🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 26 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

കത്തിയമരുന്ന മനുഷ്യത്വം
——————————————–

ലക്ഷങ്ങൾ മുടക്കി പണി കഴിപ്പിച്ച പുതിയ വീടിനു തീ പിടിച്ചതു കണ്ട് ഹൃദയം തകർന്നു നിൽക്കുകയായിരുന്നു ഉടമസ്ഥൻ. പെട്ടന്ന്‌, അദ്ദേഹത്തിൻ്റെ മൂത്ത മകൻ ഓടിവന്നു പറഞ്ഞു: “പേടികേണ്ട, വീട് ഇന്നലെ ഞാൻ മൂന്നിരിട്ടി വിലക്ക് വിറ്റിരുരുന്നു”. “ദൈവമേ രക്ഷപെട്ടു” എന്നു പറഞ്ഞു്, അദ്ദേഹം ഒരു ദീർഘ നിശ്വാസം വിട്ടു. അപ്പോഴാണ് രണ്ടാമത്തെ മകൻ്റെ വരവ്.
” അച്ഛനെന്താണ് വീടു കത്തുന്നതു കണ്ടിട്ടും അനങ്ങാതിരിക്കുന്നത് ?” അയാൾ ചോദിച്ചു. “നമ്മൾ വീട് ഇന്നലെ വിറ്റു മകനെ”, അയാൾ അവനെ ആശ്വസിപ്പിച്ചു. ” ഇല്ലച്ഛാ, ഇന്നലെ അഡ്വാൻസ് മാത്രമേ വാങ്ങിയുള്ളു”, അയാൾ പറഞ്ഞു. അച്ഛൻ വീണ്ടും സ്തബ്ധനായി. അപ്പോൾ, മൂന്നാമത്തെ മകൻ പറഞ്ഞു: ” അയാൾ മാന്യനാണ്. എന്തു നഷ്ടം വന്നാലും അയാൾ പറഞ്ഞുറപ്പിച്ച പണം തരും”. അച്ഛനു വീണ്ടും ആശ്വാസമായി!

നാമെല്ലാം സ്വന്തമെന്ന വികാരത്തിനടിമകളാണ്. നല്ലതിനെയെല്ലാം എന്തു വില കൊടുത്തും സ്വന്തമാക്കാനായിരിക്കും, നമ്മുടെ ശ്രമം. അന്യൻ്റെ മുതലിനു തീ പിടിക്കുന്നതു കാണുമ്പോൾ, നാം വെറും കാഴ്ചക്കാർ മാത്രം. കത്തിച്ചാമ്പലാകുന്നതെല്ലാം സ്വന്തമാണെന്നറിയുമ്പോഴുള്ള നമ്മുടെ നിസഹായതയും, അതെല്ലാം അപരൻ്റേതാണെന്നു കേൾക്കുമ്പോഴുള്ള നമ്മുടെ നിസംഗതയും, തുലനം ചെയ്യാൻ
നമുക്കു കഴിഞ്ഞിരുന്നെങ്കിൽ?

ദുരന്തങ്ങൾ ആർക്കു സംഭവിച്ചാലും, അതു തനിക്കു സംഭവിച്ചതാണെന്ന രീതിയിൽ, കാണാനാകണം നമുക്ക്. അല്ലെങ്കിലതു സൂചിപ്പിക്കുന്നത്, കത്തിയമരുന്ന നമ്മുടെ മനുഷ്യത്വത്തേയാണ്. അവനവൻ്റേതായാലും, അപരൻ്റേതായാലും, കത്തിയമരുന്നതിനോടൊപ്പം തന്മയീഭവിക്കുവാൻ നമുക്കാകണം. അപ്പോഴാണു നമ്മുടെ മനുഷ്യത്വം വെളിവാകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര