത്തിട്ട്, അതിൻ്റെ കമ്പികൾ പാകത്തിനു മുറുക്കാൻ ഗുരു ശിഷ്യനോടു പറഞ്ഞു. കമ്പികൾ ആവശ്യത്തിലധികം മുറുക്കാൻ തുടങ്ങിയപ്പോൾ ഗുരു അവനെ തടഞ്ഞു: “അത്രയും വലിഞ്ഞുമുറുകിയാൽ, അവ പൊട്ടിപ്പോകും” ശുരു പറഞ്ഞു. ശിഷ്യൻ കമ്പികൾ അയയ്ക്കാൻ തുടങ്ങി. കുറച്ചു കഴിഞ്ഞപ്പോൾ, ഗുരു പിന്നെയും അവനെ തടഞ്ഞു: “ഇത്രയും അയഞ്ഞാൽ, അവയിൽ നിന്നും സംഗീതം വരില്ല”, ഗുരു വീണ്ടും ഉപദേശിച്ചു.

ശിഷ്യൻ സ്വല്പം ദേഷ്യത്തോടെ പറഞ്ഞു: “ഞാൻ സംഗീതം പഠിക്കാൻ വന്നതാണ്, ഉപകരണം നന്നാക്കാൻ വന്നതല്ല”. ഗുരു ശാന്തനായി അവനോടു പറഞ്ഞു: “ആ കമ്പികൾക്ക്, സംഗീതം പുറപ്പെടുവിക്കാൻ കഴിയുന്ന കൃത്യമായ ഒരവസ്ഥയുണ്ട്. അതു കണ്ടു പിടിക്കാതെ നിനക്കൊരിക്കലും ഈ ഉപകരണത്തിൽ നിന്ന് സംഗീതം പുറപ്പെടുവിക്കാനാവില്ല”.

ശിക്ഷണമില്ലാതെ പരിശീലനം സാദ്ധ്യമല്ല. “ഒന്നുകിൽ ആശാൻ്റെ നെഞ്ചത്ത് , അല്ലെങ്കിൽ കളരിക്കു പുറത്ത് “, എന്നു പറയുന്നതുപോലെയാണ് പലരുടെയും സ്ഥിതി. ഒന്നുകിൽ അങ്ങേയറ്റം ആലസ്യം; അല്ലെങ്കിൽ, അത്യന്ത്യം ആവേശം.. എന്തിനേയും ആനുപാതികമായ അളവിൽ കാണാനും, കൈകാര്യം ചെയ്യാനും കഴിയുമ്പോൾ മാത്രമാണ് മികച്ച ഫലങ്ങൾ രൂപപ്പെടുന്നതും, നേട്ടങ്ങൾ കരഗതമാകുന്നതും.

വളർച്ച ആരംഭിക്കുന്നത് വിത്തുകളിൽ നിന്നാണ്; ശിഖരങ്ങളിൽ നിന്നല്ല. “വിത്തുഗുണം, പത്തുഗുണം” എന്നാണു ജ്ഞാനമൊഴി. അടിത്തറയിൽ എന്തു സംഭവിക്കുന്നു എന്നറിയുന്നവർക്കു മാത്രമേ, അനന്തതയിൽ വ്യാപരിക്കാൻ കഴിയൂ. അടിസ്ഥാനമില്ലാത്തവർക്ക് ആകാശത്തെത്താനാകയില്ല. ഒന്നും മുകളിൽ നിന്നു പൊട്ടി മുളയ്ക്കുന്നതല്ല, താഴെ ഭുമിയിൽ നിന്നും രൂപപ്പെടുന്നതാണ്. എന്തും, വിത്തിൽ നിന്നും വേണം, തുടങ്ങുവാൻ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര