📱വാർത്തകൾ ഒറ്റനോട്ടത്തിൽ📱 – 2025 | മെയ് 30 | വെള്ളി ✍ കപിൽ ശങ്കർ

സംസ്ഥാനത്ത് മഴ ശക്തം. കനത്ത മഴയ്ക്കിടെ സംസ്ഥാനത്തെമ്പാടും വ്യാപക നാശനഷ്ടം. രണ്ട് പേര്‍ മരിച്ചു. ഒരാളെ ഒഴുക്കില്‍പെട്ട് കാണാതായി. പലയിടത്തായി നിരവധി പേര്‍ക്ക് പരിക്കേറ്റു. മരങ്ങള്‍ കടപുഴകി വീണും ശിഖരങ്ങള്‍ പൊട്ടി വീണും കെട്ടിടങ്ങള്‍ക്കും വീടുകള്‍ക്കും വാഹനങ്ങള്‍ക്കും കേടുപാടുണ്ടായി. അതിതീവ്ര മഴ തുടരുന്ന സാഹചര്യത്തില്‍ കനത്ത ജാഗ്രതയിലാണ് സംസ്ഥാനം.

ഇടുക്കി കുമളിയില്‍ പാര്‍ക്ക് ചെയ്തിരുന്ന ലോറിക്കും ബസിനും മുകളിലേക്ക് മരം ഒടിഞ്ഞു വീണ് ലോറിക്കുള്ളിലുണ്ടായിരുന്ന കോട്ടയം സ്വദേശിയായ യുവാവ് മരിച്ചു. കാസര്‍കോട് മധുവാഹിനി പുഴയില്‍ തുണിയലക്കുന്നതിനിടെ വീട്ടമ്മ ഒഴുക്കില്‍പെട്ട് മരിച്ചു. മല്ലം ക്ഷേത്രത്തിനു സമീപത്തെ ഗോപിക (75) യാണ് മരിച്ചത്. ആലപ്പുഴ പുന്നപ്രയില്‍ മീന്‍പിടിക്കാന്‍പോയ ആള്‍ വെള്ളക്കെട്ടില്‍ വീണ് മരിച്ചു. എറണാകുളം തിരുമാറാടിയില്‍ മരം വീണ് സ്ത്രീ മരിച്ചു. വിഴിഞ്ഞത്ത് വള്ളം മറിഞ്ഞുണ്ടായ അപകടത്തില്‍ ഒരാള്‍ മരിച്ചു. മലപ്പുറം കാളികാവിലും എറണാകുളം ചെറായിയിലും ഒഴുക്കില്‍പ്പെട്ട് രണ്ട് പേരെ കാണാതായി.

കെട്ടിട നിര്‍മ്മാണ സ്ഥാപനത്തിലെ കളക്ഷന്‍ തുകയായ ഏഴു ലക്ഷം രൂപ തട്ടിയെടുത്ത് ഒളിവില്‍ പോയ കളക്ഷന്‍ ഏജന്റിനെ വലപ്പാട് പൊലീസ് അറസ്റ്റ് ചെയ്തു. പഴുവില്‍ കുറുമ്പിലാവ് സ്വദേശി കിരണ്‍ (34) ആണ് അറസ്റ്റിലായത്. ട്രാവന്‍കൂര്‍ ബില്‍ഡ് വെയര്‍ എന്ന സ്ഥാപനത്തിലെ കളക്ഷന്‍ ഏജന്റാണ് ഇയാള്‍.

ഇഷ്ടിക തലയില്‍ വീണ് പരിക്കേറ്റ് ചികിത്സയിലായിരുന്ന യുവതി മരിച്ചു. എറണാകുളം വടക്കേക്കര സ്വദേശിനി ആര്യാ ശ്യാംമോനാണ് (34)മരിച്ചത്. മുനമ്പത്ത് നിര്‍മാണം നടക്കുന്ന കെട്ടിടത്തിന് സമീപം നില്‍ക്കുമ്പോഴായിരുന്നു അപകടം. കാറ്റിലും മഴയിലും കെട്ടിടത്തിന്റെ മുകളില്‍ ഉണ്ടായിരുന്ന സിമന്റ് ഇഷ്ടിക തലയില്‍ വന്ന് വീഴുകയായിരുന്നു.

നിലമ്പൂര്‍ ഉപതെരഞ്ഞെടുപ്പില്‍ യുഡിഎഫിന്റെ ആര്യാടന്‍ ഷൗക്കത്തിനോട് ഏറ്റുമുട്ടാന്‍ എല്‍ഡിഎഫ് കളത്തിലിറക്കിയത് സിപിഎം സംസ്ഥാന സെക്രട്ടേറിയറ്റ് അംഗം എം.സ്വരാജിനെ. ബിജെപിക്ക് ഇനിയും സ്ഥാനാര്‍ത്ഥിയായില്ല. സിപിഎം സംസ്ഥാന സെക്രട്ടറി എംവി ഗോവിന്ദനാണ് സ്ഥാനാര്‍ത്ഥിയെ പ്രഖ്യാപിച്ചത്. രാഷ്ട്രീയ പോരാട്ടത്തിന് സ്വരാജ് മികച്ച സ്ഥാനാര്‍ഥിയാണെന്നും സ്വരാജ് നിലമ്പൂരില്‍ സമ്മതനാണെന്നും പാര്‍ട്ടിയാണ് സ്ഥാനാര്‍ത്ഥിയാരെന്ന് തീരുമാനിക്കുന്നതെന്നും എംവി ഗോവിന്ദന്‍ പറഞ്ഞു.

കേരളത്തിലെ എല്‍ഡിഎഫ് സര്‍ക്കാരിനോട് ജനങ്ങള്‍ക്ക് വലിയ മമതയും പ്രതിബദ്ധതയുമുണ്ടെന്നും ഇത് നിലമ്പൂരിലെ ഉപതെരഞ്ഞെടുപ്പിലും പ്രതിഫലിക്കുമെന്നും എല്‍ഡിഎഫ് സ്ഥാനാര്‍ത്ഥി എം സ്വരാജ്. എല്‍ഡിഎഫ് സര്‍ക്കാരിന്റെ പ്രവര്‍ത്തനങ്ങള്‍ക്കുള്ള അംഗീകാരമായി ഈ തെരഞ്ഞെടുപ്പിലെ വോട്ടുകള്‍ മാറുമെന്നും എം സ്വരാജ് വാര്‍ത്താസമ്മേളനത്തില്‍ പറഞ്ഞു. എല്‍ഡിഎഫ് സര്‍ക്കാരിന്റെ തുടര്‍ഭരണത്തിന് തുടക്കമിടുന്ന തെരഞ്ഞെടുപ്പായി നിലമ്പൂര്‍ മാറുമെന്നും എല്‍ഡിഎഫിന്റെ പോരാട്ടം വ്യക്തികള്‍ക്കെതിരല്ലെന്നും എല്ലാ ഇടതുപക്ഷ വിരുദ്ധ ശക്തികള്‍ക്കുമെതിരെയാണെന്നും അദ്ദേഹം പറഞ്ഞു. യുഡിഎഫില്‍ ഉള്ള നേതാക്കള്‍ വരെ താന്‍ മത്സരിക്കണമെന്ന് ആവശ്യപ്പെട്ടുവെന്നും അവരുടെ കൂടെ അഭ്യര്‍ത്ഥന മാനിച്ചാണ് മത്സരമെന്നും അവരുടെ കൂടെ പിന്തുണ പ്രതീക്ഷിക്കുന്നുവെന്നും എം സ്വരാജ് കൂട്ടിച്ചേര്‍ത്തു. നിലമ്പൂര്‍ ഉപതെരഞ്ഞെടുപ്പില്‍ സിപിഎം ധൈര്യമുണ്ടെങ്കില്‍ എം സ്വരാജിനെ മത്സരിപ്പിക്കണമെന്ന് രാഹുല്‍ മാങ്കൂട്ടത്തില് സാമൂഹ്യ മാധ്യമത്തില്‍ പോസ്റ്റിട്ടിരുന്നു.

പ്രചാരണ രംഗത്ത് യുഡിഎഫ് ഒരുപാട് മുന്നിലാണെന്നും എതിര്‍ സ്ഥാനാര്‍ഥി കൂടി വരുമ്പോഴാണ് തെരഞ്ഞെടുപ്പില്‍ ആവേശവും ചൂടും വരുന്നതെന്നും ആര്യാടന്‍ ഷൗക്കത്ത്. പ്രതിരോധ നിരയില്‍ ആളുണ്ടെങ്കിലേ ഫോര്‍വേഡിന് ഗോള്‍ അടിക്കാന്‍ ആവേശം വരുവെന്നും എല്‍ഡിഎഫ് സര്‍ക്കാരിന്റെ ദുര്‍ഭരണവും നിലമ്പൂരിനോടുള്ള അവഗണനയും വോട്ടാകുമെന്നും പുതുപ്പള്ളിയിലെ ഉമ്മന്‍ ചാണ്ടിയുടെ കല്ലറയില്‍ പുഷ്പാര്‍ച്ചന നടത്തിയ ശേഷം ഷൗക്കത്ത് പറഞ്ഞു.

നിയമം ലംഘിച്ച് റോഡില്‍ ഫ്ലക്സുകള്‍ വെക്കുന്നതിനെ വിമര്‍ശിച്ച് ഹൈക്കോടതി. ഉന്നത വ്യക്തികളുടെ ചിത്രങ്ങളുളള അനധികൃത ഫ്ളെക്സുകളാണ് കൂടുതലെന്നും ജസ്റ്റിസ് ദേവന്‍ രാമചന്ദ്രന്‍ ചൂണ്ടിക്കാട്ടി. തിരുവനന്തപുരത്ത് നിന്നും മാത്രം നാലായിരത്തോളം ഫ്ളെക്സ് ബോര്‍ഡുകള്‍ നീക്കം ചെയ്തു. ഫ്ലെക്സ് ബോര്‍ഡുകളല്ല പ്രശസ്തി കൂട്ടുന്നതെന്ന് രാഷ്ട്രീയ പാര്‍ട്ടി നേതാക്കളോട് ആരെങ്കിലും പറഞ്ഞു കൊടുക്കണമെന്നും ഫ്ളെക്സില്‍ തന്റെ മുഖം വേണ്ടായെന്ന് നേതാക്കള്‍ പറഞ്ഞാല്‍ തീരാവുന്ന പ്രശ്നമേയുളളു എന്നും കോടതി ചൂണ്ടിക്കാട്ടി .

പിവി അന്‍വര്‍ കറിവേപ്പിലയെന്ന് മുഖ്യമന്ത്രി പിണറായി വിജയന്‍. തിരുവനന്തപുരത്ത് നടത്തിയ വാര്‍ത്താ സമ്മേളനത്തിലാണ് മുഖ്യമന്ത്രിയുടെ പ്രതികരണം. എന്‍ഫോഴ്‌സ്മെന്റ് ഡയറക്ടറേറ്റിന്റെ വിശ്വാസ്യത തകര്‍ന്നെന്നും മുഖ്യമന്ത്രി ചോദ്യത്തിന് മറുപടിയായി പറഞ്ഞു. വന്യജീവി സംഘര്‍ഷവുമായി ബന്ധപ്പെട്ട ചോദ്യത്തോട് വിഷയത്തില്‍ ശാശ്വത പരിഹാരമാണ് തേടുന്നതെന്ന് മുഖ്യമന്ത്രി പറഞ്ഞു. സംസ്ഥാന സര്‍ക്കാര്‍ ഒന്നും ചെയ്യുന്നില്ലെന്നാണ് പ്രതിപക്ഷം പ്രചരിപ്പിക്കുന്നത്. അത് വസ്തുത പരിശോധിക്കാതെയുള്ള വിമര്‍ശനമാണെന്നും മുഖ്യമന്ത്രി കുറ്റപ്പെടുത്തി.

അങ്കണവാടി പ്രീസ്‌കൂള്‍ കുട്ടികളുടെ വികാസ മേഖലകളുടെ പുരോഗതി വിലയിരുത്തുന്നതിനായി വനിത ശിശു വികസന വകുപ്പ് തയ്യാറാക്കിയ ‘കുഞ്ഞൂസ് കാര്‍ഡ്’ ആരോഗ്യ വനിത ശിശുവികസന വകുപ്പ് മന്ത്രി വീണാ ജോര്‍ജ് പ്രകാശനം ചെയ്തു. കുട്ടികളുടെ വികാസ മേഖലകള്‍ ഉള്‍പ്പെടുത്തികൊണ്ട് ജെന്‍ഡര്‍ ന്യൂട്രല്‍ ആയ കാര്‍ഡ് ആണ് പുതിയതായി തയ്യാറാക്കിയിരിക്കുന്നത്.

സംസ്ഥാനം കൊവിഡ് ജാഗ്രതയിലെന്നും എന്നാല്‍ ആശങ്കപ്പെടേണ്ട സാഹചര്യം നിലവിലില്ലെന്നും മുഖ്യമന്ത്രി പിണറായി വിജയന്‍. 727 ആക്ടീവ് കേസുകള്‍ റിപ്പോര്‍ട്ട് ചെയ്തിട്ടുണ്ടെന്നും കോട്ടയം, തിരുവനന്തപുരം, പത്തനംതിട്ട, ആലപ്പുഴ, എറണാകുളം ജില്ലകളിലാണ് കൂടുതല്‍ കേസുകളെന്നും മുഖ്യമന്ത്രി പറഞ്ഞു. രോഗ ലക്ഷണമുള്ളവര്‍ മാസ്‌ക് ധരിക്കണമെന്നും അദ്ദേഹം ആവശ്യപ്പെട്ടു.

കൊല്ലം ശക്തികുളങ്ങരയില്‍ തീരത്തടിഞ്ഞ കണ്ടെയ്നറുകള്‍ നീക്കം ചെയ്യുന്നതിനിടെ തീപിടിത്തം. കണ്ടെയ്നര്‍ മുറിക്കുന്നതിനിടെ സ്പോഞ്ച് അടങ്ങിയ ഫോമില്‍ തീ പടരുകയായിരുന്നു. ഫയര്‍ഫോഴ്സ് സ്ഥലത്തെത്തി തീ നിയന്ത്രണ വിധേയമാക്കി.

കൊച്ചി തീരത്ത് കപ്പല്‍ മുങ്ങിയ സംഭവം സംസ്ഥാന ദുരന്തമായി പ്രഖ്യാപിച്ചു. പാരിസ്ഥിതിക ആഘാതം കണക്കിലെടുത്താണ് തീരുമാനം. എംഎസ്സി എല്‍സ 3 എന്ന കപ്പലാണ് അപകടത്തില്‍ പെട്ടത്. കണ്ടെയ്നറുകളിലെ രാസവസ്തുക്കളും ഇന്ധന ചോര്‍ച്ച സാധ്യതയും പാരിസ്ഥിതിക ഭീഷണി ഉയര്‍ത്തുന്ന സാഹചര്യത്തിലാണ് തീരുമാനം.

കൊച്ചി തീരത്തുണ്ടായ കപ്പല്‍ അപകടത്തിന്റെ പശ്ചാത്തലത്തില്‍ മത്സ്യത്തൊഴിലാളി കുടുംബങ്ങള്‍ക്ക് സഹായം പ്രഖ്യാപിച്ച മുഖ്യമന്ത്രി കപ്പലിന്റെ സ്ഥാനം കണ്ടെത്താന്‍ സോണാര്‍ സര്‍വെ നടത്തുമെന്ന് അറിയിച്ചു. കപ്പലില്‍ നിന്ന് ഇന്ധനം പുറത്തെടുക്കും വരെ മത്സ്യത്തൊഴിലാളികള്‍ ഈ ഭാഗത്ത് മത്സ്യബന്ധനം നടത്തരുതെന്ന് മുഖ്യമന്ത്രി അറിയിച്ചു. തിരുവനന്തപുരം, കൊല്ലം, ആലപ്പുഴ, എറണാകുളം ജില്ലകളിലെ മത്സ്യത്തൊഴിലാളി കുടുംബങ്ങള്‍ക്ക് താത്കാലിക ആശ്വാസമായി ആയിരം രൂപയും ആറ് കിലോ അരിയും സൗജന്യ റേഷനും നല്‍കുമെന്നും മുഖ്യമന്ത്രി അറിയിച്ചു.

പ്രായപൂർത്തിയാകാത്ത കുട്ടിയെ ഗൗരവതരമായ ലൈംഗിക പീഡനത്തിന് വിധേയമാക്കിയ കേസിലെ പ്രതിക്ക് 167 വർഷം കഠിനതടവും 5,50,000/- രൂപ പിഴയും. പിഴയടച്ചില്ലെങ്കിൽ 22 മാസം അധിക കഠിന തടവ് ശിക്ഷ അനുഭവിക്കണം. കാസർഗോഡ് ഫാസ്റ്റ് ട്രാക്ക് സ്‌പെഷൽ കോടതിയുടെതാണ് വിധി.
2021 ജൂൺ മാസവും അതിനു മുമ്പും, മധൂർ ഗ്രാമത്തിലെ ഉളിയത്തടുക്ക സ്വദേശിനിയും മാനസിക ക്ഷമത കുറവുള്ള 14 വയസുകാരിയെയാണ് പ്രതിയും ചെങ്കള – പാണലം സ്വദേശിയുമായ ഉസ്മാൻ പീഡനത്തിനിരയാക്കിയത്. രക്ഷിതാക്കളുടെ സമ്മതമില്ലാതെ, ഭക്ഷണം വാങ്ങിച്ചു തരാം എന്ന് വിശ്വസിപ്പിച്ചാണ് കുട്ടിയെ പ്രതി ഓടിക്കുന്ന ഓട്ടോറിക്ഷയിൽ കയറ്റിയത്. ചെങ്കള ഗ്രാമത്തിൽ ചെർക്കള- ബേവിഞ്ച എന്ന സ്ഥലത്ത് ആൾപെരുമാറ്റം ഇല്ലാത്ത വനത്തിൽ വച്ചാണ് കുട്ടിയെ ക്രൂര പീഡനത്തിന് ഇരയാക്കിയത്. കാസർഗോഡ് വനിതാ പൊലീസ് സ്റ്റേഷനിലായിരുന്നു കേസ് രജിസ്റ്റർ ചെയ്തത്. പ്രോസിക്യൂഷന് വേണ്ടി സ്‌പെഷൽ പബ്ലിക് പ്രൊസിക്യൂട്ടർ പ്രിയ എകെ ഹാജരായി

2025-26 അധ്യയന വര്‍ഷത്തെ പ്ലസ് വണ്‍ ക്ലാസ്സുകള്‍ ജൂണ്‍ 18 ന് ആരംഭിക്കുമെന്ന് പൊതുവിദ്യാഭ്യാസ മന്ത്രി വി ശിവന്‍കുട്ടി പറഞ്ഞു. പ്ലസ് വണ്‍ പ്രവേശനത്തിനായി ഓണ്‍ലൈനായി ആകെ ലഭിച്ച 4,62,768 അപേക്ഷകളിലെ ഓപ്ഷനുകള്‍ പരിഗണിച്ചുള്ള ട്രയല്‍ അലോട്ട്മെന്റ് പ്രസിദ്ധീകരിച്ചിരുന്നു. തിരുത്തലുകള്‍ക്കും ആവശ്യമെങ്കില്‍ ഓപ്ഷനുകള്‍ പുനഃക്രമീകരിക്കുന്നതിനുമുള്ള അവസരവും അപേക്ഷകര്‍ക്ക് നല്‍കിയിട്ടുണ്ട്.

കരളും വൃക്കയും പകുത്ത് നൽകിയ അമ്മയ്‌ക്ക്‌ സ്നേഹ സമ്മാനമായി മകൻ നൽകിയത് പത്താം ക്ലാസ് പരീക്ഷയിൽ ഉന്നത വിജയം. പ്രൈമറി ഹൈപ്പറോക്‌സലൂറിയ എന്ന അപുർവ്വ രോഗത്തോട് പോരാടിയാണ് തമിഴ്നാട് സ്വദേശി റൂബിൻ വിജയം നേടിയത്. ഈ സന്തോഷം അറിയിക്കാനായി തന്നെ ജീവിതത്തിലേക്ക് തിരികെ കൊണ്ടുവന്ന ലിസി ആശുപത്രിയിലേക്കാണ് അവൻ ആദ്യം എത്തിയത്. എസ് എസ് എൽ സി പരിക്ഷയിൽ ഉന്നതവിജയം. സ്കൂളിലെ ടോപ്പർ.തമിഴ്നാട്ടുകരനായ റുബിൻ്റെ ഈ വിജയത്തിന് തിളക്കം ഏറെയാണ്. തന്നെ വേട്ടയാടിയ രോഗത്തോട് നിരന്തരം പോരാടി വിജയിച്ചാണ് ഈ മിടുക്കൻ പരീക്ഷകയിൽ 93% മാർക്ക് വാങ്ങി സ്കൂളിൻ്റെ അഭിമാനമായത്. കരളും വൃക്കയും പകുത്ത് നൽകിയ അമ്മയ്ക്കുള്ള സമ്മാനമായിരുന്നു മകന്റെ വിജയം.
വൃക്കയുടെ പ്രവർത്തനം പൂർണമായും നിലച്ച റൂബിന്റെ ജീവൻ നിലനിർത്താനുള്ള സാധ്യത തേടിയാണ് മാതാപിതാക്കൾ എറണാക്കുളം ലിസി ആശുപത്രിയിൽ എത്തിയത്.അമ്മ വിജില റൂബിന് കരളും വൃക്കയും ദാനം ചെയ്യാൻ തയ്യാറായി. അങ്ങനെ കരൾ മാറ്റ ശസ്ത്രക്രിയയയും കിഡ്‌നി ട്രാൻസ്പ്ലാന്റും വിജയകരമായി പൂർത്തിയാക്കി. വർഷങ്ങൾക്കിപ്പുറം അവൻ വീണ്ടും ലിസി ആശുപത്രിയിൽ എത്തി. പരീക്ഷയിലെ ഉന്നതവിജയത്തിൻ്റെ സന്തോഷവുമായി.

ഈ വര്‍ഷത്തെ സംസ്ഥാന സ്‌കൂള്‍ പ്രവേശനോത്സവം ജൂണ്‍ രണ്ടിന് ആലപ്പുഴ കലവൂര്‍ ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ രാവിലെ 9.30 ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. പൊതുവിദ്യാഭ്യാസ- തൊഴില്ഡ വകുപ്പ് മന്ത്രി വി ശിവന്‍കുട്ടി അധ്യക്ഷനായിരിക്കും. രാവിലെ 8.30 മുതല്‍ വിദ്യാര്‍ഥികളുടെ കലാപരിപാടികള്‍ ആരംഭിക്കുമെന്ന് സെക്രട്ടറിയേറ്റ് പിആര്‍ ചേംബറില്‍ നടന്ന വാര്‍ത്താസമ്മേളനത്തില്‍ പൊതു വിദ്യാഭ്യാസ വകുപ്പ് മന്ത്രി വി ശിവന്‍കുട്ടി അറിയിച്ചു.

മാനേജറെ മര്‍ദിച്ചെന്ന പരാതിയില്‍ പൊലീസ് അന്വേഷണം നടക്കവേ, ഡിജിപിക്ക് പരാതി നല്‍കി നടന്‍ ഉണ്ണി മുകുന്ദന്‍. സംഭവത്തിലെ ഗൂഢാലോചന അന്വേഷിക്കണമെന്നാണ് പരാതിയിലെ ആവശ്യം. നീതിതേടി ഡിജിപിക്കും എഡിജിപിക്കും പരാതി നല്‍കിയതായും സത്യം പുറത്തുവരുമെന്നും ഉണ്ണി മുകുന്ദന്‍ വ്യക്തമാക്കി.

സിപിഎം പുറത്താക്കിയ മുന്‍ ബ്രാഞ്ച് സെക്രട്ടറിക്കെതിരെ പൊലീസ് കാപ്പ ചുമത്തി. പത്തനംതിട്ട മലയാലപ്പുഴ സ്വദേശി അര്‍ജുന്‍ ദാസ് (41) നെതിരെയാണ് കാപ്പ ചുമത്തിയത്. നിരവധി കേസുകളില്‍ പ്രതിയായ അര്‍ജുന്‍ ദാസിനെ ആറുമാസം മുന്‍പാണ് സിപിഎം പുറത്താക്കിയത്.

മലയോര ഹൈവേയില്‍ വിള്ളല്‍. വയനാട് മാനന്തവാടി ദ്വാരകയില്‍ നിര്‍മ്മാണത്തിലിരിക്കുന്ന മലയോര ഹൈവേ റോഡിലാണ് വിള്ളല്‍ വീണത്. കഴിഞ്ഞയാഴ്ചയായിരുന്നു ഊരാളുങ്കല്‍ ലേബര്‍ സൊസൈറ്റി നിര്‍മ്മിക്കുന്ന റോഡിന്റെ ടാറിങ്ങ് നടന്നത്. 40 മീറ്ററോളം ദൂരത്തിലാണ് വിള്ളല്‍ ഉണ്ടായത്. റോഡിന്റെ സൈഡ് പ്രൊട്ടക്ഷന്‍ വാള്‍ കെട്ടിയ സ്ഥലത്താണ് വിള്ളല്‍ വീണത്.

എറണാകുളം പനമ്പിള്ളി നഗറില്‍ 54 കുടുംബങ്ങള്‍ താമസിക്കുന്ന ആര്‍ഡിഎസ് അവന്യു വണ്‍ എന്ന ഫ്ലാറ്റിന്റെ പില്ലര്‍ തകര്‍ന്ന സംഭവത്തില്‍, കെട്ടിടത്തില്‍ നിന്ന് കുടുംബങ്ങളെ ഒഴിപ്പിച്ച ശേഷം ബലപരിശോധന നടത്താന്‍ വിദഗ്ദ്ധ സമിതി തീരുമാനം. തകര്‍ന്ന പില്ലറുള്ള ടവറില്‍ താമസിക്കുന്ന 24 കുടുംബങ്ങളെ നേരത്തെ ഒഴിപ്പിച്ചിരുന്നു. ജില്ലാ കളക്ടറുടെ നേതൃത്വത്തിലുള്ള വിദഗ്ധ സമിതി നടത്തിയ പരിശോധനയില്‍, ബലപരിശോധനയും അതിന് ശേഷമുള്ള ബലപ്പെടുത്തലിന്റെയും മുഴുവന്‍ ചെലവും ബില്‍ഡര്‍മാരായ ആര്‍ഡിഎസ് കമ്പനി വഹിക്കണമെന്ന് നിര്‍ദ്ദേശിച്ചിട്ടുണ്ട്.

ജൂലൈ 1 മുതല്‍ പൊതുസ്ഥലങ്ങളിലെ പുകവലി നിരോധനം പ്രാബല്യത്തില്‍ വരുമെന്ന് ഫ്രാന്‍സ് ആരോഗ്യമന്ത്രി കാതറിന്‍ വൗട്രിന്‍. പുകവലിക്കാനുള്ള സ്വാതന്ത്ര്യം കുട്ടികളുടെ ശുദ്ധവായു ശ്വസിക്കാനുള്ള അവകാശം ലംഘിക്കുന്നിടത്ത് നിര്‍ത്തുന്നുവെന്ന് മന്ത്രി പറഞ്ഞു. സ്‌കൂളുകളുടെ മുന്നില്‍ വിദ്യാര്‍ത്ഥികള്‍ പുകവലിക്കുന്നത് തടയാനായി ബീച്ചുകള്‍, പാര്‍ക്കുകള്‍, ബസ് സ്റ്റോപ്പുകള്‍ എന്നിവയുള്‍പ്പെടെ കുട്ടികള്‍ക്ക് പ്രവേശിക്കാന്‍ കഴിയുന്ന എല്ലാ പൊതു സ്ഥലങ്ങളിലും പുകവലി നിരോധിക്കുമെന്നാണ് ഫ്രാന്‍സ് ആരോഗ്യമന്ത്രിയുടെ പ്രഖ്യാപനം. ജോലിസ്ഥലങ്ങള്‍, വിമാനത്താവളങ്ങള്‍, ട്രെയിന്‍ സ്റ്റേഷനുകള്‍, കളിസ്ഥലങ്ങള്‍ തുടങ്ങിയ പൊതു ഇടങ്ങളില്‍ പുകവലിക്കുന്നത് ഫ്രാന്‍സ് ഇതിനു മുന്‍പേ നിരോധിച്ചിരുന്നു.

റോയല്‍ ചലഞ്ചേഴ്സ് ബെംഗളൂരു ഐപിഎല്ലിന്റെ ഫൈനലില്‍ കടന്നു. ഇന്നലെ നടന്ന ക്വാളിഫയര്‍ -1ല്‍ പഞ്ചാബ് കിംഗ്സിനെ 8 വിക്കറ്റിന് തകര്‍ത്താണ് റോയല്‍ ചലഞ്ചേഴ്സ് ഫൈനലിലെത്തിയത്. ടോസ് നഷ്ടപ്പെട്ട് ബാറ്റിംഗിനിറങ്ങിയ പഞ്ചാബ് 14.1 ഓവറില്‍ 101 റണ്‍സെടുക്കുന്നതിനിടെ എല്ലാവരും പുറത്തായി. മൂന്ന് വിക്കറ്റുകള്‍ വീതം വീഴ്ത്തിയ സുയാഷ് ശര്‍മ്മയും ജോഷ് ഹേസല്‍വുഡും ചേര്‍ന്നാണ് പഞ്ചാബ് കിംഗ്സിനെ തകര്‍ത്ത് കളഞ്ഞത്. മറുപടി ബാറ്റിംഗിനിറങ്ങിയ ബെംഗളൂരു പത്ത് ഓവറുകള്‍ക്കുള്ളില്‍ 2 വിക്കറ്റ് മാത്രം നഷ്ടപ്പെടുത്തി വിജയത്തിലെത്തി. നാളെ നടക്കുന്ന മുംബൈ- ഗുജറാത്ത് മത്സരത്തിലെ വിജയികളുമായി ഞായറാഴ്ച നടക്കുന്ന രണ്ടാമത്തെ ക്വാളിഫയറില്‍ പഞ്ചാബ് ഏറ്റുമുട്ടും.

ഏറെ നാളുകള്‍ക്ക് ശേഷം സുരേഷ് ഗോപി വക്കീല്‍ വേഷത്തില്‍ എത്തുന്ന ‘ജെഎസ്‌കെ’യുടെ മോഷന്‍ പോസ്റ്റര്‍ പുറത്ത്. ഓരോരുത്തരും ചര്‍ച്ച ചെയ്യേണ്ട ചോദ്യശരങ്ങളുയര്‍ത്തിക്കൊണ്ട് എത്തിയിരിക്കുന്ന മോഷന്‍ പോസ്റ്റര്‍ നിമിഷ നേരം കൊണ്ട് സോഷ്യല്‍ മീഡിയയുടെ ശ്രദ്ധ കവര്‍ന്നിരിക്കുകയാണ്. ‘ജാനകി v\s സ്റ്റേറ്റ് ഓഫ് കേരള’ എന്നാണ് സിനിമയുടെ മുഴുവന്‍ പേര്. പ്രവീണ്‍ നാരായണന്‍ സംവിധാനം ചെയ്യുന്ന സിനിമയുടേതായി നേരത്തെ റിലീസ് ചെയ്ത പോസ്റ്ററുകള്‍ ഏറെ ശ്രദ്ധനേടിയിരുന്നു. ജൂണ്‍ 20നാണ് ചിത്രം റിലീസിനായി ഒരുങ്ങുന്നത്. സത്യത്തിനായുള്ള പോരാട്ടത്തില്‍, ഓരോ വാക്കും ഒരു ആയുധമായി മാറുന്നു- എന്ന ക്യാപ്ഷനോടെയാണ് മോഷന്‍ പോസ്റ്റര്‍ പുറത്തുവിട്ടിരിക്കുന്നത്. അനുപമ പരമേശ്വരന്‍, ശ്രുതി രാമചന്ദ്രന്‍, ദിവ്യ പിള്ള എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. അസ്‌കര്‍ അലി, മാധവ് സുരേഷ് ഗോപി, ബൈജു സന്തോഷ്, ജയന്‍ ചേര്‍ത്തല, ജോയ് മാത്യു, അഭിലാഷ് രവീന്ദ്രന്‍, രജിത് മേനോന്‍, നിസ്താര്‍ സേട്ട്, വൈഷ്ണവി രാജ്, മേധ പല്ലവി, കോട്ടയം രമേശ്, ദിലീപ്, ബാലാജി ശര്‍മ്മ തുടങ്ങി വലിയൊരു താരനിര തന്നെ ചിത്രത്തില്‍ ഒരുമിക്കുന്നുണ്ട്.

സിദ്ധാര്‍ഥ് മല്‍ഹോത്ര, ജാന്‍വി കപൂര്‍ എന്നിവരെ പ്രധാന കഥാപാത്രങ്ങളാക്കി തുഷാര്‍ ജലോത്ര സംവിധാനം ചെയ്യുന്ന റൊമാന്റിക് കോമഡി എന്റര്‍ടെയ്നര്‍ ‘പരം സുന്ദരി’ ടീസര്‍ എത്തി. മാഡോക് ഫിലിംസിന്റെ ബാനറില്‍ ദിനേശ് വിജന്‍ ആണ് നിര്‍മാണം. കേരളമാണ് സിനിമയുടെ പ്രധാന ലൊക്കേഷന്‍. ആലപ്പുഴ, ഫോര്‍ട്ട് കൊച്ചി എന്നിവിടങ്ങളിലായി കേരളത്തില്‍ 45 ദിവസം ചിത്രീകരണമുണ്ടായിരുന്നു. സിദ്ധാര്‍ഥ് മല്‍ഹോത്ര പരം എന്ന ഡല്‍ഹിക്കാരനായും ജാന്‍വി മലയാളിയായ സുന്ദരി എന്ന കഥാപാത്രമായെത്തുന്നു. സച്ചിന്‍ ജിഗര്‍ സംഗീതം. സന്താനകൃഷ്ണന്‍ ഛായാഗ്രഹണം. ചിത്രം ജൂലൈ 25ന് തിയറ്ററുകളിലെത്തും.

