🌹 “ഇന്നത്തെ ചിന്താവിഷയം” 🌹 – 2024 | ജൂൺ 27 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

മുറിവേറ്റാലും മുറിവേൽപ്പിക്കാതിരിക്കാൻ ആകട്ടെ?
……………………………………….

ഒരാൾക്ക് വഴിയിൽ കിടന്ന് ഒരു മുത്തു കിട്ടി. വളരെ വില പിടിപ്പുള്ളതും മനോഹരവുമായിരുന്നെങ്കിലും, ഒരു ചെറിയ പാട് അതിലുണ്ടായിരുന്നു. ആ പാടു മാറ്റിക്കഴിഞ്ഞാൽ അത് ഏറ്റവും മനോഹരമായ മുത്തായി മാറുമെന്നു കരുതി, അയാൾ അതു ചുരണ്ടി നോക്കിയെങ്കിലും അതു പോയില്ല. മുത്തിൻ്റെ പല പാളികളും കടന്ന് പാടുനീക്കൽ പ്രക്രീയ തുടർന്നെങ്കിലും അതങ്ങനെ തന്നെ അവശേഷിച്ചു. അവസാന ശ്രമത്തിൽ പാടില്ലാതായി. പക്ഷെ, അപ്പോഴേക്കും മുത്തും ഇല്ലാതായിരുന്നു.

എങ്ങനെ ഇങ്ങനെയായി എന്ന ചോദ്യത്തിന് എല്ലാവർക്കും ചില കഥകൾ പറയാനുണ്ടാകും. മുത്തുകൾക്കും പറയാനുണ്ടാകും ഏറെക്കഥകൾ: വെയിലു കൊണ്ടതിൻ്റെയും, മഴ നനഞ്ഞതിൻ്റെയും, മറ്റുള്ളവർ ചവിട്ടിയരച്ചതിൻ്റെയും എല്ലാം കഥകൾ! അവിടെയെല്ലാം സ്വയം പുനർനിർമ്മാണം നടത്തി, പിടിച്ചു നിന്നവയ്ക്ക് എവിടെയെങ്കിലും ഒരു ചെറിയ പാട് അവശേഷിക്കുക സ്വാഭാവികം. അതിനെ ബഹുമാനിക്കാൻ ശീലിക്കണം. ഉൾ ബലത്തിൻ്റെ പ്രകാശനമാണത്. അതില്ലാതാകുമ്പോൾ, ആളും ഇല്ലാതാകും.

മുറിവുകൾ ഇല്ലാത്തവരെ എന്തിനു കൊള്ളാം. യാതൊരനുഭവങ്ങളിലൂടെയും കടന്നു പോകാത്തവർക്ക്, സൗകര്യങ്ങളുടെ സുഖശീതളിമയിൽ മാത്രം ജീവിച്ചവർക്ക്, എങ്ങനെയാണ് പ്രതിസന്ധികളെ തരണം ചെയ്യാനാകുക? ഒരു മുറിവും ഏൽക്കേണ്ടി വന്നിട്ടില്ല എന്നതിലല്ല, ജീവിതത്തിൻ്റെ വൈശിഷ്ട്യം. ഒരോ അപകട മേഖലയിൽ നിന്നും ചെറിയ ക്ഷതങ്ങളും നഷ്ടങ്ങളുമായിട്ടാണെങ്കിലും, മുമ്പോട്ടു പോകാൻ കഴിഞ്ഞു എന്നതിലാണു വൈശിഷ്ട്യം.

കുറവുകൾ ഇല്ലാത്തവർക്കുവേണ്ടിയുള്ള അന്വേഷണം പാഴ് വേലയാകും. ഒരിക്കലും ആർക്കും സ്വയം പൂർണ്ണതയിൽ എത്താനാകില്ല. കൂടെയുണ്ടായിരുന്ന ആർക്കും, ഒരു മുറിവും ഏല്പിച്ചിട്ടില്ല എന്നവകാശപ്പെടാനും ആർക്കുമാവില്ല. അപരനിൽ മായാതെ കിടക്കുന്ന മുറിവുകളുടെ ഉത്തരവാദിയാകാതെ ഇരിക്കാകുക എന്നതാകും ഏറെ വിശിഷ്ടം. മുറിവേറ്റാലും മുറിവേൽപ്പിക്കാതെ ഇരിക്കാനാവട്ടെ നമുക്ക്

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര