🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 01 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അവഗണനയിൽ നിന്നും മുളച്ചു വരുന്ന പുതുനാമ്പ്
—————————————————————————–

അമ്മ, ഉച്ചനേരത്തേക്കുള്ള ആഹാരം പാകം ചെയ്യുകയായിരുന്നു. കറിവയ്ക്കാനായി വാങ്ങിയ ബീൻസിൽ കുറച്ചു കേടായി പോയിരുന്നു. അതിൽ നല്ലതുമാത്രം എടുത്ത് അവർ പാകം ചെയ്യുകയും, കേടു വന്നതെല്ലാം ദൂരെ എറിയുകയും ചെയ്തു. വലിച്ചെറിഞ്ഞ ബീൻസിനുളളിലെ നല്ല പയർ മണികൾ വിത്തുകളായി രൂപാന്തരപ്പെട്ടു. മഴ പെയ്തപ്പോൾ മണ്ണിൽ കിടന്നു മുളച്ചുപൊന്തിയ അവ, നാളുകൾക്കു ശേഷം വളർന്ന് , ധാരാളം ബീൻസ് ഉല്പാദിപ്പിച്ചു. ആ അമ്മ അവയെല്ലാം വിളവെടുക്കാനും ഉപയോഗിക്കാനും ഇടയായി തീർന്നു.

എഴുതിത്തള്ളപ്പെട്ട പലരും, പിന്നീട് ഇതിഹാസം രചിച്ച കഥകൾ ഏറെയാണ്. അവഗണിക്കപ്പെട്ടു എന്ന ഒറ്റക്കാരണത്താൽത്തന്നെ, അദ്ധ്യാനിച്ചു മുന്നേറിയവർ ഏറെ. ഉപേക്ഷിക്കപ്പെടുന്നവർക്കു മുമ്പിൽ രണ്ടു വഴികൾ മാത്രം. ഒന്നുകിൽ കീഴടങ്ങുക, അല്ലെങ്കിൽ കീഴടക്കുക. പുറം കാലുകൊണ്ടു തൊഴിച്ചു മാറ്റപ്പെടുമ്പോൾ, ഒരു പക്ഷെ, പ്രതികരിക്കുവാൻ ശേഷിയുണ്ടാകണമെന്നില്ല. പക്ഷെ, ക്ഷമയോടെ കാത്തിരുന്നാൽ, സ്വയം വെയിലേറ്റും, മഴ നനഞ്ഞും, വെള്ളവും വളവും വലിച്ചെടുത്തും, വളർന്ന് വിശ്വരൂപം വെളിവാക്കാനാകും.

കാലം കൊടുക്കുന്ന മറുപടിയേക്കാൾ വലുതാകില്ല, ഒരു പകരം വീട്ടലും. വൈകാരികതയിൽ നിന്നുയരുന്ന വൈരാഗ്യമല്ല, വിചിന്തനത്തിൽ നിന്നുയരുന്ന വിവേകമാകണം ഓരോ പുറന്തള്ളലിലും പിടിച്ചു നിൽക്കാനുള്ള ബലം നൽകേണ്ടത്.

പക വീട്ടേണ്ടതു പകരം ചോദിച്ചല്ല; സ്വയം ഉയർത്തെഴുന്നേറ്റു കൊണ്ടാകണം. തിരസ്ക്കരണങ്ങൾക്കു മുമ്പിൽ, കരഞ്ഞു കലങ്ങിയ കണ്ണുകൾക്കല്ല പ്രസക്തി; അവഹേളനങ്ങൾക്കു മുമ്പിൽ വളഞ്ഞ നട്ടെല്ലിനുമല്ല. മറിച്ച്, രൂപാന്തരപ്പെടാനുള്ള മനസ്സാന്നിദ്ധ്യവും, ഊർജ്ജ സംഭരണ ശേഷിയുമാണുണ്ടാകേണ്ടത്.

ഉള്ളിൽ സ്വപനങ്ങളും ആർജ്ജവവുമുണ്ടെങ്കിൽ, വലിച്ചെറിയപ്പെടുന്നവ പോലും വിത്തുകളായി മാറും, അവ മുളച്ചുപൊങ്ങും, ഫലങ്ങൾ പുറപ്പെടുവിക്കും. അന്ന് , വലിച്ചെറിഞ്ഞവരാകും, വിളവെടുക്കാൻ ആദ്യമെത്തുക.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര