തിരുവനന്തപുരം: 13 ഇനങ്ങൾ സബ്സിഡി നിരക്കിൽ നൽകിക്കൊണ്ട് കൺസ്യൂമർഫെഡിൻ്റെ വിഷു ചന്തകൾ ഇന്നുമുതൽ പ്രവർത്തനം ആരംഭിക്കും. സംസ്ഥാനത്തുടനീളമുള്ള 300 ഔട്ട് ലെറ്റുകളിലാണ് കുറഞ്ഞ നിരക്കിൽ ആവശ്യസാധനങ്ങൾ വിതരണം ചെയ്യാൻ ചന്തകൾ ആരംഭിക്കുന്നത്. ഇന്നുമുതൽ ഒരാഴ്ചത്തേക്കാണ് കൺസ്യൂമർഫെഡിൻ്റെ ചന്തകൾ പ്രവർത്തിക്കുക.
കോഴിക്കോടാണ് ചന്തയുടെ ഉദ്ഘാടനം നടക്കുക. ഈ മാസം 18വരെ ഉത്സവ ചന്തകള്‍ പ്രവര്‍ത്തിക്കും. താലൂക്ക് അടിസ്ഥാനമാക്കി മുന്നൂറോളം ചന്തകളാണ് ഇന്നുമുതൽ സംസ്ഥാനത്ത് ആരംഭിക്കുന്നത്. 13 ഇനം സാധനങ്ങള്‍ സബ്സിഡി നിരക്കില്‍ വാങ്ങാമെന്ന പ്രത്യേകതയുമുണ്ട്. സഹകരണ സ്ഥാപനങ്ങളുടെ സഹായത്തോടെയാണ് സംസ്ഥാനത്ത് കൺസ്യൂമർഫെഡിൻ്റെ വിഷു ചന്തകൾ പ്രവർത്തിക്കുക. തിരക്ക് കണക്കിലെടുത്ത് ആവശ്യ സാധനങ്ങൾ കഴിഞ്ഞ ദിവസം തന്നെ സാധനങ്ങൾ എത്തിച്ചിരുന്നു.
ലോക്സഭാ തെരഞ്ഞെടുപ്പ് പെരുമാറ്റ ചട്ടം നിലനിൽക്കെ റംസാൻ – വിഷു ചന്തകൾ ആരംഭിക്കാൻ കൺസ്യൂമർഫെഡിന് ഹൈക്കോടതി ഇന്നലെ അനുമതി നൽകിയിരുന്നു. തെരഞ്ഞെടുപ്പ് കമ്മീഷൻ്റെ ഉത്തരവ് ഹൈക്കോടതി പരിഷ്കരിച്ചു. ചന്തയുമായി ബന്ധപ്പെട്ട് ഒരുതരത്തിലുള്ള പ്രചാരണം നടത്താൻ പാടില്ല. തെരഞ്ഞെടുപ്പ് നേട്ടത്തിനായി ഉപയോഗിക്കരുതെന്നും കോടതി നിർദേശിച്ചിട്ടുണ്ട്.
തെരഞ്ഞെടുപ്പ് പെരുമാറ്റച്ചട്ടം ചൂണ്ടിക്കാട്ടി തെരഞ്ഞെടുപ്പ് കമ്മീഷൻ ചന്തകൾ തുടങ്ങാനുള്ള സർക്കാർ തീരുമാനം വിലക്കിയിരുന്നു. വിഷു ചന്തകൾ വോട്ടർമാരെ സ്വാധീനിക്കാൻ സാധ്യതയുണ്ടെന്നായിരുന്നു തെരഞ്ഞെടുപ്പ് കമ്മീഷൻ്റെ വിലയിരുത്തൽ. ഈ നടപടിയെ ചോദ്യം ചെയ്ത് കൺസ്യൂമർ ഫെഡ് സമർപ്പിച്ച ഹർജിയിലാണ് ചന്തകൾ തുറക്കാനുള്ള ഹൈക്കോടതി അനുമതി ലഭിച്ചത്. വിഷു ചന്തകൾ തുറക്കാൻ അനുവദിക്കണമെന്ന് പ്രതിപക്ഷവും ആവശ്യപ്പെട്ടിരുന്നു.