ഗുരുജിയുടെ വാക്കുകൾ (25)

നിരാശ യിൽ നിന്നും നമ്മെ കൈ പിടിച്ചു ഉയർത്തിയവരെ ഹൃദയത്തിൽ ചേർത്ത് വെക്കണം ജീവിതത്തിന്റെ തനിമ കണ്ടെത്താൻ സഹായിച്ചവരാണ് .. അവരുടെ വാക്ക് ഹൃദയത്തിന് വസന്തമാണ്. അത്തരം ആളുകൾ അത്യപുർവ്വമാണ് കടന്നു വരുന്നത്. നമുക്ക് നമ്മുടെ ജീവിതത്തിൽ പലതും അറിയാതെ പോകുന്നത് നമ്മളെ നല്ല ഒരു സുഹൃത്തിന് പെട്ടെന്ന് മനസിലാക്കാൻ സാധിക്കും. ആ സുഹൃത്ത് നമ്മളെ ആപത്തിൽ നിന്നും കര കയറ്റുകയും ചെയ്യും.. എപ്പോഴും നല്ല ഒരു സൗഹൃദം ജീവിതം കുളിർമയാക്കാൻ സഹായിക്കും. പല ആപത്തിൽ നിന്നും നമ്മെ പിൻ തിരിപ്പിക്കും.
എല്ലാവർക്കും നല്ല സൗഹൃദം എന്നും കൂടെ ഉണ്ടാവട്ടേ.

വാർത്തകൾ ഒറ്റനോട്ടത്തിൽ – 2025 | മെയ് 30 | വെള്ളി കപിൽ ശങ്കർ

ഗുരുജിയുടെ വാക്കുകൾ (25)

തയ്യാറാക്കിയത്:
കപിൽ ശങ്കർ

കാനഡയിൽ വീണ്ടും ഇന്ത്യൻ വിദ്യാർത്ഥിനിയെ ദുരൂഹ സാഹചര്യത്തിൽ മരിച്ചനിലയിൽ കണ്ടെത്തി

വാർത്തകൾ ഒറ്റനോട്ടത്തിൽ – 2025 | ജൂൺ 20 | വെള്ളി കപിൽ ശങ്കർ

പേർഷ്യയുടെ സിംഹാസനത്തിന്റെ കിരീടാവകാശി റെസ പഹ്‌ലവി ഇറാന്റെ ഭരണമേറ്റെടുക്കുമോ?

LEAVE A REPLY Cancel reply

Most Popular

എയര്‍ ഇന്ത്യാ വിമാനാപകടം; തിരിച്ചറിഞ്ഞത് 210 മൃതദേഹങ്ങള്‍, 187 മൃതദേഹങ്ങള്‍ ബന്ധുക്കള്‍ക്ക് വിട്ടുകൊടുത്തു.

അധ്യാപികയുടെ വാഹനമിടിച്ച് വിദ്യാർത്ഥിക്ക് പരിക്കേറ്റ സംഭവം; ലൈസൻസ് സസ്പെൻഡ് ചെയ്തു.

കണ്ണൂരിലെ യുവതിയുടെ ആത്മഹത്യ; സദാചാര പൊലീസിങ് നടന്നിട്ടില്ല, മരണത്തിനുപിന്നിൽ ആൺസുഹൃത്തെന്ന് കുടുംബം.

ചേമ്പിലയിൽ പൊതിഞ്ഞ് നവജാതശിശുവിനെ വലിച്ചെറിഞ്ഞു; അവിവാഹിതയായ അമ്മയ്ക്കെതിരെ കൊലക്കുറ്റം ചുമത്തും.

Recent Comments

EDITOR PICKS

എയര്‍ ഇന്ത്യാ വിമാനാപകടം; തിരിച്ചറിഞ്ഞത് 210 മൃതദേഹങ്ങള്‍, 187 മൃതദേഹങ്ങള്‍ ബന്ധുക്കള്‍ക്ക് വിട്ടുകൊടുത്തു.

അധ്യാപികയുടെ വാഹനമിടിച്ച് വിദ്യാർത്ഥിക്ക് പരിക്കേറ്റ സംഭവം; ലൈസൻസ് സസ്പെൻഡ് ചെയ്തു.

കണ്ണൂരിലെ യുവതിയുടെ ആത്മഹത്യ; സദാചാര പൊലീസിങ് നടന്നിട്ടില്ല, മരണത്തിനുപിന്നിൽ ആൺസുഹൃത്തെന്ന് കുടുംബം.

POPULAR POSTS

എയര്‍ ഇന്ത്യാ വിമാനാപകടം; തിരിച്ചറിഞ്ഞത് 210 മൃതദേഹങ്ങള്‍, 187 മൃതദേഹങ്ങള്‍ ബന്ധുക്കള്‍ക്ക് വിട്ടുകൊടുത്തു.

കാനഡയിൽ വീണ്ടും ഇന്ത്യൻ വിദ്യാർത്ഥിനിയെ ദുരൂഹ സാഹചര്യത്തിൽ മരിച്ചനിലയിൽ കണ്ടെത്തി

കുട്ടികളുടെ അശ്ലീല ദൃശ്യങ്ങൾ പ്രചരിപ്പിച്ചു; ഐഐടി ബിരുദധാരി ഉൾപ്പെടെ 15 പേര്‍ അറസ്റ്റിൽ.

POPULAR CATEGORY

ABOUT US

FOLLOW US

വാർത്തകൾ ഒറ്റനോട്ടത്തിൽ – 2025 | മെയ് 30 | വെള്ളി കപിൽ ശങ്കർ

ഗുരുജിയുടെ വാക്കുകൾ (25)

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

തയ്യാറാക്കിയത്:
കപിൽ ശങ്കർ